WAASU KOWON TIRERU
BWISIGIIN GARI
Wɑ̃ɑru tɑ tubum sɛ̃
1
1 Gɑri wee yi wɑɑsu kowo u geruɑ. U sɑ̃ɑ Dɑfidin bii, u mɑɑ sɑ̃ɑ sinɑ boko Yerusɑlɛmuɔ. 2 Wiyɑ u nɛɛ, gɑ̃ɑnu kpuro nu tubum sɛ̃. Kɑ gem yɑ sɑ̃ɑwɑ biti. 3 Arufɑɑni yerɑ̀ tɔnu u rɑ wɑ hɑnduniɑ mini win wɑhɑlɑ ye u mɔ̀ kpuro sɔɔ. 4 Gɑbɑ gbimɔ mɑ gɑbɑ kɔsire mɔ̀. Adɑmɑ tem mu ko n wɑ̃ɑwɑ mɛ sere kɑ bɑɑdommɑɔ. 5 Sɔ̃ɔ u yɑrimɔ, u dumɔ, u wurɑmɔ mìn di u yɑrimɔ. 6 Woo gɑ̀ n seewɑ, gɑ rɑ dewɑ sɔ̃ɔ yɛ̃sɑn nɔm dwɑru giɑ kpɑ gu wurɑmɑ sɔ̃ɔ yɛ̃sɑn nɔm geu giɑ. Swɑɑ tiɑ yerɑ gɑ rɑ n swĩi mi. 7 Dɑɑ bɑkɑnu kpurowɑ nu rɑ nin nim sure nim wɔ̃kuɔ. Adɑmɑ nim wɔ̃ku ge, gɑ ku rɑ yibu. Swɑɑ tiɑ yerɑ dɑɑ ni, nu kɑ nin nim mɛ suremɔ ge sɔɔ. 8 Gɑ̃ɑnu kpurowɑ nu sɔmburu mɔ̀ sere tɔnu kun kpɛ̃ u gɑ̃ɑnu gere. Nɔni ku rɑ yɑm mɛɛribu wɑsire. Mɛyɑ swɑsu ku rɑ mɑɑ gɑri nɔɔbu wɑsire. 9 Ye yɑ rɑɑ wɑ̃ɑ gĩɑ, yerɑ yɑ ko n mɑɑ wɑ̃ɑ siɑ. Ye yɑ rɑɑ koorɑ gĩɑ, yerɑ yɑ koo mɑɑ koorɑ siɑ. Gɑ̃ɑnu sɑri hɑnduniɑ yè sɔɔ ni nu sɑ̃ɑ kpɑɑnu. 10 Goo ù n nɛɛ, gɑ̃ɑ kpɑɑnu wee, ɑ n yɛ̃ mɑ gɑ̃ɑ ni, nu rɑɑ wɑ̃ɑ kɔ sɑɑ yellun di. 11 Sɑ ku rɑ n yɑɑye ye yɑ bɛsɛn sikɑdobɑ deemɑ yellu. Mɛyɑ be sɑ mɑɑ gbiiye, bɑ ǹ yɑɑyɑmɔ ye yɑ sun deemɑ.
Bwisi yi wɑɑsu kowo u wɑ
win wɑ̃ɑru sɔɔ
12 Nɛ, wɑɑsu kowo, nɑ kuɑ Isirelibɑn sunɔ Yerusɑlɛmuɔ. 13 Mɑ nɑ wɛ̃ɛrɑ nɑ kɑsu kɑ bwisi ye yɑ koorɑmɔ hɑnduniɑ mi. Mɑ nɑ deemɑ yɑ sɑ̃ɑwɑ sɔm sɛ̃sɔgiru te Gusunɔ u derɑ tɔmbɑ mɔ̀. 14 Nɑ wɑ ye yɑ koorɑmɔ hɑnduniɑ sɔɔ kpuro. Mɑ nɑ deemɑ yɑ tubum sɛ̃. Yɑ sɑ̃ɑwɑ nge wi u kĩ u woo kpɑrɑ. 15 Domi ye yɑ sikire, yɑ ǹ dɛmiɑrɔ. Ye yɑ mɑɑ sɑri, bɑ ǹ kpɛ̃ bu ye gɑri.
16 Yerɑ nɑ tii sɔ̃ɔwɑ nɑ nɛɛ, wee nɑ bwisi kɑsu, mɑ nɑ yi wɑ n kere be bɑ mɑn gbiiye bɑndu sɔɔ Yerusɑlɛmuɔ. Nɑ bwisi kɑ yɛ̃ru wɑ too. 17 Mɑ nɑ tii wɛ̃ n kɑ giɑ ye n sɑ̃ɑ bwisi kɑ ye n sɑ̃ɑ gɑri bɑkɑru. Adɑmɑ nɑ deemɑ ye kpuro yɑ tubum sɛ̃ yɑ sɑ̃ɑwɑ nge wi u kĩ u woo kpɑrɑ. 18 Domi wi u win bwisi sosimɔ, wɑhɑlɑwɑ u tii sosiɑmmɛ. Wi u mɑɑ win yɛ̃ru sosimɔ, nuku sɑnkirɑnɑ u tii sosiɑmmɛ.