10
1 Sɔn si su gbiisi turɑre kowon gum sɔɔ, su rɑ gum mɛ sɑnkuwɑ. Nge mɛyɑ gɑri bɑkɑ kookoosu bɑɑ sin fiiko su rɑ bwisi kɑ bɛɛrɛ kɑwe.
2 Bwisigiin gɔ̃ru gɑ rɑ n sɑ̃ɑwɑ dee dee. Adɑmɑ gɑri bɔkɔguu gɑ ku rɑ dee dee swĩi. 3 Gɑri bɔkɔ ù n sĩimɔ swɑɑ sɔɔ, bwisi yi rɑ n nùn kɔmiɛwɑ kpɑ u n bɑɑwure sɔ̃ɔsimɔ mɑ u sɑ̃ɑwɑ gɑri bɔkɔ. 4 Wunɛn yinni ù n kɑ nun mɔru seewɑ, ɑ ku wunɛn sɔmburu deri. Domi tii nɛnubu bu rɑ torɑ dɑbinu gbɑrewɑ. 5 Nɑ torɑru gɑru wɑ hɑnduniɑ ye sɔɔ te tɑ wee kpɑrobun min di. 6 Terɑ, bɑ rɑ gɑsɔ gɑri bɑkɑsu ɑye dɑmginu wɛ̃, kpɑ bu tɔn bɛɛrɛgibu ɑye piiminu wɛ̃. 7 Mɛyɑ, nɑ wɑ yobu bɑ dumi sɔni mɑ sinɑmbu bɑ kɑ nɑɑsu sĩimɔ nge yobu.
8 Wi u suurɑ gbemɔ, wiyɑ u koo kpĩ u wɔri ye sɔɔ. Wi u mɑɑ gbɑ̃rɑru surɑmɔ kpɑ wɑɑ yu nùn dɔm. 9 Wi u kpenu suɑmɔ, u koo mɛɛrɑ wɑ. Wi u mɑɑ dɑ̃ɑ bɛrɑmɔ, u ko n wɑ̃ɑwɑ kɑri sɔɔ. 10 Win gbɑ̃ɑ yɑrɑ yɑ̀ kun nɔɔ do, mɑ u ǹ ye nɔɔ dɛ̃ɛre, tilɑsiwɑ u kɑ dɑ̃ɑ ye kĩi kɑ dɑm bɑkɑm. Adɑmɑ bwisiyɑ yi rɑ de gɑ̃ɑnu nu koorɑ. 11 Wi u wɑɑ sɑbuɑ, mɑ yɑ nùn dɔmmɔ, ɑrufɑɑni yerɑ̀ u mɔ.
A kun dɑ gɑri sɑɑri too
12 Bwisigiin gɑri yi rɑ n bɛɛrɛ mɔ. Adɑmɑ gɑri bɔkɔn gɑri yi rɑ gu kɑm koosiewɑ. 13 U rɑ gɑri torewɑ kɑ gɑri bɑkɑru kpɑ u yi wiru go kɑ wiirɑ gɑri kɔ̃si. 14 U rɑ n gɑri sɑɑrimɔwɑ too. Adɑmɑ tɔnu, ɑ ku rɑ n yɛ̃ ye yɑ koo nùn deemɑ. Goo mɑɑ sɑri wi u koo nun sɔ̃ ye yɑ koo koorɑ wunɛn gɔɔn biru. 15 Gɑri bɔkɔ gɑ rɑ tii wɑsirɑru dokewɑ sɔmburu bɑɑtere sɔɔ. Mɛyɑ u ku rɑ mɑɑ kpĩ u dɑ wuu sɔɔ.
16 Bɔ̃rurɑmɑ tem mɛ̀ sɔɔ ɑluwɑɑsi gɑri bɔkɔ u sɑ̃ɑ sunɔ mɑ mɛn sinɑ ɑsɑkpɔbu bɑ rɑ n ben tiin nukurun gɑri mɔ̀ mɛ̀n nɔɔ yɑm sɑ̃rɑ. 17 Doo nɔɔrugibɑ be bɑ sunɔ mɔ wi u yĩsiru yɑrɑ, mɑ win sinɑ ɑsɑkpɔbu bɑ rɑ di dim sɑɑ sɔɔ bu kɑ dɑm wɑ, n ǹ mɔ bu kɑ tɑm nɔ. 18 Wi u yikuru mɔ, win dirun kpɛɛru tɑ rɑ kpunɛwɑ kpɑ tɑ n nim dumɔ. 19 Dɑmgibu bɑ rɑ tɔ̃ɔ bɑkɑ dim kowɑ bu kɑ nuku dobu ko. Tɑm mu rɑ bu nuku dobu wɛ̃ kpɑ gobi yi de bu kpuro wɑ. 20 A ku sinɑ boko wĩi, bɑɑ wunɛn gɔ̃ruɔ. A ku mɑɑ yiikogii wĩi, bɑɑ ɑsiri sɔɔ. À n kuɑ mɛ, gunɔ gɑ koo wunɛn gɑri yi suɑ gu kɑ dɑ gu nùn sɔ̃ ye ɑ geruɑ.