Yoobu win kɔmiɑru wurɑ
42
1 Yoobu u Yinni Gusunɔ wisɑ u nɛɛ,
2 nɑ yɛ̃ mɑ kɑɑ kpĩ ɑ kpuro ko.
Gɑ̃ɑnu kun kpɛ̃ nu wunɛn himbɑ gɔsiɑ.
3 A geruɑ ɑ nɛɛ, nɑ derɑ tɔmbu bɑ ǹ wunɛn himbɑ tubumɔ kɑ nɛn wiirɑ gɑri.
Nɑ wurɑ. Nɑ gɑri geruɑ yi nɑ ǹ yɛ̃.
Gɑri yi, yi mɑn kpɑ̃ɑru kere.
4 A mɑn sɔ̃ɔwɑ ɑ nɛɛ,
n nun swɑɑ dɑkio kpɑ ɑ mɑn gɑri sɔ̃.
Kɑɑ mɑn gɑri bikiɑ, kpɑ n nun yi tubusiɑ.
5 Nɑ rɑɑ wunɛn gɑri nuɑ yi tɔmbɑ gerumɔ,
ɑdɑmɑ tɛ̃ nɑ nun wɑ kɑ nɔni.
6 Yen sɔ̃nɑ nɑ tii tɑɑrɛ wɛ̃
mɑ nɑ gɔ̃ru gɔsiɑ nɑ tii tuɑ kɑ torom wisi nuku sɑnkirɑnun sɔ̃.Yinni Gusunɔ u Yoobu domɑru kuɑ n kere yellu
7 Sɑnɑm mɛ Yinni Gusunɔ u kɑ Yoobu gɑri kuɑ u kpɑ, yerɑ u Elifɑsi Temɑgii sɔ̃ɔwɑ u nɛɛ, nɑ kɑ wunɛ kɑ wunɛn bɔrɔbɑ yiru ye mɔru mɔ̀ too too. Domi i ǹ nɛn gɑri geruɑ dee dee nge mɛ nɛn bɔ̃ɔ Yoobu u geruɑ. 8 Yen sɔ̃, i seewo i nɑɑ kinɛnu nɔɔbɑ yiru kɑ yɑ̃ɑ kinɛnu nɔɔbɑ yiru suɑ i kɑ dɑ nɛn bɔ̃ɔ Yoobun mi, i kɑ yɑ̃ku dɔ̃ɔ mwɑɑrɑruginu ko. Kpɑ u bɛɛ kɑnɑru kuɑ. Kon kɑnɑ te mwɑ. Kpɑ n ku mɑɑ bɛɛ kuɑ ye kon dɑɑ bɛɛ kuɑ bɛɛn wiirɑ gɑrin sɔ̃. Domi i ǹ nɛn gɑri geruɑ dee dee nge mɛ Yoobu u geruɑ.
9 Yerɑ Elifɑsi Temɑgii kɑ Bilidɑ Suɑgii kɑ Sofɑɑ Nɑɑmɑgii bɑ seewɑ bɑ dɑ bɑ kuɑ nge mɛ Yinni Gusunɔ u bu sɔ̃ɔwɑ bu ko. Mɑ Yinni Gusunɔ u Yoobun kɑnɑru mwɑ.
10 Ye u kɑnɑ te kuɑ win bɔrɔbɑn sɔ̃ u kpɑ, yerɑ Yinni Gusunɔ u nùn win yellun wɑ̃ɑru wesiɑ, u nùn ye u rɑɑ mɔn subɑ yiru wɛ̃. 11 Yoobun wɔnɔbu kɑ win mɑɑbu kɑ win sesubu kɑ win yellun bɔrɔbɑ bɑ nùn berɑm dɑ mɑ bɑ di mi kɑ wi sɑnnu. Mɑ bɑ win wɔnwɔndu wɑ, bɑ nùn nukuru yɛmiɑsiɑ nɔni swɑ̃ɑ te Yinni Gusunɔ u derɑ u wɑn sɔ̃. Yerɑ ben bɑɑwure u nùn sii geesun gobi kɑ tɑɑbu wurɑguu kɑ̃.
12 Gusunɔ u nùn domɑru kuɑ win sɑnɑm dɑ̃ɑkim mɛ sɔɔ n kere win yellun wɑ̃ɑru. Win ɑrumɑni ye u wɑ wee, yɑ̃ɑnu nɔrɔbun subɑ wɔkurɑ nnɛ (14.000) kɑ yooyoosu nɔrɔbun subɑ nɔɔbɑ tiɑ (6.000) kɑ nɑɑ wuku nɔrɔbun subɑ yiru (2.000) kɑ kɛtɛku ninu nɔrɔbu (1.000). 13 Yen biru u mɑɑ bii tɔn durɔbu nɔɔbɑ yiru mɑrɑ kɑ bii tɔn kurɔbu itɑ. 14 U win bii wɔndiɑ gbiikoo yĩsiru kɑ̃ Yemimɑ, yiruse mɑɑ Kɛsiɑ, itɑse mɑɑ Kerɛni Hɑpuku. 15 Tem mi kpuro sɔɔ, wɔndiɑ goo sɑri wi u Yoobun bii wɔndiɑ be burɑm turɑ. U bu tubi wɛ̃ nge mɛ u win bii tɔn durɔbu wɛ̃.