37
1 Nɑ̀ n yenibɑ kpuro wɑ, nɛn tororɑ rɑ kɑrewɑ
kpɑ nɑ n diirimɔ.
2 I swɑɑ dɑkio i Gusunɔn nɔɔ nɔ ge gɑ kukirimɔ nge gurɑ.
3 Gɑ nɔɔrɑ bɑɑmɑ wɔllɔ.
Mɑ guru mɑɑkinu nu bɑllimɔ hɑnduniɑn goonu nnɛ sɔɔ.
4 Guru mɑɑki nin biru, Gusunɔn nɔɔ gɑ rɑ nɔɔre kɑ dɑm
kpɑ yɑnde guru mɑɑki kpɑɑnu nu sɔ̃ɔsirɑ.
5 Ù n gbɑ̃rɑ, tɔmbu bɑ rɑ biti soorewɑ.
Gɑ̃ɑ bɑkɑnɑ u kuɑ mi, ni tɔnu kun kpɛ̃ u tubu.
6 U rɑ guru kpenu sɔ̃ u nɛɛ, nu nɛɛyɔ.
U rɑ mɑɑ gurɑn tii sɔ̃ u nɛɛ, yu nɛɛyɔ kɑ dɑm.
7 U rɑ de tɔmbu kpuro bu ben sɔmburu yɔ̃rɑsiɑ gurɑ yen sɔ̃,
kpɑ bu giɑ mɑ wiyɑ u ye kpuro mɔ̀.
8 Bɑɑ kɑ gbeeku yɛɛyɔ u rɑ dewɑ yi dɑ yi kpunɑ yin wɑ̃ɑ yerɔ.
9 Guru woo bɔkɔ gɑ rɑ nɛwɑ sɑɑ sɔ̃ɔ yɛ̃sɑn nɔm dwɑru giɑn di,
kpɑ purɑ yu nɑ sɔ̃ɔ yɛ̃sɑn nɔm geu giɑn di.
10 Yinni Gusunɔwɑ u rɑ nim wom wure,
kpɑ mu bɔbiɑ nge guru kperu.
11 Wiyɑ u rɑ de kɑkoru tɑ n wɑ̃ɑ guru wiru sɔɔ,
kpɑ u tu yɑrinɑsiɑ kɑ guru mɑɑkinu sɑnnu.
12 U rɑ tu gɔsiewɑ nge mɛ u kĩ.
Kpɑ tu ko nge mɛ u geruɑ hɑnduniɑ sɔɔ.
13 Tɑ sɑ̃ɑwɑ nge bokuru te u rɑ kɑ tɔmbu sɛɛyɑsie
ǹ kun mɛ u kɑ bu win kĩru sɔ̃ɔsi.
14 Yoobu, ɑ yenibɑ kpuro lɑɑkɑri koowo.
A Yinni Gusunɔn sɔm mɑɑmɑɑkiginu mɛɛrio ɑ wɑ.
15 A yɛ̃ nge mɛ Gusunɔ u rɑ nu dendisinɛ,
kpɑ u de guru mɑɑkinu nu bɑlli guru winu sɔɔ?
16 A yɛ̃ nge mɛ guru winu nu kɑ bwɛ̃ɛ wɔllɔ?
Wi u yenin bweseru kuɑ, win yɛ̃ru tɑ yibɑ mɑm mɑm.
17 Woo gɑ̀ n sweemɑ sɔ̃ɔ yɛ̃sɑn nɔm dwɑru giɑn di,
yɑm susurɑ rɑ nun ko, ɑ̀ n wunɛn yɑ̃nu doke.
18 Kɑɑ kpĩ ɑ wɔllu tɛriɑ nge wi,
kpɑ tɑ n dɑm mɔ nge digi ye bɑ kuɑ kɑ sisu?
19 A sun sɔ̃ɔsio ye n weenɛ su Gusunɔ sɔ̃.
Domi sɑ ǹ wɑ ye sɑ ko nùn wisi bɛsɛn yɛ̃ru sɑrirun sɔ̃.
20 Tilɑsiwɑ bu kɑ nùn sɔ̃ nɑ̀ n gɑri geruɑ?
Tilɑsiwɑ bu kɑ nùn nɔɔsiɑ ye nɑ geruɑ?
21 Wee u rɑ de yɑm mu tĩrɑ subɑru sɔɔ,
kpɑ guru winu nu n sɔ̃ɔ beruɑ.
Adɑmɑ u rɑ de woo gu se gu wɔllu dɛɛrɑsiɑ.
22 Sɑɑ ye sɔɔrɑ yɑm bururɑm mu koo nɑ sɑɑ sɔ̃ɔ yɛ̃sɑn nɔm geu giɑn di,
kpɑ mu n nùn sikerenɛ kɑ nɑnum bɑkɑm.
23 Sɑ ǹ kpɛ̃ su Dɑm kpurogii tubu.
Domi win dɑm mu kpɑ̃.
U rɑ mɑɑ kpuro ko dee dee.
U ku rɑ wi u gem mɔ dɑm dɔre.
24 Mɛyɑ u ku rɑ mɑɑ be bɑ tii mɛɛrɑ bwisigibu gɑrisi gɑ̃ɑnu.
Yen sɔ̃nɑ n weenɛ tɔmbu bu nùn nɑsiɑ.YINNI GUSUNƆ U GARI SUA