ESAI
BƆNU GBIIKAA
1
1 Tire ten gɑri yi sɑ̃ɑwɑ gɑri yi Gusunɔn sɔmɔ Esɑi Amɔtin bii u geruɑ Yudɑbɑn sɔ̃, kɑ sere ben wuu Yerusɑlɛmun tiin sɔ̃. U gɑri yi geruɑwɑ sɑnɑm mɛ sinɑm beni, Osiɑsi kɑ Yotɑmu kɑ Akɑsi kɑ Esekiɑsi bɑ bɑndu di di Yudɑɔ.
Tɔn be bɑ ku rɑ gɑ̃ɑnu tubu
2 Yinni Gusunɔ u nɛɛ,
wɔllu kɑ tem, i kɑ mɑn nɔɔwɔ.
Nɑ nɛn bibu seeyɑ,
nɑ bu swɑɑ sɔ̃ɔsi,
ɑdɑmɑ bɑ mɑn seesi.
3 Nɑɑ kinɛnu nu rɑ n nin kpɑro yɛ̃.
Kɛtɛkunu nu rɑ n mɑɑ yɛ̃ mi nin yinni u rɑ nu dĩɑnu yiiye.
Adɑmɑ nɛn tɔmbu Isirelibɑ bɑ ǹ mɑm kĩ bu gɑ̃ɑnu giɑ.
Bɑ ku rɑ gɑ̃ɑnu tubu.
4 Mɑ Esɑi u nɛɛ,
bɛɛ Isirelibɑ, bɔ̃rurobɑ i sɑ̃ɑ,
domi i durum mɔ̀wɑ.
Torɑnu nu yibɑ bɛɛn suunu sɔɔ.
Nuku kɔ̃surun wɑ̃ɑrɑ i wɑ̃ɑ.
Bɛɛ kpuro i sɑnkirewɑ,
domi i Yinni Gusunɔ deri.
I nùn gɛmɑ, wi, wi u sɑ̃ɑ bɛɛn Yinni Dɛɛro,
mɑ i nùn biru kisi.
5 Sɛɛyɑsiɑ birɑ̀ u koo mɑɑ bɛɛ ko,
domi nɔn dɑbinɑ i nùn seesi.
I sɑ̃ɑwɑ nge tɔnu wìn bwisikunu kun wɑ̃,
mɑ u dɑɑ kɔ̃sɑ mɔ̀.
6 Sɑɑ win wirun di sere kɑ win nɑɑ tɑrɑnɔ,
kpuro bɑrɑrɑ.
Domi bɑ ǹ win mɛɛrɑbɑ kɑ win bosu teye
bu tim gumgim doke bu sere mɑm nɛɛ, bɑ koo bɔke.
7 Bɛɛn tem mu kuɑ bɑnsu.
Mɛn wusu dɔ̃ɔ mwɑɑkirɑ.
I tɔn tukobu mɛɛrɑ bɑ kɑ mɛn dĩɑnu gurɑ,
bɑ ǹ gɑ̃ɑnu deri.
8 Mɑ Yerusɑlɛmu yɑ tiɑrɑ ye tɔnɑ.
Yɑ kɔ̃ɔre nge kuru resɛm gbɑɑrun suunu sɔɔ,
ǹ kun mɛ, gberɔ.
Yɑ yɔ̃ tom ye tɔnɑ
nge wuu ge bɑ tɑbu bure bɑ doonɑ.
9 Gusunɔ, wɔllu kɑ tem Yinni
ù kun dɑɑ bɛsɛn sukum fiiko fɑɑbɑ kue
Yerusɑlɛmu ye sɔɔ, yɑ koo rɑɑ kɑm kowɑ nge Sodomu kɑ Gomɔrɑ.
Sɑ̃ɑ te Gusunɔ u tusɑ
10 Mɑ Gusunɔ u nɛɛ,
bɛɛ wirugibu be i kɑ Sodomugibu weenɛ,
i nɛ, Yinni Gusunɔn gɑri swɑɑ dɑkio.
Bɛɛ be i mɑɑ tie, i kɑ Gomɔrɑgibu weenɛ,
i nɛn woodɑ mɛm nɔɔwɔ.
11 I tɑmɑɑ bɛɛn yɑ̃ku dɑbi ni, nu mɑn gɑ̃ɑnu sɑ̃ɑ?
Bɛɛn yɑ̃ku yɑ̃ɑnu kɑ yɑ̃ku gum
mɛ i rɑ kɑ mɑn yɑ̃ku dɔ̃ɔ mwɑɑrɑruginu kue,
yɑ den mɑn tusɑ.
Nɑ wɑsirɑ kɑ bɛɛn yɑɑ sɑbenun yɛm
mɛ i rɑ yɛ̃ke nɛn sɑ̃ɑ yerɔ.
12 Ye i rɑ nɛ nɛn sɑ̃ɑ yerɔ kɑ wɔrubu,
yeyɑ nɑ bɛɛ bikiɑ?
13 Bɛɛn kɛ̃ɛ ni i kɑ nɑɑmɔ mi kɑmɑ.
I ku rɑ mɑɑ kɑ nu nɑ.
Bɛɛn turɑre yɑ ǹ mɑn nuburu doremɔ.
I ku mɑɑ mɑn ye dɔ̃ɔ dokeɑ.
Nɑ den bɛɛn kɔ̃sɑ ye tusɑ
ye i rɑ ko ì n mɛnnɑ nɛn sɑ̃ɑ yerɔ
i kɑ mɑn sɑ̃, suru ù n yɑrɑ,
kɑ tɔ̃ɔ wɛ̃rɑrugiru sɔɔ,
kɑ sere mɑɑ tɔ̃ɔ bɑkɑnun sɑɑ.
I ku mɑɑ mɑn tɔ̃ɔ bɑkɑ nin bweseru diiyɑ.
14 Nɑ mɑɑ bɛɛ sɔ̃ɔmɔ,
bɛɛn tɔ̃ɔ bɑkɑ ni kpuro nu mɑn tusɑwɑ.
Nu mɑn sɑ̃ɑwɛwɑ sɔmu bɑkɑnu.
Nɑ mɑɑ wɑsirɑ n kɑ nu sɔbe.
15 Bɑɑ ì n bɛɛn kɑnɑru dɛnyɑsiɑmɔ,
nɑ ku rɑ nu swɑɑ dɑki.
Ì n nɔmɑ yiiyɑ wɔllɔ i kɑ kɑnɑru ko,
nɑ rɑ nɛn wuswɑɑ sĩiyɛwɑ,
nɑ kun bɛɛ mɛɛrɑ.
Domi bɛɛn nɔmɑ tɔmbun yɛm yibɑ be i go.
16 Yen sɔ̃, i tii sɑ̃rɑsio
i nuku kɔ̃suru deri,
kpɑ i ku mɑɑ kɔ̃sɑ ko.
17 I seewo i geɑ ko,
kpɑ i n gem swĩi.
I be bɑ dɑm dɔremɔ fɑɑbɑ koowo.
I gobekubɑ wɛ̃ɛyɔ ye n sɑ̃ɑ begiɑ,
kpɑ i kɑ gɔminibu yinɑ.
18-19 I nɑ su wesiɑnɑ kpɑ su nɔɔsinɑ.
Ì n wurɑ i mɑn mɛm nɔɔwɑ,
bɑɑ bɛɛn gɔ̃ru gɑ̀ n tĩri nge weke biru,
kon gu dɛɛrɑsiɑ gu bururɑ nge wɛ̃su.
Bɑɑ gɑ̀ n mɑɑ sɔ̃rin nɑ nge wɛ̃ɛ wunɔmgii,
gɑ koo bururɑ nge wɛ̃ɛ kpiki,
kpɑ i tem mɛn dĩɑ geenu di.
20 Adɑmɑ ì n yinɑ, mɑ i mɑn seesi,
bɑ koo bɛɛ gowɑ tɑbu sɔɔ kɑ tɑkobi.
Nɛ, Yinni Gusunɔwɑ nɑ yeni geruɑ.
Yinni Gusunɔ
u koo Yerusɑlɛmu dɛɛrɑsiɑ
21 Gusunɔ u nɛɛ,
Yerusɑlɛmu, wunɛ wi nɑ rɑɑ nɑɑnɛ sɑ̃ɑ,
wee ɑ kuɑ nge kurɔ sɑkɑrɑ kowo,
wi u win durɔ deri.
Domi yellu gemgibɑ rɑɑ yibɑ wunɛ sɔɔ.
Adɑmɑ gisɔ, tɔn gowobu tɔnɑwɑ bɑ nun wɑ̃ɑsi.
22 A rɑɑ sɑ̃ɑ nge sii geesu.
Wee ɑ kuɑ nge sii bisu.
A rɑɑ sɑ̃ɑwɑ nge tɑm gem.
Adɑmɑ tɛ̃, ɑ kuɑ nge tɑm mɛ bɑ nim doke.
23 Wunɛn wirugibɑ mɑn seesi,
mɑ bɑ kɑ gbɛnɔbu nɔɔ tiɑ sɑ̃ɑ.
Be kpurowɑ bɑ rɑ n kɛ̃nu yĩiyɔ,
kpɑ bɑ n nɔm birɑn kɛ̃nu nɑɑ gire.
Bɑ ku rɑ gobekubɑ wɛ̃ ye n sɑ̃ɑ begiɑ,
bɑ ku rɑ mɑɑ kɑ gɔminibu yinɛ.
24 Yen sɔ̃, i swɑɑ dɑkio i nɔ
ye nɛ Gusunɔ, wɔllu kɑ tem Yinni nɑ gerumɔ,
nɛ wi nɑ sɑ̃ɑ bɛɛ Isirelibɑn dɑm.
Nɑ nɛɛ, kon bɛɛ nɛn yibɛrɛbɑ mɔru kɔsie
kpɑ nɛn mɔru yu wɑ yu sure.
25 Kon bɛɛ nɔmɑ doke
kpɑ n bɛɛ wɔ̃ nge sisu
n bɛɛn disinu kpuro wunɑ
kpɑ i dɛɛrɑ.
26 Kon bɛɛ kuɑ nge yellu.
Siri kowobu bɑ ǹ mɑɑ nɔm birɑn kɛ̃nu mwɑɑmɔ.
Mɛyɑ bɑ ǹ mɑɑ bwisi kɛ̃ɔbun nɔsu gum tɛɛnimɔ.
Sɑɑ yerɑ bɑ koo nɛɛ,
gemgibu kɑ nɑɑnɛgibun wuuwɑ mini.
27 Kon Yerusɑlɛmu yɑkiɑ yɑ̀ n nɛn kĩru swĩi,
kpɑ n mɑɑ yen tɔmbu wɔrɑ
be bɑ gɔ̃ru gɔsiɑ mi kpuro.
28 Be bɑ mɑn seesi, kon bu kɑm koosiɑ.
Be bɑ durum mɔ̀, kpɑ n bu go.
Be bɑ mɑɑ mɑn biru kisi, kpɑ n bu kpeerɑsiɑ.
29 Sɑɑ ye sɔɔ, dɑ̃ɑ bɑkɑnu kɑ dɑ̃ɑ sɔ̃ɔ
si su sɑ̃ɑ bɛɛn bũu yenu,
su koo de i sekuru wɑ.
30 I ko kowɑ nge dɑ̃ɑ bɑkɑ ni,
sɑnɑm mɛ nin wurusu dɛllɑmɔ,
ǹ kun mɛ nge dɑ̃ɑ sɔ̃ɔ si,
sɑnɑm mɛ su ǹ mɑɑ nim wɑɑmɔ.
31 Wi u tɑmɑɑ u dɑm mɔ u koo ko nge yɑkɑsu,
kpɑ win kookoosu su n sɑ̃ɑ nge dɔ̃ɔ buri,
kpɑ u dɔ̃ɔ mwɑɑrɑ kɑ win kookoo si sɑnnu.
Goo sɑri wi u koo kpĩ u bu fɑɑbɑ ko.