ESAI
Tire ten gɑri yi sɑ̃ɑwɑ bɔnu itɑ.
Bɔnu gbiikɑɑ wiru1n di sere wiru 39.
Yudɑbɑn wɑhɑlɑn gɑriyɑ bɔnu gbiikɑɑ ye, yɑ mɔ̀. Wɑɑti ye sɔɔ, Yudɑbɑ bɑ Asirigibun bɛrum mɔ. Adɑmɑ Gusunɔn sɔmɔ Esɑi u wɑ mɑ n ǹ bɛrum mɛ tɔnɑ mu sɑ̃ɑ ben wɑhɑlɑ. Ye yɑ mɑɑ sɑ̃ɑ ben wɑhɑlɑ, yerɑ mɛm nɔɔbu sɑriru kɑ durum kɑ nɑɑnɛ ye bɑ ǹ Gusunɔ sɑ̃ɑ. Yen sɔ̃nɑ Esɑi u Yudɑbɑ kɑ ben kpɑrobu kirɔ kuɑ bu kɑ gɔ̃ru gɔsiɑ kpɑ bu wurɑ bu gem swĩi ben wɑ̃ɑru sɔɔ. U mɑɑ bu sɔ̃ɔwɑ mɑ goo u koo yɑrimɑ Dɑfidin bweserun di kpɑ u kɑ bɔri yɛndu nɑ hɑnduniɑɔ.
Bɔnu yiruse wiru 40n di sere wiru 55.
Bɔnu yiruse sun sɔ̃ɔmɔ sɑɑ ye bɑ Yuubɑ yoru mwɛɛrɑ bɑ kɑ dɑ Bɑbiloniɔ. Sɑɑ ye sɔɔrɑ Gusunɔn sɔmɔ Esɑi u win tɔmbu sɔ̃ɔwɑ mɑ Gusunɔ u koo bu yɑkiɑ kpɑ u kɑ bu wurɑmɑ ben temɔ bu wɑ̃ɑ kpɑɑru di. Esɑi u mɑɑ sun sɔ̃ɔmɔ tire te sɔɔ mɑ Gusunɔwɑ u gɑ̃ɑnu kpuro nɛni win nɔmuɔ. Wiyɑ u derɑ gɑ̃ɑnu kpuro koorɑmɔ. Sɑɑ win tɔmbu Isirelibɑn min diyɑ hɑnduniɑ yɑ koo durom wɑ.
Bɔnu itɑse wiru 56n di sere wiru 66.
Yuu be bɑ wurɑmɑ yorun di bɑ wɑ̃ɑ Yerusɑlɛmuɔ, ben gɑriyɑ bɔnu itɑse yɑ mɔ̀. Esɑi u bu dɑm kɑ̃ u nɛɛ, Gusunɔ u koo win nɔɔ mwɛɛru yibiɑ u hɑnduniɑgibu siri. U mɑɑ bu gem kobu kɑ tɔ̃ɔ wɛ̃rɑrugiru kɑ yɑ̃kunu kɑ kɑnɑnun gɑri yɑɑyɑsiɑmɔ. Esɑi wiru 61:1-2n gɑriyɑ Yesu u dendɑ sɑnɑm mɛ u win sɔmburu toruɑ.
Tire ten kpunɑɑ
1. Bɑ Isirelibɑ kɑ Yudɑbɑ kirɔ mɔ̀, wiru 1n di sere wiru 12.
2. Yinni Gusunɔ u koo bwese tukunu sɛɛyɑsiɑ, wiru 13n di sere wiru 23.
3. Siri dɑ̃ɑkibu, wiru 24n di sere wiru 27.
4. Kirɔbɑ kɑ mɑɑ nɔɔ mwɛɛnu, wiru 28n di sere wiru 33.
5. Siri dɑ̃ɑkibu, wiru 34n di sere wiru 35.
6. Sinɑ boko Esekiɑsi kɑ Asirigibu, wiru 36n di sere wiru 39.
7. Nuku yɛmiɑbun nɔɔ mwɛɛnu, wiru 40n di sere wiru 55.
8. Lɑbɑɑri dorɑ, wiru 56n di sere wiru 66.