41
1 À n gu mɑrɑ, ɑ rɑ nuki sɑnkirewɑ.
Gɑ̀ n mɑɑ yɑrimɑ, ɑ rɑ bɛrum soorewɑ,
kpɑ ɑ wɔrumɑ ɑ̀ n gu wɑ.
2 Goo sɑri wi u koo gɑri bɑkɑru ko u gen mɔru seeyɑ.
Ǹ n mɛn nɑ, wɑrɑ u koo yɔ̃rɑ u nɛ, Yinni Gusunɔ mɑ.
3 Wɑrɑn dibɑ nɑ nɛni, kon bu kɔsiɑ.
Domi ye yɑ wɑ̃ɑ hɑnduniɑ kpuro sɔɔ yɑ sɑ̃ɑwɑ nɛgiɑ.
4 Wee nɑ mɑɑ kĩ n wure n kɑrɑku gen wɑsin kɑ̃ɑsi,
kɑ gen dɑm gɑri ko,
kɑ sere mɑɑ gen wɑsin burɑm.
5 Wɑrɑ u koo kpĩ u gen gɔnɑ potɑ.
Wɑrɑ u koo kpĩ u du gen bɑɑ sɑburosun bɑɑ sɔɔ.
6 Wɑrɑ u koo kpĩ u gen nɔɔ bɑɑyɑ.
Domi gen donnu nu bɛrum mɔ.
7 Gen birun koko wɔrukisu su sɑ̃ɑwɑ nge tɛrɛnu.
Mɑ su swɛɛnɛ mɑm mɑm.
8 Su mɑninɛ, bɑɑ woo gɑ ku rɑ kpĩ gu mɑm kurɑ min di.
9 Su sɑ̃ɑwɑ nge mɑɑbu kɑ wɔnɔ be bɑ wɑ̃ɑ bɑ bɔkɑsinɛ bɑɑtum.
Gɑ̃ɑnu sɑri ni nu koo su kɑrɑnɑ.
10 Gɑ̀ n sũɑ n dɑ n sɑ̃ɑwɑ nge dɔ̃ɔ buriyɑ yi yɑrimɔ,
kpɑ gen nɔni yi n sɑ̃ɑ nge buruku sɔ̃ɔ yɑnɑ.
11 N dɑ n sɑ̃ɑwɑ nge dɔ̃ɔ yɑri kɑ dɔ̃ɔ buriyɑ yi yɑrimɔ gen nɔɔn di.
12 Kpɑ n sɑ̃ɑre wiisu yɑrimɔ gen wɛ̃run di
nge weke te tɑ gbisimɔ dɔ̃ɔ boko sɔɔ.
13 Gen wɛ̃siɑru tɑ rɑ n sɑ̃ɑwɑ nge bɑ dɔ̃ɔ yɑbiɑmɔ,
kpɑ dɔ̃ɔ yɑrɑ yɑ n yɑrimɔ sɑɑ gen nɔɔn di.
14 Gen dɑm wɑ̃ɑwɑ gen wĩirɔ.
Be bɑ kɑ gu yinnɑ kpuro bɑ rɑ n bɛrum soore.
15 Gen gɔnɑ yɑ tɑu.
Gen wɑsin yɑɑ bɑɑsi yɑ mɑɑ sɛ̃kenɛwɑ sim sim.
Yɑ ǹ kɑrɑnɑmɔ.
16 Gen woo sɔndu tɑ bɔɔbuwɑ nge nɛɛ mɛro.
17 Gɑ̀ n seewɑ be bɑ dɑm bo, bɑ rɑ nɑndewɑ,
kpɑ bu yɑrinɑ.
18 Bɑ̀ n mɑɑ gu wɔri kɑ tɑkobi,
ǹ kun mɛ kɑ yɑɑsi kɑ sɛ̃ɛnu,
ye kpuro yɑ rɑ kowɑ kɑm.
19 Gɑ rɑ sisu gɑrisiwɑ nge yɑkɑsu.
Sii gɑndu mɑɑ nge dɑ̃ɑ te tɑ kɔ̃sɑ.
20 Bɑ̀ n ge tobɑ, gɑ ku rɑ dukɑ yɑkure.
Kpurɑntɛɛrun kperɑ rɑ n sɑ̃ɑwɑ nge yɑkɑsu gen mi.
21 Gɑ rɑ mɑɑ bokuru gɑrisiwɑ nge kɑbɑru.
Bɑ̀ n gu yɑɑsɑ kɔ̃ɔwɑ gɑ rɑ n ye yɛ̃ɛmɔwɑ.
22 Gen nukurun temɔ,
gen gɔnɑn kokosu sɑ̃ɑwɑ nge sɛ̃ɛnu.
Su sɑ̃ɑwɑ nge nɑɑ tebo ge bɑ rɑ kɑ tem kusɑnu kɔsuku.
23 Gɑ rɑ de nim wɔ̃kun nim mu n bweebweenu mɔ̀
nge weke tèn nim bɑ swɛ̃,
kpɑ mu n yɑkenu mɔ̀ nge turɑre ye bɑ yɔwɑ.
24 Mi gɑ sɑrɑ kpuro gen yirɑ yɑ rɑ sɔ̃ɔsirewɑ.
Domi nim mu rɑ burisinɛwɑ mu gɔsiɑ nge seri kpiki.
25 Hɑnduniɑ yeni sɔɔ, gɑ̃ɑnu sɑri ni nu sɑ̃ɑ gen yinni.
Gɑ ku rɑ n gɑ̃ɑnun bɛrum mɔ.
26 Gɑ rɑ yɛɛ kpuro tɑɑrewɑ bɑɑ yì n kpɑ̃.
Gɑ sɑ̃ɑwɑ yɛɛ gɔbi kpuron sunɔ.