68
1 Womu ge Dɑfidi u wom kowobun wirugii kuɑ. Ge wee.
2 Gusunɔ, ɑ seewɑ mɑ wunɛn yibɛrɛbɑ bɑ yɑrinɑ.
Wunɛn wɛrɔbu bɑ duki suɑ wunɛn wuswɑɑn di.
3 A bu yɑrinɑsiɑ nge wiisu.
Mɑ bɑ yɑndɑ nge gum minɛru te bɑ dɔ̃ɔ tĩi.
Tɔn kɔ̃sobu bɑ mundɑ wunɛn wuswɑɑɔ Gusunɔ.
4 Adɑmɑ gemgibu bɑ rɑ n nuku dobu kɑ nɑsɑrɑ mɔwɑ wunɛn mi kpɑ bɑ n yɛ̃ɛrimɔ.
5 I Gusunɔn yĩsiru wɔlle suo kɑ womusu.
I nùn swɑɑ kuo, u gbɑburu mɔ̀,
u guru winu sɔni u wee.
Win yĩsirɑ Yinni Gusunɔ.
I nuku dobu koowo win wuswɑɑɔ.
6 Yinni Gusunɔ, wunɑ ɑ sɑ̃ɑ gobekubɑn bɑɑbɑ kɑ gɔminibun kɔ̃so.
A wɑ̃ɑ wunɛn wɑ̃ɑ yee dɛɛrɑrɔ.
7 Wunɑ ɑ rɑ be tɔmbɑ yinɑ yɛnu wɛ̃,
kpɑ ɑ yobu yɑkiɑ, ɑ bu nuku dobu wɛ̃.
Adɑmɑ kɑɑ mɛm nɔɔ sɑribɑ deriwɑ mi gɑ̃ɑnu sɑri.
8 Gusunɔ, sɑnɑm mɛ ɑ wunɛn tɔmbu swɑɑ gbiiye gbɑburɔ,
9 tem mu yĩirɑ, mɑ wɔllɑ wukiɑrɑ kɑ dɑm wunɛn wuswɑɑɔ.
Mɑ Sinɑin guurɑ diirɑ wunɛ Isirelibɑn Yinnin wuswɑɑɔ.
10 A derɑ guri bɑrukɑgiɑ yɑ nɑ,
mɑ wunɛn tem sɔɔ wɑ̃ɑrɑ wurɑmɑ.
11 Mɛ sɔɔrɑ wunɛn tɔmbɑ ben wɑ̃ɑ yeru kuɑ,
mɛ, mɛ ɑ sɔɔru kuɑ kɑ kĩru wɔnwɔndobun sɔ̃.
12 Yinni Gusunɔ, ɑ woodɑ wɛ̃,
mɑ tɔn kurɔ sɔmɔ dɑbiru bɑ ye kpɑrɑ.
13 Yibɛrɛbɑn tɑbu sinɑmbɑ yɑkikirɑmɔ,
mɑ ben kurɔbu bɑ ben yɑ̃nu bɔnu mɔ̀ ni bɑ deri.
14 N sɑ̃ɑre kpɑrukonun kɑsi yi sii geesu sɔɔwɑ
mɑ nin sɑnsu wurɑ mɔnsi, mɑ i sere dɑ i kpĩ yɑ̃ɑ gɔ̃sɔ?
15 Sɑnɑm mɛ Dɑm kpurogii wi, u sinɑm be yɑrinɑsiɑ,
tem mu bururɑ guu te bɑ mɔ̀ Sɑlumɔniɔ.
16 Bɑsɑnin guunu nu sɑ̃ɑwɑ guu bɑkɑnu.
Nin gungunu mɑɑ dɑbi.
17 Bɛɛ guu ni i gunguu dɑbinu mɔ,
mbɑn sɔ̃nɑ i kɑ Gusunɔn guu te u gɔsɑ nisinu mɔ̀.
I n yɛ̃ mɑ miyɑ u koo win wɑ̃ɑ yeru ko sere kɑ bɑɑdommɑɔ.
18 Yinni Gusunɔ, ɑ tɑbu kɛkɛ dɑbinu mɔ,
mɑ ɑ sĩimɔ yen nɔrɔm nɔrɔm kɑ yen nɔrɔm nɔrɔm subɑ yɛndun suunu sɔɔ.
Wunɛn yiiko ye yɑ sɔ̃ɔsirɑ Sinɑiɔ yɑ wurɑ wunɛn sɑ̃ɑ yerɔ.
19 Yinni Gusunɔ, ɑ yɔɔwɑ guurun wɔllɔ, mɑ ɑ tɔmbu yoru mwɛɛrɑ.
Mɑ bɑ nun kɛ̃nu kɑ̃, kɑ mɑm be bɑ nun seesimɔn tii.
20 Gusunɔ u rɑ sun nɔɔri.
Wiyɑ u sɑ̃ɑ bɛsɛn fɑɑbɑ kowo.
Yen sɔ̃, sɑ ko nùn siɑrɑ tɔ̃ɔ bɑɑtere.
21 Wiyɑ u rɑ tɔnu fɑɑbɑ ko.
Wi turowɑ u koo kpĩ u nùn yɑkiɑ sɑɑ gɔɔn di.
22 Wiyɑ u koo win yibɛrɛbɑn wiru kɔrɑ.
Kpɑ u be bɑ wɑ̃ɑ durum sɔɔn wii suunu yɑbe.
23 Wiyɑ u nɛɛ, u koo kɑ bu nɑ sɑɑ Bɑsɑnin di,
kpɑ u bu yɑrɑmɑ sɑɑ nim wɔ̃ku sɔɔn di,
24 kpɑ su bɛsɛn nɑɑsu kpɛ̃ɛ ben yɛm sɔɔ,
kpɑ bɛsɛn bɔ̃nu nu ben gonu tem.
25 Gusunɔ nɛn Yinni, nɛn sinɑ boko,
bɑ wunɛn sɑnum wɑɑmɔ wunɛn sɑ̃ɑ yee dɛɛrɑrɔ.
26 Wom kowobɑ bɑ swɑɑ gbiɑ,
mɑ be bɑ bɑrɑnu kɑ mɔrɔkunu soomɔ bɑ bu swĩi,
bɑ wɑ̃ɑ wɔndiɑ be bɑ bɑrɑnu soomɔn suunu sɔɔ.
27 I Yinni Gusunɔ siɑro mi tɔmbɑ mɛnnɑ.
Bɛɛ Isirelibɑn bweseru, i nùn wɔlle suo.
28 Bɛnyɑmɛɛ wi u piiburu bo, win bweserɑ tɑ bu swɑɑ gbiiye,
mɑ Yudɑn bwese kɛrɑn wirugibu kɑ ben tɔmbu bɑ bu swĩi.
Yen biru, Sɑbulonin bwese kɛrɑ kɑ Nɛfitɑligiɑn wirugibu bɑ bu swĩi.
29 Gusunɔ u woodɑ wɛ̃ bu nùn ko dɑmgii.
Gusunɔ, ɑ ye ɑ sun kuɑ dɑm sireo.
30 Sinɑmbɑ koo kɑ nun kɛ̃nu nɑɑwɑ wunɛn sɑ̃ɑ yerɔ te tɑ Yerusɑlɛmun diɑ kpuro gunum kere.
31 Yinni Gusunɔ, ɑ Egibiti yɑm swĩɛyɔ, ye yɑ nun sɑ̃ɑmɔ kɑ sii geesu,
ye, ye yɑ sɑ̃ɑ nge kɑrɑku ge gɑ wɑ̃ɑ dɑɑrun bɔkuɔ,
ǹ kun mɛ nge nɑɑ kinɛ ni nu wɑ̃ɑ gɔ̃sɔ,
ye, ye yɑ bwesenu dɑm dɔremɔ.
A be bɑ rɑ n tɑbu kĩ yɑrinɑsio.
32 Dɑmgibɑ wee sɑɑ Egibitin di.
Mɑ Etiopigibɑ duki mɔ̀ bɑ nɔmɑ sue Gusunɔn mi giɑ.
33 Hɑnduniɑn sinɑmbu, i Yinni Gusunɔ siɑro kɑ womusu.
I nùn wɔlle suo.
34 I nùn siɑro kɑ womusu
wi, wi u sĩimɔ wɔllɔ te tɑ wɑ̃ɑ sɑɑ yellun di.
Wee win nɔɔ dɑmguu gɑ nɔɔrɑ.
35 I Gusunɔ bɛɛrɛ wɛ̃ɛyɔ.
Win yiiko yɑ wɑ̃ɑwɑ Isirelibɑ sɔɔ.
Mɑ win dɑm mu wɑ̃ɑ wɔllɔ.
36 Gusunɔ, ɑ nɑnum mɔ wunɛn sɑ̃ɑ yerɔ.
Wunɛ Isirelibɑn Yinni, ɑ rɑ wunɛn tɔmbu dɑm wɛ̃.
Gusunɔ, sɑ nun siɑrɑ.