18
1 Wi u win tii gɔwɑ, win tiin ɑrufɑɑniwɑ u kɑsu. U rɑ mɔru sewɑ bɑ̀ n kĩ bu nùn bwisi kɛ̃.
2 Gɑri bɔkɔ u ku rɑ bwisi kɑ̃, mɑ n kun mɔ u win gɑri bɑkɑru sɔ̃ɔsi.
3 Nuku kɔ̃suru tɑ rɑ kɑ gɛndu nɛwɑ, kpɑ bɛɛrɛ sɑriru tu kɑ sekuru nɑ.
4 Tɔnun gɑri yi sɛ̃wɑ nge dɑɑ tèn nim mu duku, ɑdɑmɑ bwisi yi sɑ̃ɑwɑ nge nim mɛ mu yɑrimɔ sɑɑ bwiɑn di.
5 N ǹ weenɛ ɑ yɔ̃rɑ toron biruɔ, kpɑ ɑ gemgii nùn win gem birɑ.
6 Gɑri bɔkɔn gɑri yi rɑ kɑ sikirinɔsu nɛwɑ, kpɑ win nɔɔ gu kɑ soonɑɑ nɑ.
7 Gɑri bɔkɔn gɑriyɑ yi rɑ nùn yinɑ mwɛ, kpɑ yu nùn kɑm ko.
8 Dɔmɛn gɑri yi sɑ̃ɑwɑ nge dĩɑ duronu ni tɔmbɑ kɑtɑ mɔ̀ bɑ mwɛɛmɔ.
9 Wi u rɑ sɔmburu ɑtɑfiiru ko, kɑ wi u tu sɑnkumɔ, be kpuro tiɑ.
10 Yinni Gusunɔ u sɑ̃ɑwɑ nge gbɑ̃rɑ dɑmgiru. Gemgii ù n dukɑ dɑ mi, u ko n wɑ̃ɑwɑ bɔri yɛndu sɔɔ. 11 Gobigii u rɑ win dukiɑ gɑrisiwɑ nge gbɑ̃rɑ te tɑ dɑm mɔ, domi u tɑmɑɑ yiyɑ yi nùn kɔ̃su.
12 Tii suɑbu bu rɑ kɑ tɔnu kɑm kobu nɑɑwɛwɑ, ɑdɑmɑ tii kɑwɑbu bu rɑ dewɑ bu tɔnu bɛɛrɛ wɛ̃.
13 Wi u ku rɑ gɑri swɑɑ dɑki u sere wisi, yɑ win gɑri bɑkɑru sɔ̃ɔsimɔwɑ. Mɛyɑ u mɑɑ tii sekuru dokemɔwɑ.
14 Tɔnu ù n kĩ u n wɑ̃ɑ, yɑ rɑ nùn dɑm kɛ̃ win bɑrɑru sɔɔ, ɑdɑmɑ wi u kun yĩiyɔbu mɔ, wɑrɑ koo kpĩ u nùn dɑm kɛ̃.
15 Bwisigii u rɑ kɑ̃wɑ u yɛ̃ru sosi. Lɑɑkɑrigii u rɑ mɑɑ kɑ̃wɑ u sɔ̃ɔsiru wɑ.
16 Kɛ̃nu nu rɑ tɔnu swɛɛ kuewɑ, kpɑ nu de yɛ̃ro u dɑmgibun nɔnu geu wɑ.
17 Siribu sɔɔ wi u gbiɑ u gɑri geruɑ, yi rɑ n ginɑ sɑ̃ɑwɑ dee dee, sere win yibɛrɛ ù n mɑɑ wigii geruɑ.
18 Tɛtɛ dumɑ yɑ rɑ sɔ̃ɔsi wi u gem mɔ, kpɑ sɑnnɔsu su kpe, kpɑ yu dɑmgibu yɑkiɑnɑ.
19 À n wunɛn bɔrɔ torɑri, yɑ sɛ̃ ɑ kɑ nùn susi n kere ɑ gbɑ̃rɑ dɑmgiru surɑ. Ì n mɑɑ sɑnnɑ, i kɑ dorɑ, yen sɛ̃sɔ gɑ kpɑ̃ gɑ kere dii te bɑ kɑ kɔkɔrɔ dɑmgiɑ kɛnuɑn dubu.
20 Tɔnun geren ɑreyɑ u ko n kɑ wɑ̃ɑ.
21 Gɑri yi koo kpĩ yi tɔnu go. Yi koo mɑɑ kpĩ yi nùn wɑ̃ɑru wɛ̃. Wi u rɑ gɑri sɑɑri u koo yin ɑre wɑ.
22 Wi u kurɔ wɑ u gɑ̃ɑ geenu wɑwɑ. Gusunɔn duromɑ.
23 Sɑ̃ɑro u rɑ gɑri gerewɑ kɑ wɔnwɔndu, ɑdɑmɑ gobigii u rɑ gerewɑ kɑ dɑm.
24 Bɔrɔ dɑbinu nu koo kpĩ nu kɑ tɔnu nɔni swɑ̃ɑru nɑɑwɑ, ɑdɑmɑ bɔrɔ goo u mɛro bisi kere.