Gusunɔ u nɛɛ, Yoobu u wisio
40
1 Yinni Gusunɔ u mɑɑ Yoobu sɔ̃ɔwɑ u nɛɛ,
2 wunɛ wi ɑ kɑ tii yinɑmɔ
nɛ, Yinni Gusunɔ Dɑm kpurogiin wuswɑɑɔ,
kɑɑ gɑri wɑ ɑ gere?
3 Mɑ Yoobu u Yinni Gusunɔ wisɑ u nɛɛ,
4 wee nɑ ǹ sɑ̃ɑ gɑ̃ɑnu.
Mbɑ kon kpĩ n nun wisi.
Kon nɔɔ nɛnɛwɑ n mɑri.
5 Nɑ gɑri dɑbinu geruɑ kɔ,
nɑ ǹ mɑɑ gɛɛ gerumɔ.
Yoobu tɑmɑɑ u sɑ̃ɑ Gusunɔ?
6 Mɑ Yinni Gusunɔ u Yoobu wisɑ guru woo bɔkɔ gɑgun di u nɛɛ,
7 ɑ sɔɔru koowo, kpɑ ɑ yɔ̃rɑ nge tɔn durɔ wɔrugɔ.
Kon nun gɑri bikiɑ kpɑ ɑ mɑn yi tubusiɑ.
8 Yoobu, kɑɑ kpĩ ɑ mɑn sɔ̃ mɑ nɑ ǹ gem mɔ?
Kɑɑ mɑn tɑɑrɛ wɛ̃, kpɑ ɑ tii gem wɛ̃?
9 Wunɛn dɑm mu nɛ Gusunɔgim turɑ?
Wunɛn nɔɔ gɑ koo kpĩ gu nɔɔrɑ kɑ dɑm nge nɛguu?
10 Ǹ n mɛn nɑ, ɑ wunɛn yiiko kɑ wunɛn bɛɛrɛ sɔ̃ɔsio,
11 kpɑ ɑ wunɛn mɔru sɔ̃ɔsi,
ɑ be bɑ tii sue nɔni girɑri ɑ surɑ.
12 A bu nɔni mɛniɔ, kpɑ ɑ bu sekuru doke.
A kɔ̃sɑn kowobu kpeerɑsio mi bɑ wɑ̃ɑ,
13 kpɑ ɑ bu sike sɑnnu bɑ n wɑ̃ɑ gɔribun wɑ̃ɑ yerɔ,
mi bɑ ǹ bu wɑsi.
14 Sɑɑ yerɑ nɛ Gusunɔ kon nun wɔlle suɑ.
Domi wunɛn dɑm mu nun nɑsɑrɑ wɛ̃ɛmɔ.
Kperɑ
15 Kperɑ wee, ye nɑ wɑ̃ɑru wɛ̃ nge wunɛ.
Yɑkɑsɑ yɑ rɑ di nge nɑɑ.
16 Yen dɑm mu wɑ̃ɑwɑ yen gɑbu kɑ yen wɑsin yɑɑ sɔɔ.
17 Yɑ rɑ kpĩ yu yen siru bɔbiɑsie tu ko nge dɑ̃ɑ dɑmgiɑ.
Kpɑ yen sĩinu nu n sɑ̃ɑ nge ni bɑ tɑrɑ.
18 Yen kukunu sɑ̃ɑ nge sii gɑn te tɑ wem mɔ,
mɑ yen wɑsin kɑ̃ɑsi yi sɑ̃ɑ nge sii bokuru.
19 Yɑ sɑ̃ɑwɑ nɛn tɑkɑ koorɑ ye yɑ tɔmbu biti mɔ̀ n kere.
Nɑ ye donnu dokeɑ.
20 Yɑ rɑ yen dĩɑnu wɑwɑ guunɔ
mì gbeeku yɛɛ kpuro yi rɑ mɛnnɛ yi dwee.
21-22 Kpɑ yu dɑ yu kpunɑ dɑ̃ɑ kiku gɑgun sɑɑrɔ ge gɑ wuru bɑkɑsu mɔ,
ǹ kun mɛ nɑɑ yɑri sɔɔ,
ǹ kun mɛ dɑ̃ru gɑrun kɔkɔrɔ dɑru bɔ̃ɔwɔ.
23 Bɑɑ dɑɑru tɑ̀ n nim yibɑ nge Yuudɛnin dɑɑru,
yɑ ǹ dukɑ yɑkurɔ.
Bɑɑ ten nim mù n ye wukiri yɑ ko n kpĩwɑ mi sɛ̃ɛ.
24 A tɑmɑɑ kɑ dɑmɑ bɑ koo kpĩ bu ye mwɑ yɑ̀ n yɑm mɛɛrɑ?
Nge ɑ tɑmɑɑ kɑ yɑ̃ɑkororɑ bɑ koo ye mwɑ bu wɛ̃ru yɑbɑ.
Kɑrɑku
25 Kɑrɑku mɑɑ ni.
A gu kɔkɔru sɔrere gen yɑrɑɔ ɑ yɑrɑmɑ?
26 Kɑɑ kpĩ ɑ wɛ̃ɛ dɑmgii doke gen wɛ̃rɔ,
kpɑ ɑ gen bɑɑ sɑburo yɑbɑ kɑ kuurɑ?
27 Gɑ koo nun suuru kɑnɑ gu nun gɑri dori sɔ̃,
28 kpɑ gu kɑ nun ɑrukɑwɑni bɔke,
gu ko wunɛn yoo sere gu kɑ gbi?
29 Kɑɑ wurɑ ɑ kɑ gu dwee nge mɛ bɑ rɑ kɑ gunɔ dwee?
Kɑɑ wurɑ ɑ ge bɔke wunɛn wɔndiɑbɑ bu kɑ dwee?
30 Sɔrɔkɔbɑ bɑ koo wurɑ bu gu tenkubɑ dɔre,
kpɑ bu gen yɑɑ bɔɔri bu dɔrɑ?
31 Kɑɑ kpĩ ɑ gen gɔnɑn wɔllɔ sɛ̃ɛnu twee,
kpɑ ɑ gen wiru yɑɑsɑ sɔku?
32 À n nɛɛ, kɑɑ kɑ gu sɑnnɑ,
ɑ̀ n gu bɑbɑ, ɑ ǹ mɑɑ gu bɑbɑmɔ siɑ.