Gusunɔ u rɑ kɑ gɑsɔ tɔnu gɑri kowɑ wɑhɑlɑ sɔɔn di
33
1 Elihu u nɛɛ,
tɛ̃, Yoobu ɑ swɑɑ dɑkio ɑ nɛn gɑri kpuro nɔ.
2 Wee kon nɔɔ wukiɑ n gɑri gere.
3 Geeyɑ kon nun sɔ̃, n ǹ kɑ murɑfitiru.
4 Gusunɔ Dɑm kpurogiin Hundewɑ u mɑn tɑkɑ kuɑ.
Mɑ u mɑn wɑ̃ɑru wɛ̃.
5 A sɔɔru koowo mɛ kɑɑ kɑ tii yinɑ,
kpɑ ɑ mɑn wisi ɑ̀ n kɑɑ kpĩ.
6 Nɛ kɑ wunɛ sɑ sɑ̃ɑwɑ tiɑ Gusunɔn wuswɑɑɔ.
Domi temɑ u kɑ bɛsɛ kpuro mɔmɑ.
7 Ǹ n mɛn nɑ, ɑ ku nɛn bɛrum ko,
kpɑ ɑ n tɑmɑɑ nɑ kĩ n nun nɛn yiiko sɔ̃ɔsiwɑ.
8 Adɑmɑ nɑ yɑɑye ye ɑ mɑn sɔ̃ɔwɑ. A nɛɛ,
9 ɑ dɛɛrewɑ mɑm mɑm ɑ ǹ durum mɔ.
Tɑɑrɛ gɑɑ mɑɑ sɑri wunɛ sɔɔ.
10 Mɑ ɑ nɛɛ, kɑ mɛ, Gusunɔ u wunɛn torɑnu wɑɑmɔ.
Mɑ u nun gɑrisi win yibɛrɛ.
11 U ǹ derimɔ ɑ dɑ mi ɑ kĩ.
Mɑ u wunɛn kookoosu kpuro lɑɑkɑri sɑ̃ɑ.
12 Adɑmɑ nɛ, nɑ nun sɔ̃ɔmɔ mɑ ɑ ǹ gem mɔ gɑri yi sɔɔ Yoobu.
Domi Gusunɔ u tɔnu kere.
13 Mbɑn sɔ̃nɑ ɑ kɑ nùn tɑɑrɛ wɛ̃ɛmɔ ɑ mɔ̀,
u ku rɑ tɔnu wisi.
14 Gusunɔ u rɑ kɑ tɔnu gɑri kowɑ kɑ swɑɑ dɑbinu,
ɑdɑmɑ tɔnu u ku rɑ ye lɑɑkɑri ko.
15 Gɑsɔ u rɑ kɑ nùn gɑri ko dosu sɔɔ wɔ̃kuru,
ǹ kun mɛ kɑ̃siru sɔɔ sɑnɑm mɛ u kpĩ win kpin yerɔ u dò.
16 Miyɑ u rɑ nùn kure u kɑ nùn kirɔ ko.
17 Kpɑ u nùn gbɑrɑ kɔ̃sɑn di.
Kpɑ u mɑɑ nùn yɑrɑ tii suɑbun di.
18 Nge mɛyɑ u rɑ kɑ nùn yɑre gɔɔn yirɑn di,
kpɑ u kun mɑɑ gu.
19 Gɑsɔ, u rɑ mɑɑ nùn sɛɛyɑsie kɑ wɑhɑlɑ,
u de bɑrɑru gɑru tu nùn kpĩ,
win wɑsi yi n diirimɔ,
20 kpɑ u kun mɑɑ dĩɑnun mɛm kĩ,
bɑɑ kɑ ni u rɑ n kĩru bo.
21 Kpɑ u woorɑ, win kukunu nu terɑ.
22 Kpɑ ɑ deemɑ u gɔɔ turuku kuɑ.
23 Gɑsɔ Gusunɔn gɔrɑdobɑ nɔrɔbu (1.000) sɔɔ,
turo u koo se u dɑ u nùn somi,
kpɑ u nùn swɑɑ geɑ sɔ̃ɔsi ye n weenɛ u swĩi.
24 Sɑɑ ye sɔɔ, u koo tɔnu win wɔnwɔndu wɑ kpɑ u nɛɛ,
u nùn fɑɑbɑ koowo, kpɑ u ku rɑɑ gbi.
Domi u swɑɑ wɑ ye u koo kɑ nùn yɑkiɑ.
25 Kpɑ win wɑsi yi wurɑmɑ
yi ko nge sɑnɑm mɛ u sɑ̃ɑ ɑluwɑɑsi.
26 Ù n Gusunɔ kɑnɑ, u koo win kɑnɑru mwɑ.
Kpɑ u Gusunɔ sɑ̃ kɑ nuku dobu,
yèn sɔ̃ u nùn win wɑ̃ɑru wesiɑ.
27 Kpɑ u womu ko tɔmbun wuswɑɑɔ u nɛɛ,
u durum kuɑ, u gem yinɑ.
Adɑmɑ Gusunɔ kun nùn yen sɛɛyɑsiɑbu kue.
28 U win hunde wɔrɑ, u ǹ due siki wɔruɔ.
Mɑ u yɑm bururɑm wɑɑmɔ.
29 Yeni kpuron diyɑ Gusunɔ u rɑ kɑ tɔnu gɑri ko nɔn dɑbi dɑbinu,
30 u kɑ nùn gɔɔ gbɑrɑ,
kpɑ u de u n wɑ̃ɑ wɑ̃ɑru sɔɔ.
31 Tɛ̃, ɑ mɑn swɑɑ dɑkio, Yoobu.
A den mɑrio mɛ, kpɑ n mɑɑ gɑri gere.
32 À n gɑri gɛɛ mɔ ɑ kɑ mɑn wisi, ɑ mɑn wisio.
Domi nɛn kĩrɑ n kɑ nun gem wɛ̃.
33 À kun mɑɑ gɛɛ mɔ ɑ gere, ɑ mɑn swɑɑ dɑkio.
A mɑrio, kpɑ n nun bwisi kɛ̃.