Bwisi
28
1 Yoobu u nɛɛ,
tɔmbɑ yɛ̃ mìn di sii geesu kɑ wurɑ yɑ rɑ yɑri
bu sere ye teɑ.
2 Tem diyɑ bɑ rɑ mɑɑ sisu wunɛ,
kpɑ bu sii gɑndu sɔwɑ kperun di.
3 Be bɑ sisu sɔwɑmɔ,
sere tem sɔɔwɔwɑ bɑ rɑ kɑ fitilɑ du
kpɑ bɑ n duɔ sere mi su wɑ̃ɑ yɑm wɔ̃kuru sɔɔ,
4 kpɑ bu wɔru gbe sere tem sɔɔwɔ,
bu swɑɑ wĩɑ mi, mi goo sɑri.
Bɑ ǹ kpɛ̃ bu sĩ mi.
Wɛ̃ɛyɑ bɑ rɑ n gɑsirimɔ bu kɑ du mi.
5 Tem wɔllɔwɑ dĩɑnu rɑ kpi.
Adɑmɑ mɛn sɔɔwɔ,
n sɑ̃ɑwɑ nge gɑ̃ɑnu kpuro dɔ̃ɔ mwɑɑre.
6 Tem sɔɔ miyɑ kpee gobiginu rɑ n wɑ̃ɑ.
Mi sɔɔrɑ bɑ rɑ mɑɑ wurɑ wɑ.
7 Kɑsɑ yɑ ǹ swɑɑ ye yɛ̃.
Mɛyɑ mɑɑ yɑbereku gɑ ǹ ye wɑɑre.
8 Gbee sunɔ kɑ yɛɛ yi yi tii nɑɑnɛ sɑ̃ɑ yi ǹ ye mwɑɑre.
9 Adɑmɑ tɔnu u kɑ̃kɑ u kperu wɔri u kɔsukɑ,
sere u guunun kpɛɛkpɛɛku girɑri.
10 Kpee ten nɔɔwɔrɑ u rɑ swɛɛ wunɛ,
kpɑ u gɑ̃ɑ gee ni wɑ, ni nu wɑ̃ɑ mi.
11 Ù n nim kɑmɛ sɔɔ mi, u rɑ mu swɑɑ gɑnɛwɑ,
kpɑ u kɑ dukiɑ yɑrimɑ ye yɑ beruɑ sɔɔ mi.
12 Adɑmɑ mɑnɑ tɔnu u koo kpĩ u bwisi wɑ.
Mɑnɑ yi sikɑ.
13 Tɔnu kun yin gobin geeru yɛ̃.
Domi yi ǹ wɑ̃ɑ hɑnduniɑ yeni sɔɔ.
14 Yi ǹ wɑ̃ɑ dɑɑrɔ.
Yi ǹ mɑɑ wɑ̃ɑ nim wɔ̃ku sɔɔ.
15 Bɑ ǹ kpɛ̃ bu kɑ yi wurɑ kɔsinɑ.
Bɑ ǹ mɑɑ kpɛ̃ bu yi dwe kɑ sii geesu.
16 Bɑ ǹ kpɛ̃ bu yi weesinɑ kɑ wurɑ ye yɑ wee Ofirin di,
ǹ kun mɛ kɑ kpee gobigii ni nu nɔni boogu kɑ bɛrɔ wuru mɔ.
17 Bɑ ǹ kpɛ̃ bu yi weesinɑ kɑ digi,
ǹ kun mɛ kɑ nɔrɑ ye bɑ kuɑ kɑ wurɑ,
18 kɑɑ sere gere kpee gobigii ni bɑ sokumɔ korɑi kɑ kirisitɑli?
Bwisi yi kpee gobiginu bɛɛrɛ kere.
19 Bɑ ǹ kpɛ̃ bu kɑ yi Etiopin kpee gobigii ni nu nɔni dɔm buuru mɔ weesinɑ.
Bɑ ǹ mɑɑ kpɛ̃ bu yi weesinɑ kɑ wurɑ geɑ.
20 Ǹ n mɛn nɑ, mɑn diyɑ bwisi yi wee.
Mɑnɑ yin nuurɑ wɑ̃ɑ.
21 Tɔnu kun kpɛ̃ u yi wɑ kɑ nɔni.
Gunɔ ge gɑ yɔ̃ɔwɑ gɑ ǹ kpɛ̃ gu yi wɑ.
22 Gɔɔ kɑ gɔribun wɑ̃ɑ yerɑ koo nɛɛwɑ,
yin gɑriyɑ bɑ nɔɔre tɔnɑ.
23 Gusunɔ turowɑ u bwisin swɑɑ yɛ̃.
Wiyɑ u mɑɑ yin wɑ̃ɑ yeru yɛ̃.
24 Domi wiyɑ u hɑnduniɑn goonu nnɛ kpuro wɑɑmɔ.
U mɑɑ kpuro wɑɑmɔ ye yɑ wɑ̃ɑ tem sɔɔ.
25 Sɑnɑm mɛ u wom bunum mɛɛrɑ
mɑ u nim kpɑ̃ɑru mɛɛrɑ,
26 kɑ sere swɛɛ yi gurɑ koo swĩi yu kɑ nɛ,
kɑ mɑɑ swɛɛ yi guru mɑɑkinu kɑ guru gbɑ̃sukubu koo swĩi,
27 yerɑ u bwisi yi wɑ.
Mɑ u yin ɑsɑnsi wɛ̃ɛrɑ u yi.
28 Sɑɑ yerɑ u tɔmbu sɔ̃ɔwɑ u nɛɛ,
bu nùn nɑsio, yerɑ yɑ sɑ̃ɑ bwisi.
Wi u mɑɑ kɔ̃sɑ gɛɛrɑri, wiyɑ u bwisi mɔ.