9
1 Geemɑ, nɑ tii wɛ̃, nɑ ye kpuron kɑso kuɑ, mɑ nɑ wɑ gemgibu kɑ bwisigibu kɑ ben sɔmɑ wɑ̃ɑwɑ Gusunɔn nɔmuɔ. Mɛyɑ mɑɑ kĩru kɑ tusiru. Adɑmɑ tɔnu kun yɛ̃ ye yɑ koo nùn deemɑ. 2 Gemgii kɑ tɔn kɔ̃so kɑ tɔn geo wi u dɛɛre kɑ wi u kun dɛɛre kɑ wi u yɑ̃kuru mɔ̀ kɑ wi u kun yɑ̃kuru mɔ̀ kɑ wi u kun torɑru mɔ kɑ wi u torɑru mɔ kɑ wi u nɔɔ mwɛɛru mɔ̀ kɑ sere wi u nɔɔ mwɛɛru nɑsie, gɑ̃ɑ teenɑ nu rɑ be kpuro deemɛ. 3 Ye yɑ koorɑmɔ hɑnduniɑ ye sɔɔ, gɑ̃ɑ teenu wɑ̃ɑ ni nu ǹ sɑ̃ɑ dee dee. Niyɑ, kɔkɔrɔ tiɑ bɑ mɔ. Ben gɔ̃rusɔ, nuku kɔ̃suru kɑ wiirɑ gɑriyɑ yi rɑ n yibɑ ben wɑ̃ɑrun tɔ̃ru kpuro sɔɔ. Amɛn biru, gɔribun wɑ̃ɑ yerɔwɑ bɑ dɔɔ. 4 Be bɑ wɑsi, bɑ yĩiyɔbu mɔ. Bɔ̃ɔ wɑsu gɑ gbee sunɔn goru kere. 5 Be bɑ wɑsi, bɑ yɛ̃ mɑ bɑ koo gbi. Adɑmɑ be bɑ gu, bɑ ǹ gɑ̃ɑnu yɛ̃. Bɑ ǹ mɑɑ kɔsiɑru wɑsi domi bɑ bu duɑriwɑ mi. 6 Ben kĩru kɑ ben tusiru kɑ ben binɛ, ye kpuro yɑ kpɑwɑ mi. Bɑ ǹ mɑɑ bɑɑ gɑɑ mɔ hɑnduniɑ ye sɔɔ.
7 Yen sɔ̃, ɑ doo ɑ di ɑ nɔ kɑ nuku dobu. Domi sɔmbu te ɑ kuɑ, tɑ Gusunɔ wɛ̃re. 8 A de ɑ n dɑ n tɔ̃ɔ bɑkɑ yɑ̃nu sebuɑ bɑɑdommɑ kpɑ ɑ ku duɑri ɑ tii turɑre yɛ̃kɑ. 9 A de ɑ kɑ wunɛn kurɔ wi ɑ kĩ nuku dobu ko wunɛn wɑ̃ɑrun tɔ̃ru sɔɔ te Gusunɔ u nun wɛ̃ te tɑ rɑ doonɛ mi nge woo. Domi yerɑ yɑ ko n sɑ̃ɑ nuku doo bi kɑɑ n mɔ wunɛn sɔmburu sɔɔ hɑnduniɑ ye sɔɔ. 10 Sɔmbu te ɑ gesi wɑ kpuro, ɑ tu koowo. Domi sɔmburu kɑ bwisikunu kɑ yɛ̃ru kɑ bwisi, yen gɑɑ sɑri gɔribun wɑ̃ɑ yerɔ mi ɑ dɔɔ.
Bwisi kun ɑrufɑɑni mɔ
bɑɑdommɑ
11 Nɑ mɑɑ wɑ hɑnduniɑ ye sɔɔ, n ǹ mɔ be bɑ dukɑ mɔ tɔnɑwɑ bɑ rɑ gɑrɑsɑ di bɑɑdommɑ. N ǹ mɑɑ mɔ tɑbu durɔ dɑmgibu tɔnɑwɑ bɑ rɑ tɑbu di bɑɑdommɑ. Mɛyɑ n ǹ mɑɑ mɔ bwisigibɑ bɑ rɑ dĩɑnu wɑ bɑ kun wɑhɑlɑ kue. N ǹ mɑɑ mɔ lɑɑkɑrigibu tɔnɑwɑ bɑ rɑ ko gobigibu bɑɑdommɑ. N ǹ mɑɑ yɛ̃rugibu tɔnɑ tɔmbu bɑ rɑ bɛɛrɛ wɛ̃. Domi be kpurowɑ kɔ̃sɑ kɑ geɑ yɑ rɑ deemɛ. 12 Nge mɛ swɛ̃ɛ yi ku rɑ n yɛ̃ sɑɑ ye bɑ koo yi mwɑ subɑru sɔɔ kɑ yɑ̃ɑkororu, ǹ kun mɛ nge mɛ gunɔ gɑ ku rɑ n yɛ̃ sɑɑ ye bɑ koo ge mwɑ kɑ tɑɑ, nge mɛyɑ tɔnu ku rɑ n win gɔɔn kɔbɑ yɛ̃. Nɔni swɑ̃ɑru tɑ rɑ tɔnun bii deemɛ subɑru sɔɔ nge mɛ bɑ rɑ yɛɛ yi mwɛɛri.
13 Nɑ mɑɑ gɑ̃ɑnu wɑ bwisin swɑɑ sɔɔ ni nɑ tɑmɑɑ nu sɑ̃ɑ gɑ̃ɑ girinu. 14 Wuu gɑgɑ wɑ̃ɑ gɑ ǹ tɔmbu dɑbi. Yerɑ sinɑ boko goo u seemɑ u gu tɑbu wɔri. Mɑ u sɑnsɑni kpĩ u kɑ gu sikerenɑ. 15 Wuu ge sɔɔ, bwisigii goo wɑ̃ɑ. Adɑmɑ bwɛ̃ɛbwɛ̃ɛwɑ u sɑ̃ɑ. Durɔ wi, u koo rɑɑ kpĩ u wuu ge fɑɑbɑ ko sɑɑ sinɑ boko win nɔmɑn di. Adɑmɑ goo kun nùn yɑɑye win bwɛ̃ɛbwɛ̃ɛ ten sɔ̃. 16 Nɛn mi, bwisi yi kere dɑm. Adɑmɑ bwisigii ù n sɑ̃ɑ bwɛ̃ɛbwɛ̃ɛ, tɔmbɑ rɑ nùn gɛmwɑ kpɑ bu yinɑ bu kɑ win bwisi kɛ̃ru sɔmburu ko. 17 Adɑmɑ bɑ n yɛ̃ mɑ bwisigiin gɑri yi bɑ swɑɑ dɑki tɛɛru yi kere wi u gbɑ̃rɑmɔ u kɑ gɑri bɑkɑsu kpɑre. 18 Bwisi yi mɑɑ tɑbu yɑ̃nu kere. Adɑmɑ toro u rɑ geɑ sɑnkuwɑ.