Nge mɛ Gusunɔ u rɑ kɑ tɔnu wɑ̃ɑrun swɑɑ sɔ̃ɔsi
36
1 Mɑ Elihu u kpɑm geruɑ u nɛɛ,
2 ɑ yɔ̃ro fiiko,
gɑri gɛɛ mɑɑ tie yi kon Gusunɔ geruɑ.
3 Kon nɛn yɛ̃ɛ bɑkɑru dendi
n kɑ sɔ̃ɔsi mɑ nɛn Tɑkɑ kowo u gem mɔ.
4 A nɑɑnɛ koowo mɑ nɛn gɑri kun sɑ̃ɑ weesu.
Nɑ yɛ̃ sɑ̃ɑ sɑ̃ɑ ye nɑ gerumɔ.
5 Gusunɔ u sɑ̃ɑwɑ Dɑm kpurogii.
U ku rɑ mɑɑ goo gɛm.
U dɑm mɔ kpuron wɔllɔ.
U ku rɑ win gere kɔsi.
6 U ku rɑ de tɔn kɔ̃sobu bɑ n wɑ̃ɑ.
Adɑmɑ u rɑ wɔnwɔndobu siriewɑ dee dee.
7 U ku rɑ gemgibu deri.
U rɑ bu swĩiwɑ nge sinɑmbu
kpɑ bɑ n bɛɛrɛ mɔ sere kɑ bɑɑdommɑɔ.
8 Adɑmɑ be bɑ bɔkuɑ kɑ yɔni,
bɑ wɑhɑlɑ mɔ̀ ye bɑ kuɑn sɔ̃,
9 Gusunɔ u rɑ bu sɔ̃ɔsi mɑ bɑ dɑɑ kɔ̃sɑ kuɑ,
mɑ bɑ tii sue,
10 kpɑ u bu kirɔ ko bu kɑ win gɑri nɔ,
kpɑ bu wɑ bu dɑɑ kɔ̃sɑ dukɑ suuri.
11 Bɑ̀ n gɑri yi mɛm nɔɔwɑ, mɑ bɑ tii wɛ̃,
bɑ koo ben wɑ̃ɑru diwɑ bɔri yɛndu sɔɔ,
kɑ nuku dobu sɔɔ sere kɑ ben gɔɔn tɔ̃rɔ.
12 Adɑmɑ bɑ̀ kun yi mɛm nɔɔwɛ,
bɑ koo bu gowɑ subɑru sɔɔ kɑ tɑkobi.
13 Tɔn kɔ̃sobu bɑ rɑ kɑ Gusunɔ mɔru sewɑ.
Ù n bu bɔkuɑ kɑ yɔni, bɑ ku rɑ nùn suuru kɑnɛ.
14 Bɑ koo gbiwɑ sɛkum ɑluwɑɑsiru sɔɔ,
kpɑ bu ko tiɑ kɑ dɑɑ bɛrɛtɛkɛgibu.
15 Adɑmɑ Yinni Gusunɔ u rɑ wɔnwɔndo fɑɑbɑ kowɑ ù n wɑ̃ɑ nɔni swɑ̃ɑru sɔɔ,
kpɑ u nùn kirɔ ko kɑ wɑhɑlɑ ye.
16 Yoobu, mɛyɑ u koo nun yɑrɑ wɑhɑlɑn di,
kpɑ u de ɑ n bɔri yɛndu mɔ tɑ n kpɑ̃.
Kpɑ u mɑɑ de ɑ n dĩɑ geenu yibɑ ɑ n dimɔ.
17 Adɑmɑ tɛ̃, ɑ̀ n kɑ tii yinɑmɔ,
n ǹ mɑɑ koorɔ ɑ yɑri sɛɛyɑsiɑ bin min di.
18 A ku de mɔru yu nun gɑwɑ ɑ kɑ kɔ̃sɑ ko.
A kun mɑɑ tɑmɑɑ kɑɑ Gusunɔ kɛ̃ru gɑru wɛ̃wɑ
kpɑ u ku kɑ nun sɛɛyɑsiɑ.
19 Wunɛn wurɑ, ǹ kun mɛ wunɛn ɑrumɑni gɑɑ,
ǹ kun mɛ wunɛn dɑm,
yen gɑɑ kun kpɛ̃ yu nun yɑrɑ nɔni swɑ̃ɑ ten di.
20 A ku wɔ̃ku te kĩɑ
tè sɔɔ bɑ koo tɔmbu go.
21 A n tii sɛ kpɑ ɑ ku rɑ kɔ̃sɑ ko.
Domi wɑhɑlɑ ye, yɑ nun deemɑwɑ kpɑ ɑ wɑ ɑ kɑ kɔ̃sɑ dukɑ suuri.
Gusunɔ turowɑ u yiiko mɔ kpuron wɔllɔ
22 Yinni Gusunɔ u kpɑ̃ win dɑm sɑɑbu.
Wɑrɑ u koo kpĩ u keu sɔ̃ɔsi nge wi.
23 Wɑrɑ u rɑ nùn woodɑ wɛ̃ ye u koo swĩi.
Wɑrɑ u koo kɑ̃ku u nɛɛ, kɔ̃sɑ u mɔ̀.
24 A ku duɑri ɑ win sɔmɑ wɔlle suɑ,
yè tɔmbu kpuro bɑ siɑrɑ kɑ womusu.
25 Tɔmbu bɑ ye wɑɑmɔ bɑɑ yɑ̀ n tomɑ.
26 Gusunɔ u kpɑ̃ sere goo kun kpɛ̃ u win kpɑ̃ɑ ten ɑsɑnsi gere.
Mɛyɑ mɑɑ win wɑ̃ɑrun wɔ̃ɔ gɑ ǹ gɑrirɔ.
27 U rɑ nim buri yi yi seemɔ bɑɑmɑn di mɛnnɛwɑ,
kpɑ u yi gɔsiɑ guru winu.
28 Kpɑ guru wii ni, nu de gurɑ yu nɛ,
yu tɔn wɔru so.
29 Wɑrɑ yɛ̃ nge mɛ guru winu nu kɑ sĩisinɑmɔ.
Wɑrɑ yɛ̃ nge mɛ gurɑ rɑ kɑ gbɑ̃re.
30 Yoobu, ɑ yɛ̃ mɑ Gusunɔwɑ u guru mɑɑkinu kuɑ nu kɑ nùn sikerenɛ.
Mɑ yɑm wɔ̃kurɑ wɑ̃ɑ nim wɔ̃kun sɔɔwɔ.
31 Kɑ yebɑrɑ u rɑ kɑ tɔmbu siri.
Kpɑ u mɑɑ kɑ bu dĩɑnu wɛ̃ nu n kpɑ̃.
32 U guru gbɛ̃ɛ nɛni win nɔmɑɔ,
mɑ u yi sɔ̃ɔsimɔ mi yi koo wɔri.
33 Guru gbɑ̃sukunu nu sɔ̃ɔsimɔ mɑ u wɑ̃ɑ.
Mɛyɑ yɑɑ sɑbenu nu mɑɑ yɛ̃ mɑ u wɑ̃ɑ turuku.