135
1 I Yinni Gusunɔ siɑro. I win yĩsiru tɔmɔ.
Bɛɛ win sɔm kowobu,
2 bɛɛ be i sɔmburu mɔ̀ win sɑ̃ɑ yerɔ, i nùn siɑro.
3 I nùn siɑro, u sɑ̃ɑwɑ tɔn geo.
I kɑ win yĩsiru womu koowo, u sɑ̃ɑwɑ tɔn geo.
4 Yinni Gusunɔ u tii Isirelibɑ Yɑkɔbun bweseru gɔsiɑ
bɑ n kɑ sɑ̃ɑ wigibu.
5 Nɑ yɛ̃ mɑ u kpɑ̃, mɛyɑ wi, bɛsɛn Yinni u bũnu kpuro kere.
6 Ye u kĩ, yerɑ u rɑ ko wɔllɔ kɑ temɔ kɑ nim wɔ̃kuɔ kɑ gen sɔɔwɔ.
7 U rɑ de guru winu nu sɔ̃ɔsirɑ hɑnduniɑ kpuro sɔɔ.
U rɑ de guru mɑɑkinu nu koorɑ kpɑ u de gurɑ yu nɛ.
Kpɑ u woo kusiɑmɑ gen wɑ̃ɑ yerun di.
8 U Egibitigibun bii gbiikobu go sere kɑ ben yɑɑ sɑbenun bii gbiikinɔ.
9 U sɔm mɑɑmɑɑkiginu kuɑ Egibitiɔ u kɑ yen sinɑ boko
kɑ win sɔm kowobu kpuro sɛɛyɑsiɑ.
10 U bwese dɑbinu go, mɑ u sinɑm dɑmgibu go.
11 Beyɑ, Sihoni Amɔrebɑn sunɔ kɑ Ogu Bɑsɑnin sunɔ
kɑ sere mɑɑ Kɑnɑnibɑn sinɑmbu kpuro.
12 U sinɑm ben tem suɑ
u win tɔmbu Isirelibɑ wɛ̃ bɑ tubi di.
13 Yinni Gusunɔ, wunɛn yĩsiru tɑ ko n wɑ̃ɑwɑ sere kɑ bɑɑdommɑɔ.
Bɑ ko n nun yɑɑyewɑ wɑɑti bɑɑyere sɔɔ.
14 Yinni Gusunɔ u koo win tɔmbu siriɑ,
kpɑ u win sɔm kowobun wɔnwɔndu wɑ.
15 Bɑ bwesenun bũnun bwɑ̃ɑrokunu kuɑwɑ kɑ sii geesu kɑ wurɑ.
Tɔmbun nɔmɑn sɔmburɑ.
16 Nu nɔsu mɔ, ɑdɑmɑ nu ku rɑ gɑri gere.
Nu nɔni mɔ, ɑdɑmɑ nu ku rɑ yɑm wɑ.
17 Nu swɑsu mɔ, ɑdɑmɑ nu ku rɑ gɑri nɔ.
Nu ǹ wɛ̃siɑru mɔ nin nɔɔwɔ.
18 Be bɑ nu sekumɔ kɑ be bɑ nu nɑɑnɛ sɑ̃ɑ,
be kpuro bɑ sɑ̃ɑwɑ nge ni.
19 Isirelibɑ, i Yinni Gusunɔ siɑro.
Aronin bweseru, i Yinni Gusunɔ siɑro.
20 Lefin yɛnugibu, i Yinni Gusunɔ siɑro.
Bɛɛ be i nùn nɑsie, i nùn siɑro.
21 Yinni Gusunɔ u wɑ̃ɑ Yerusɑlɛmuɔ.
I nùn siɑro sɑɑ Siɔnin di.
I Yinni Gusunɔ siɑro.