Esɑi 2

¹ Gɑri yiniwɑ Yinni Gusunɔ u Esɑi Amɔtin bii sɔ̃ɔwɑ kɑ̃siru sɔɔ, Yudɑbɑ kɑ ben wuu Yerusɑlɛmun sɔ̃.

Bɔri yɛn te tɑ ko n wɑ̃ɑ

sere kɑ bɑɑdommɑɔ

(I mɑɑ mɛɛrio nɑɑsu 2-4, Misee 4:1-3)

² U nɛɛ, sɑɑ dɑ̃ɑkɑ sɔɔ,

guu tèn mi Yinni Gusunɔn sɑ̃ɑ yerɑ gire,

tɑ koo guu ni nu tie bɛɛrɛ kerɑ,

kpɑ bwesenu kpuro nu nɑ mi,

³ nu nɛɛ, i nɑ su dɑ Yerusɑlɛmuɔ

su yɔ Yinni Gusunɔn guurɔ

mi Isirelibɑ bɑ rɑ nùn sɑ̃.

Kpɑ u sun win swɛɛ sɔ̃ɔsi

su sĩ yi sɔɔ.

Bɑ koo gere mɛ,

domi guu ten min diyɑ u koo win woodɑ yɑrɑ

kpɑ u gɑri gerumɑ.

⁴ U koo bwese dɑbinu siri,

kpɑ bwese ni, nu nin tɑkobibɑ bɔɔri

nu kɑ tebonu seku.

Mɛyɑ nu koo mɑɑ nin yɑɑsi bɔɔri

nu wobɑ so.

Bweseru gɑrɑ kun mɑɑ gɑru seesimɔ.

Bɑ ǹ mɑɑ ben bibu tɑbu toobu sɔ̃ɔsimɔ.

⁵ Bɛɛ Yɑkɔbun yɛnugibu,

i nɑ su dɑ su sĩ yɑm bururɑm sɔɔ,

mɛ Yinni Gusunɔ u sun wɛ̃ɛmɔ.

Yinni Gusunɔ

u koo be bɑ tii sue kɑm koosiɑ

⁶ Yinni Gusunɔ, wee ɑ wunɛn tɔmbu

Yɑkɔbun yɛnugibu deri,

domi bɑ sɔ̃ɔ yɑri yerugibun sɑ̃ɑru mɔ̀.

Mɑ bɑ wɔri dobo dobon kobu sɔɔ nge Filisitibɑ.

Bɑ dɑ bɑ kɑ tɔn tukobu ɑrukɑwɑni bɔkuɑ.

⁷ Ben tem mu sii geesu kɑ wurɑ yibɑ.

Arumɑni ye yɑ wɑ̃ɑ mi, yɑ ǹ nɔru mɔ.

Tem mɛ, mu mɑɑ dumi yibɑ,

kɑ tɑbu kɛkɛ sisugii yi yi ǹ geeru mɔ.

⁸ Bɑ bwɑ̃ɑrokunu sekɑ bɑɑmɑ.

Mɑ bɑ nu yiirɑmmɛ bɑ sɑ̃ɑmɔ.

⁹ Yen sɔ̃, tɔmbu kpurowɑ bɑ koo yiirɑ

Yinni Gusunɔn wuswɑɑɔ bu tii kɑwɑ.

Yinni Gusunɔ, ɑ ku bu ben durum suuru kuɑ.

¹⁰ Yen sɔ̃, bɛɛ Yɑkɔbun yɛnugibu,

i duo kpee bɑɑbɑ sɔɔ

kpɑ i kuke wɔrusɔ

i kɑ Yinni Gusunɔn nɑnum kɑ win yiiko dukɑ suuri.

¹¹ Tɔ̃ru gɑrɑ sisi

tè sɔɔ bɑ koo wi u tii sue kɑwɑ

kpɑ bu Yinni Gusunɔ turo wɔlle suɑ.

¹² Domi wi, wɔllu kɑ tem Yinniwɑ.

U tɔ̃ɔ te yi,

tè sɔɔ u koo bɑɑwure siri wi u tii sue,

kpɑ u nùn kɑwɑ.

¹³ Tɔ̃ɔ te sɔɔ,

u koo dɑ̃ɑ bɑkɑ ni nu gunu Libɑniɔ kɑ Bɑsɑniɔ kpeerɑsiɑ.

¹⁴ Kpɑ u guunu kɑ gungunu

¹⁵ kɑ gbɑ̃rɑ dɑmginu kɔsuku,

¹⁶ kɑ sere goo nimkuu bɑkɑsu,

gɑ̃ɑnu kpuro gesi ye bɑ kĩru bo.

^17-18 Tɔ̃ɔ te sɔɔ, bɑ koo wi u tii sue kɑwɑ

kpɑ bu bwɑ̃ɑrokunu kpeerɑsiɑ.

Yinni Gusunɔ turowɑ bɑ koo wɔlle suɑ.

¹⁹ Sɑnɑm mɛ u koo se u tɔmbu nɑndɑsiɑ,

tɔmbɑ koo du bu kuke kpee bɑɑbɑ sɔɔ kɑ wɔrusɔ,

bu kɑ win dɑm kɑ win yiiko dukɑ suuri.

²⁰ Tɔ̃ɔ te sɔɔ, tɔmbɑ koo ben bwɑ̃ɑroku ni bɑ sekɑ kɑ sii geesu kɑ wurɑ bɑ sɑ̃ɑmɔ gunɔnguunu kɑ yɑnkɔ̃su deriɑ. ²¹ Kpɑ bu du bu kuke kpee bɑɑbɑ sɔɔ kɑ wɔrusɔ bu kɑ Yinni Gusunɔn dɑm kɑ win yiiko dukɑ suuri.

²² Ǹ n mɛn nɑ, i ku bɛɛn nɑɑnɛ doke tɔnu sɔɔ.

U sɑ̃ɑwɑ nge woo.

U ǹ sɑ̃ɑ gɑ̃ɑnu.