58
1 Womu ge Dɑfidi u wom kowobun wirugii kuɑ. Ge wee.
2 Bɛɛ Wɔrukoon tɔmbu,
i ko kpĩ i bɑɑwure siri dee dee i n kɑ sere nɔɔ mɑɑri?
3 Aɑwo, i kɔ̃sɑ mɔ̀wɑ gɔ̃ruɔ.
Mɑ i bɔbunu ɑyeru kɛ̃mɔ.
4 Dɑɑ kɔ̃sɑgii u rɑ sɔ̃ɔsirewɑ sɑɑ win mɛron nukurun di.
Wee kowo u rɑ kɔ̃ɔrewɑ sɑɑ win birun di.
5 Ben nɔɔ gɑ rɑ n dɛ̃ɛ yibɑwɑ nge wɑɑ,
kpɑ bɑ n ben swɑsu kɔruɑ nge surɔkɔru
6 te tɑ kun kĩ tu dobo dobogibun gɑri nɔ,
bɑɑ mɑm wi u dobo dobo yɛ̃ru bon gɑri.
7 Yinni Gusunɔ, ɑ bu nɔɔ kɔsukuo.
Be, be bɑ sɑ̃ɑ nge gbee sinɑn kpɛmminu mi,
ɑ ben bɑɑ sɑburosu yɑkirio.
8 A de bu yɑrinɑ nge nim mɛ mu kokumɔ,
kpɑ ɑ bu twee bu ko kpɑnɔbu.
9 Bu gbio bu yɑndɑ nge sokoro,
kpɑ ɑ ku de bu sɔ̃ɔ wɑ
nge bii wìn suru kun yibɑ bɑ kɑ mɑrɑ.
10 Kɑɑ bu gurɑwɑ fuuku kɑ woo gunɑ sere bu kɑ nɛɛ,
weke te bɑ swɛ̃n koru tɑ dɔ̃ɔ wɑ tɑ swĩɑ, bɑɑ dɑ̃ɑ yɑ̀ n gbere.
11 Adɑmɑ gemgii u ko n nuku dobu mɔwɑ
ù n wɑ bɑ nùn mɔru bɑrɑ.
U koo win nɑɑsu kpɑkiɑ tɔn kɔ̃sobun yɛm sɔɔ,
12 kpɑ tɔmbu bu nɛɛ, gemgiiwɑ u koo ɑre wɑ.
Domi Gusunɔwɑ u hɑnduniɑn tɔmbu kpuro sirimɔ.