80
1 Womu ge Asɑfu u wom kowobun wirugii kuɑ kɑ mɔrɔku. Ge wee.
2 Wunɛ Isirelibɑn kpɑro, ɑ swɑɑ dɑkio ɑ nɔ.
Wunɛ wi ɑ rɑ wunɛn tɔmbu kpɑre nge yɑ̃ɑ gɔ̃ɔ,
mɑ ɑ sɔ̃ wɔllun kɔ̃sobun suunu sɔɔ,
ɑ tii sɔ̃ɔsio wunɛn yiiko sɔɔ.
3 A bɛsɛ Efɑrɑimu kɑ Bɛnyɑmɛɛ kɑ Mɑnɑsen bwese kɛri wunɛn dɑm sɔ̃ɔsio,
kpɑ ɑ sun fɑɑbɑ ko.
4 Yinni Gusunɔ, ɑ sun wɔro.
A kɑ sun nɔnu geu mɛɛrio, kpɑ ɑ sun fɑɑbɑ ko.
5 Gusunɔ wɔllu kɑ tem Yinni,
sere sɑɑ yerɑ̀ kɑɑ n kɑ sun mɔru sɑ̃ɑ
ɑ n bɛsɛn kɑnɑru yinɑmɔ.
6 Wee ɑ derɑ nuku sɑnkirɑnu nu kuɑ bɛsɛn dĩɑnu,
mɑ ɑ derɑ bɛsɛn nɔni yĩresu kuɑ bɛsɛn nim.
7 A derɑ be bɑ kɑ sun sikerenɛ bɑ sɑnnɑmɔ bɛsɛn sɔ̃.
Mɑ bɛsɛn yibɛrɛbɑ bɑ sun yɛ̃ɛmɔ.
8 Gusunɔ wɔllu kɑ tem Yinni, ɑ sun wɔro.
A kɑ sun nɔnu geu mɛɛrio kpɑ su fɑɑbɑ wɑ.
9 Wee ɑ resɛm dɑ̃ɑ wukɑmɑ Egibitin di,
mɑ ɑ tɔmbu seeyɑ ben wɑ̃ɑ yenun di,
mɑ ɑ resɛm ye girɑ mi.
10 A ye ɑyeru kuɑ mɑm mɑm, mɑ yɑ seewɑ yɑ nuwi girɑ.
Yɑ kpɛ̃ɑ yɑ tem kpuro
11 kɑ guunu wukiri,
mɑ yen kɑ̃ɑsi yi kpɛ̃ɑ nge dɑ̃ɑ ye bɑ mɔ̀ sɛduru.
12 Yen kɑ̃ɑsi yi, yi dɑ sere nim wɔ̃kuɔ,
mɑ yin nuwi yi dɑ sere dɑɑ bɑkɑrɔ yi kpɑrɑ.
13 Yinni Gusunɔ, mbɑn sɔ̃nɑ ɑ yen kɑrɑn gɑmbo kɔsukɑ,
mɑ ɑ derɑ be bɑ sɑrɔ mi, bɑ ye gurɑmɔ.
14 Mɑ ɑ derɑ sɑkɑnu kɑ gbeeku yɛɛ yi yi tie, yi nɑɑmɔ yi ye dimɔ.
15 Gusunɔ, wɔllu kɑ tem Yinni, ɑ wurɑmɑ.
A mɛɛrio wɔllun di kpɑ ɑ wunɛn resɛm ye nɔni doke.
A ye kɔ̃suo.
16 A resɛm dɑ̃ɑ te nɔɔrio
te, te tɑ sɑ̃ɑ nge wunɛn bii wi ɑ gɔsɑ.
17 Wee bɑ resɛm bɔɔrɑ bɑ dɔ̃ɔ mɛni.
A bu mɔru kɔsieyo bu gbi.
18 A de wunɛn dɑm mu n kɑ wi ɑ gɔsɑ u sɔ̃ wunɛn nɔm geuɔ wɑ̃ɑ.
19 Sɑɑ yerɑ sɑ ǹ mɑɑ kɑ nun tondɑmɔ.
A de sɑ n wɑ̃ɑ kpɑ sɑ n nun sɑ̃ɑmɔ.
20 Gusunɔ, wɔllu kɑ tem Yinni, ɑ sun wɔro.
A kɑ sun nɔnu geu mɛɛrio, kpɑ su fɑɑbɑ wɑ.