17
1 Dɑfidin kɑnɑru.
Yinni Gusunɔ, ɑ nɛn weeweenu nɔɔwɔ,
nɑ kĩwɑ ɑ mɑn gem wɛ̃.
Yinni Gusunɔ, ɑ swɑɑ tem kpĩiyɔ ɑ nɔ,
wunɛn somirɑ nɑ kĩ.
A nɛn kɑnɑru nɔɔwɔ,
nɛn gɔ̃run diyɑ tɑ wee.
2 A mɑn sirio,
ɑ yɛ̃ mɑ nɑ gem mɔ.
3 Wɔ̃kuru, ɑ nɑ nɛn mi,
ɑ wɛ̃ɛrɑ ye nɑ bwisikumɔ,
ɑ wɛ̃ɛrɑ ye nɑ gerumɔ,
ɑdɑmɑ ɑ ǹ torɑru gɑru wɑ.
4 A wɑ mɑ nɛn dɑɑ yɑ ǹ tiɑ kɑ gɑbugiɑ.
Nɑ wunɛn gɑri mɛm nɔɔwɑ.
Nɑ ǹ tɔn kɔ̃sobun yirɑ swĩi.
5 Nɑ yɔ̃rɑwɑ dim dim wunɛn swɑɑ sɔɔ.
Nɑ ǹ gɛrɑre yen min di.
6 Tɛ̃, wunɑ nɑ soku, Yinni Gusunɔ.
A mɑn wisio.
A nɛn gɑri nɔɔwɔ.
7 A mɑn wunɛn durom bɑkɑm sɔ̃ɔsio,
domi ɑ rɑ be bɑ nun nɑɑnɛ sɑ̃ɑ wɔre ben yibɛrɛbɑn nɔmɑn di.
8 A nɛn lɑɑkɑri koowo
nge mɛ tɔnu u rɑ n win nɔnin lɑɑkɑri mɔ.
A mɑn beruo
nge mɛ guɑ yɑ rɑ yen binu bere yen kɑsɑ sɔɔ.
9 Domi tɔn kɔ̃sobɑ mɑn nɔni sɔ̃ɔmɔ,
yibɛrɛbɑ bɑ mɑn sikerenɛ, bɑ kĩ bu mɑn go.
10 Bɑ nuki sosu bɑ ǹ wɔnwɔndu mɔ.
Bɑ gɑri mɔ̀ kɑ tii suɑbu.
11-12 Be wee bɑ sɑ̃ɑ nge gbee sunɔ ge gɑ yɑɑ mɑrɑ gu kɑsuku.
Bɑ nɛn yirɑ swĩi.
Bɑ mɑn nɑɑmwɛ bɑ kooro bure,
bɑ mɑn nɔni girɑri bu kɑ mɑn gɑbɑ bu surɑ.
13 Yinni Gusunɔ, ɑ seewo ɑ bu wɔri,
ɑ ben dɑm buo.
A mɑn wɔro ben nɔmɑn di.
A bu goowo kɑ wunɛn tɑkobi.
14 A ben wɑ̃ɑrun dɛ̃ɛbu kɑwo.
A de bu ben dɑɑ kɔ̃sɑ kpuron ɑre wɑ,
kpɑ yi n bu wɑ̃ɑsi sere kɑ ben bibun bibɔ.
15 Adɑmɑ nɛ, nɑ̀ n seewɑ, kon wunɛn wuswɑɑ wɑ yèn sɔ̃ nɑ dɛɛre,
kpɑ nɑ n nuku dobu yibɑ.