Toro u koo kpĩ u Gusunɔ somiru kɑnɑ?
27
1 Yoobu u kpɑm win gɑri gerubu toruɑ u nɛɛ,
2 nɑ bɔ̃rumɔ nɑ mɔ̀,
sere kɑ Yinni Dɑm kpurogiin wɑ̃ɑru,
wi, wi u yinɑ u mɑn nɛn gem wɛ̃,
mɑ u mɑn nuku sɑnkirɑnu sosiɑmmɛ,
3 ù n gesi derɑ nɑ wɑ̃ɑ nɑ wɛ̃siɑmɔ,
4 nɑ ǹ weesu mɔ̀.
5 Gusunɔ u mɑn bere n kɑ bɛɛ gem wɛ̃.
Sere kɑ nɛn gɔɔn tɔ̃rɔ, ko nɑ n mɔ̀wɑ nɑ dɛɛre.
6 Nɑ yɔ̃rɑriwɑ mɑ nɛn dɑɑ yɑ wɑ̃.
Nɛn gɔ̃ru gɑ ǹ mɑn tɑɑrɛ wɛ̃ɛre nɛn wɑ̃ɑrun tɔ̃ru gɑru sɔɔ.
7 Gusunɔ u de tɔn kɔ̃son kɔkɔrɔ
yu nɛn yibɛrɛbɑ deemɑ,
be, be bɑ mɑn seesimɔ mi.
8 Sɑnɑm mɛ Gusunɔ u tɔn kɔ̃son wɑ̃ɑru wunɑ,
yĩiyɔ birɑ̀ bu mɑɑ nùn tie.
9 Gusunɔ u koo nùn swɑɑ dɑki
sɑnɑm mɛ nɔni swɑ̃ɑrɑ nùn deemɑ?
10 I tɑmɑɑ u ko n win nuku dobu kɑsu Gusunɔ Dɑm kpurogiin mi?
I tɑmɑɑ u koo Gusunɔ kɑnɑ sɑɑ kpuro?
11 Kon bɛɛ Gusunɔn dɑm gɑri sɔ̃wɑ.
Nɑ ǹ bɛɛ win himbɑ beruɑmmɛ.
12 Bɛɛ kpuro i wɑ nge mɛ u sɑ̃ɑ.
Mbɑn sɔ̃nɑ i gɑri gerumɔ yi yi ǹ ɑsɑnsi mɔ.
Tɔn kɔ̃son doo nɔɔrɑ kun tɛɛmɔ
13 Wee ye Gusunɔ Dɑm kpurogii u tɔn kɔ̃so yiiye.
14 Bɑ̀ n bibu mɑrɑ bɑ dɑbi, bɑ koo gbiwɑ tɑbu sɔɔ.
Ben bibu bɑ ǹ dĩɑnu wɑsi bu di bɑ n kɑ wɑ̃ɑ.
15 Bɑrɑrɑ tɑ koo ben bwese te tɑ tie suɑ.
Ben gɔminibu bɑ ǹ kpɛ̃ bu bu swĩiyɑ.
16 Bɑɑ bɑ̀ n gobi wɑɑmɔ nge tuɑ,
mɑ bɑ yɑ̃nu gurɑmɔ nge yɑnim,
17 gemgiiwɑ u koo yɑ̃ɑ ni dendi,
kpɑ u gobi yi di.
18 Tɔn kɔ̃so ù n diru bɑnɑ tɑ ko n sɑ̃ɑwɑ nge nɑrin wɛ̃ɛ,
ǹ kun mɛ nge kuu te kɔ̃so u kuɑ.
19 U koo gbiwɑ kɑ gobigiru.
Adɑmɑ bɑ ǹ nùn sikumɔ kɑ gobi yi. U ǹ yi wɑsi gɔriɔ.
20 Nɑndɑbɑ bu koo nùn deemɑ subɑru sɔɔ nge nim mɛ mu dɑru bɔ̃ɔ sɑrɑmɔ.
Woo gunɑ yɑ koo kɑ nùn doonɑ wɔ̃kuru.
21 Sɔ̃ɔ yɑri yerun woowɑ gɑ rɑ nùn wuke sɑɑ win wɑ̃ɑ yerun di
gu kɑ dɑ sere mi n tomɑ.
22 Gusunɔ u ko n nùn tweemɔwɑ kɑ wɔnwɔndu sɑriru.
Kpɑ u dukɑ yɑkurɑ u wɑ u kɑ sɛ̃ɛ ni suuri.
23 Tɔmbu bɑ̀ n wɑ mɛsum kpɑ bu nùn yɛ̃ɛ bɑ n tɑki mɔ̀,
kpɑ bu nùn wiɑ koosi sɑɑ ye u doonɔ.