Yoobu nɛɛ, Bilidɑn somiru tɑ ǹ ɑrufɑɑni mɔ
26
1 Yoobu u Bilidɑ wisɑ u nɛɛ,
2 Bilidɑ, wunɛn wisibu bu ǹ dɑm sɑrirugii somimɔ.
Wunɛn dɑm kɛ̃ru tɑ ǹ ɑrufɑɑni gɑɑ mɔ.
3 Annɑ ɑ bwisi kɛ̃ru wɑ te ɑ wi u kun bwisi mɔ kɛ̃mɔ.
Wunɛn bwisi yi, yi ǹ goo somimɔ.
4 Wɑrɑ ɑ gɑri yini sɔ̃ɔmɔ.
Wɑrɑ u nun gɑri yini gerusiɑ.
Gusunɔ u dɑm mɔ gɑ̃ɑnu kpuron wɔllɔ
5 Be bɑ gu bɑ wɑ̃ɑ sere nim wɔ̃kun tem sɔɔwɔ,
bɑ diirimɔ.
6 Domi Gusunɔ u be kpuro wɑɑmɔ.
Gɑ̃ɑnu kun nùn gɑnuɑ gɔribun wɑ̃ɑ yeru mi.
7 Wiyɑ u sɔ̃ɔ yɛ̃sɑn nɔm geu doke wom dirum sɔɔ.
Mɑ u tem bwɛ̃ kɑm dirum sɔɔ.
8 Mɑ u nim bɑnisi guru winu sɔɔ.
Kɑ mɛ, guru wii ni,
nu ku rɑ gɛ̃ɛre nim bunum sɔ̃.
9 Wiyɑ u rɑ de guru winu nu win sinɑ gɔnɑ wukiri.
10 Mɑ u bubenu kuɑ nim wɔ̃kun wɔllɔ,
mi yɑm bururɑm kɑ yɑm wɔ̃kurɑ kɑrɑnɛ.
11 Gusunɔ ù n gbɑ̃rɑ,
wɔllun gbere yɑ rɑ diiriwɑ,
kpɑ yɑ n wɑ̃ɑ biti sɔɔ.
12 Kɑ win dɑmɑ u rɑ nim wɔ̃kun nim kɔsuku.
Kpɑ u kɑ win bwisi yɑɑ gɔbɑ ye bɑ mɔ̀ Rɑhɑbu kɑmiɑ.
13 Ù n wom wurɑ, wɔllu kpuro tɑ rɑ dɛɛrewɑ nge bɑ kurɑ.
Kɑ win nɔmɑ u rɑ wɑɑ ye yɑ dukɑ mɔ sɔkiri.
14 Adɑmɑ yeni kpuro yɑ sɑ̃ɑwɑ win kookoo piiminu.
Nin wɔkinun fiikowɑ sɑ rɑ n nɔɔmɔ.
Ǹ n mɛn nɑ, wɑrɑ u koo kpĩ u win dɑm ɑsɑnsi tubu ù n gbɑ̃rɑ nge gurɑ.