17
1 N sɑnɔ bo ɑ dĩɑ dɔki tiɑ wɑ ɑ di bɔri yɛndu sɔɔ, ye kɑɑ kɑ tɔ̃ɔ bɑkɑ dim di mi sɑnnɔsu wɑ̃ɑ.
2 Sɔm kowo lɑɑkɑrigii u rɑ kowɑ win yinnin bii be bɑ geɑ yinɑn wirugii, kpɑ u tubi di kɑ be sɑnnu.
3 Dɔ̃ɔwɑ bɑ rɑ kɑ wurɑ kɑ sii geesu sɔwe, ɑdɑmɑ Yinni Gusunɔwɑ u rɑ tɔnun gɔ̃ru wɛ̃ɛri.
4 Tɔn kɔ̃sowɑ u rɑ tɔn kɔ̃son gɑri swɑɑ dɑki, kpɑ wee kowo u mɑɑ weesugii swɑɑ dɑki.
5 Wi u sɑ̃ɑrobu yɛ̃ɛmɔ, Gusunɔwɑ u yɛ̃ɛmɔ wi u bu tɑkɑ kuɑ. Wi u win beruse yɛ̃ɛmɔ yèn sɔ̃ kɔ̃sɑ nùn deemɑ, bɑ koo yɛ̃ro sɛɛyɑsiɑwɑ.
6 Debuminu nu sɑ̃ɑwɑ durɔ tɔkɔn bɛɛrɛ. Bɑɑbɑbɑ bɑ mɑɑ sɑ̃ɑwɑ ben bibun bɛɛrɛ.
7 Gɑri ɑsɑnsigii kun kɑ gɑri bɔkɔ weenɛ. Kɑɑ sere gere weesu kɑ sinɑ boko?
8 Gɑbu bɑ rɑ n tɑmɑɑ ben kɛ̃rɑ tɑ koo kɑ bu gɑ̃ɑ geenu nɑɑwɑ. Mi bɑ gesi duɑ kpuro tu ben bukɑtɑ wunɑnɑ.
9 Wi u rɑ berusen torɑnu duɑri, u kĩ bɑ n kĩɑnɛwɑ. Wi u rɑ mɑɑ nu yɑɑye win gɑri gerubu sɔɔ, u bɔrɔnu kɑrɑnɑmɔwɑ.
10 Gerusibu bu rɑ sɔmburu ko wi u bwisi mɔn mi, n kere bu gɑri bɔkɔ bokuru so nɔn wunɔbu (100).
11 Tɔn kɔ̃so u rɑ n kɑsuwɑ u tɔnu seesi, ɑdɑmɑ bɑ koo nùn tɔn kɔ̃so kpɑre u nùn sɛɛyɑsiɑ.
12 N burɑm bo ɑ kɑ purukɑ yɔɔni yinnɑ te bɑ buu wɔrɑri, ye kɑɑ kɑ gɑri bɔkɔ yinnɑ gèn wiirɑrɑ seewɑ.
13 Wi u rɑ geɑ kɔ̃sɑ dibu kɔsie, kɔ̃sɑ kun kpeemɔ yɛ̃ron yɛnuɔ.
14 Wi u sikirinɔsu toruɑ, n sɑ̃ɑwɑ nge u nim gunɑ gĩɑ. Yen sɔ̃, ɑ su derio sɑnnɔ gu sere tore.
15 Wi u tɔn kɔ̃so gem wɛ̃ɛmɔ, kɑ wi u gemgii tɑɑrɛ wɛ̃ɛmɔ, be kpurowɑ Yinni Gusunɔ u tusɑ.
16 Mbɑ gobin ɑrufɑɑni gɑri bɔkɔn nɔmɑ sɔɔ. U koo kɑ yi bwisi dwe? Aɑwo, u ǹ yen bwisi mɔ.
17 Bɔrɔ kĩnɑsibu bɑ rɑ kĩru sɔ̃ɔsinɛwɑ sɑɑ kpuro sɔɔ. Wɑhɑlɑn sɑɑ sɔɔrɑ mɛro bisi u rɑ somi.
18 Gɑri bɔkɔwɑ gɑ rɑ wure gu goon dibu sɔbe.
19 Wi u rɑ sɑnnɔsu kɑ̃, u rɑ durum kɑ̃wɑ. Wi u rɑ gɑ̃ɑnu niɑ ko ni nu nùn kere, u koo kɑm kowɑ.
20 Wi u rɑ tɔnu nɔni wɔ̃ke, u ǹ nuku dobu wɑsi. Wi u rɑ gɑri kɔ̃si gere, kɔ̃sɑ yɑ rɑ nùn deemɛ.
21 Wi u gɑri bɔkɔ mɑrɑ, nuku sɑnkirɑnɑ u rɑ n mɔ. Mɛyɑ bii wi u kun ɑsɑnsi mɔn tundo u ǹ kpɛ̃ u n nuku dobu mɔ.
22 Nuku dobu bu sɑ̃ɑwɑ tìm gem wɑsin sɔ̃, ɑdɑmɑ nuku sɑnkirɑru tɑ rɑ wɑsi dɑm dwiiyɑsiewɑ.
23 Tɔn kɔ̃sowɑ u rɑ nɔm birɑn kɛ̃nu mwɛ u kɑ tɔnu gem birɑ.
24 Lɑɑkɑrigii, bwisiyɑ u rɑ n nɑɑ gire, ɑdɑmɑ gɑri bɔkɔ, gɑ rɑ n bwisikumɔwɑ ye gɑ ǹ wɑsi.
25 Bii gɑri bɔkɔ u rɑ win tundo kɑ win mɛro nuku sɑnkirɑnu kpɛ̃ɛwɑ.
26 N ǹ weenɛ bu gemgii gɑ̃ɑnu bure u kɔsiɑ yèn sɔ̃ u gem geruɑ. N ǹ mɑɑ weenɛ bu sunɔ so yèn sɔ̃ u siri dee dee.
27 Wi u yɛ̃ru mɔ, u ku rɑ gɑri gere too. Wi u lɑɑkɑri mɔ, u suuru mɔwɑ.
28 Wi u win nɔɔ kpĩɑ, u bwisi mɔwɑ. Bɑɑ gɑri bɔkɔn tii, gɑ̀ n mɑɑri, kɑɑ n tɑmɑɑ gɑ bwisi mɔwɑ.