Ye yɑ derɑ Elihu u gɑri kuɑ
32
1 Elifɑsi, kɑ Sofɑɑ, kɑ Bilidɑ bɑ ǹ mɑɑ Yoobu gɛɛ wisɑ yèn sɔ̃ u tii gɑrisi tɑɑrɛ sɑrirugii. 2 Adɑmɑ durɔ goo wɑ̃ɑ Rɑmun bweseru sɔɔ wi bɑ mɔ̀ Elihu. Win tundowɑ Bɑrɑkɛli, Busin yɛnugii. Wiyɑ u mɔru bɑrɑ yèn sɔ̃ Yoobu u tii gɑrisi tɑɑrɛ sɑrirugii Gusunɔn wuswɑɑɔ. 3 U mɑɑ kɑ Yoobun bɔrɔbɑ itɑ be, mɔru kuɑ yèn sɔ̃ bɑ kpɑnɑ bu Yoobu wisi dee dee, mɑ bɑ sere nùn tɑɑrɛ wɛ̃ɛmɔ. 4 N deemɑ Yoobun bɔrɔ be, bɑ Elihu bukurɑru kere. Yen sɔ̃nɑ u ginɑ sɑkɑ u ǹ kɑ Yoobu gɑri kue sɑnɑm mɛ bɔrɔ be, bɑ kɑ nùn gɑri mɔ̀. 5 Adɑmɑ ye u deemɑ bɑ ǹ mɑɑ wɑ ye bɑ koo Yoobu wisi, yerɑ u mɔru kuɑ.
6 Mɑ u gɑri suɑ u nɛɛ,
nɛ bii ɑluwɑɑsiwɑ. Bɛɛ mɑɑ i sɑ̃ɑwɑ bukurobu.
Yen sɔ̃nɑ bɛrum mɑn mwɑ
n kɑ bɛɛ nɛn bwisikunu sɔ̃.
7 Mɑ nɑ tii sɔ̃ɔwɑ nɑ nɛɛ,
durɔ tɔkɔnɑ nu ko n gɑri gerubu yɛ̃.
Niyɑ n weenɛ nu tɔmbu bwisi kɛ̃.
8 Adɑmɑ kɑ gem, nɑ wɑ mɑ Gusunɔ Dɑm kpurogiin Hundewɑ u rɑ tɔnu bwisi wɛ̃.
9 N ǹ mɔ tɔnun wɔ̃ɔn kpɑ̃ɑrɑ tɑ rɑ nùn yɛ̃ru wɛ̃.
N ǹ mɑɑ tɔkɔru tɑ rɑ nùn bwisi kɛ̃ u kɑ siri dee dee.
10 Yen sɔ̃nɑ nɑ nɛɛ, i mɑn swɑɑ dɑkio i nɔ,
kpɑ n mɑɑ gere ye nɑ bwisikɑ.
11 Domi nɑ mɑɑri sere i kɑ bɛɛn gɑri kuɑ i kpɑ.
Nɑ mɑɑ yi swɑɑ dɑki mɑm mɑm,
nɑ nuɑ kpuro bwisi yi i kɑ Yoobu siri.
12 Nɑ bɛɛ swɑɑ dɑki kɑ lɑɑkɑri,
ɑdɑmɑ nɑ wɑ bɛɛn goon gɑri kun Yoobu kɑmiɛ.
Goo kun mɑɑ kpĩɑ u nùn wisɑ dee dee.
13 Yen sɔ̃, i ku gere i nɛɛ,
i win gɑrin wɛ̃ɛ nɔɔ wɑ.
Gusunɔ turowɑ koo kpĩ u nùn siri, n ǹ mɔ tɔnu.
14 N ǹ nɛ Yoobu u kɑ gɑri kuɑ.
Ǹ n dɑɑ nɛn nɑ, ye kon nùn wisi nɛnɛmɑ.
15 Yoobu, wee bɑ nɔɔ mɑri tɛ̃,
bɑ biɑ ye bɑ koo wisi mɑ bɑ wɑ̃ɑ sekuru sɔɔ.
16 Nɑ sɑkɑ sere bɑ kɑ gɑri yi kuɑ bɑ kpɑ,
mɑ bɑ mɑri, bɑ ǹ wɑ ye bɑ koo wisi.
17 Tɛ̃, kon gɑri suɑ,
kpɑ n gere ye nɛ nɑ mɑɑ bwisikɑ.
18 Domi gɑri wɑ̃ɑ nɛn gɔ̃ruɔ yi kpɑ̃,
nɑ mɑɑ sɛnde n kɑ yi gere.
19 Wee yi gbisimɔ nɛn nukurɔ nge tɑm mɛ bɑ doke gɔnɑn bɔɔ kpɑɑru sɔɔ
mɑ tɑ kĩ tu kurɑ.
20 Tɛ̃, i de n mɑɑ gɑri gere kpɑ nɛn bwɛ̃rɑ yu kpunɑ.
Kon nɔɔ wukiɑ, kpɑ n bɑɑwure wisi.
21 Nɑ ǹ goon biru yɔ̃rɑmɔ.
Nɑ ǹ mɑɑ goo fufu mɔ̀.
22 Domi nɑ ǹ yenibɑn dɔɔnɛ mɔ.
Nɑ̀ n dɑɑ yen dɔɔnɛ mɔn nɑ,
nɛn tɑkɑ kowo u n mɑn kpeerɑsie n tɛ.