Kɔ̃sɑ ye yɑ koo tɔn kɔ̃so deemɑ
20
1 Sofɑɑ Nɑɑmɑgii u Yoobu sɔ̃ɔwɑ u nɛɛ,
2 wee nɛn bwisikunu derɑ nɑ burisinɛ.
Yen sɔ̃nɑ nɑ sɛnde n kɑ nun wisi.
3 Nɑ wunɛn gerusibu nuɑ, bi bu mɑn duɑ too.
Adɑmɑ nɛn bwisi koo de n nun wisi.
4 Sɑɑ mìn di bɑ tɔnu tɑkɑ kuɑ,
5 ɑ ǹ yɛ̃ mɑ kɔ̃sɑn kowon nɑsɑrɑ ku rɑ tɛ?
Mɛyɑ mɑɑ win nuku dobu kun tɛɛmɔ.
6 Bɑɑ ù n kpɑ̃ u wɔllu bɑbɑmɔ,
ǹ kun mɛ u guru winu dɛkɑmɔ,
7 u koo kɑm kowɑ nge swɑɑ swĩi bi tɔnu u kuɑ.
Be bɑ rɑɑ nùn wɑɑmɔ, bɑ koo nɛɛ, mɑnɑ u wɑ̃ɑ.
8 Bɑ koo nùn duɑriwɑ nge dosu.
U koo doonɑwɑ nge wɔ̃kurun kɑ̃siru.
9 Be bɑ rɑɑ nùn wɑɑmɔ, bɑ ǹ mɑɑ nùn wɑsi.
Mi u rɑɑ wɑ̃ɑ bɑ ǹ mɑɑ nùn wɑsi mi.
10 Sɑ̃ɑrobu bɑ koo win bibu wɔri.
Nge mɛyɑ u koo kɑ bu wesiɑ ye u rɑɑ bu mwɑɑri kɑ dɑm.
11 U dɑm mɔ, mɑ u sɑ̃ɑ nge ɑluwɑɑsi.
Adɑmɑ u koo kɑ ye kpuro kpunɑwɑ sikirɔ.
12 Kɔ̃sɑ rɑ n dowɑ win nɔɔ sɔɔ,
kpɑ u n ye bɛri win yɑrɑɔ,
13 yɑ n girɑri sere win dɑroɔ.
U ku rɑ n kĩ u ye deri.
14 Adɑmɑ yɑ koo de win dĩɑnu nu sosiɑ win nukurɔ,
kpɑ nu gɔsiɑ nge wɑɑ dɛ̃ɛ.
15 Gɑbun dukiɑ ye u mwɛɛ, u koo ye siɑ.
Gusunɔwɑ u koo ye yɑrɑ win nukurun di.
16 Ye u koo nɔ, yɑ ko n sɑ̃ɑwɑ nge wɑɑ dɛ̃ɛ,
kpɑ yu nùn go.
17 U kun tɑmɑɑ tim kɑ bom
mu koo nùn kokuɑ nge nim torɑ.
18 U koo win dukiɑ wesiɑ ye u wɑ mi.
U ǹ mɑɑ yen ɑrufɑɑni dimɔ.
19 Domi u sɑ̃ɑrobu dɑm dɔre.
Mɑ u ben yɛnusu mwɛɛrɑ, u ǹ wiguu bɑnɛ.
20 Win bɔsɔnu ku rɑ yibu.
Adɑmɑ bɑɑ ye u kĩru bo, u ǹ kpɛ̃ u ye tii yiiyɑ.
21 Gɑ̃ɑnu sɑri ni u ǹ tii koosi.
Adɑmɑ win dukiɑ yɑ ǹ tɛɛmɔ.
22 Bɑɑ ù n ye mɔ yɑ kpɑ̃, u ko n nuki sɑnkirewɑ.
Sɑ̃ɑru tɑ koo nùn wɔriwɑ.
23 Wee sɑnɑm mɛ u win nukuru yibiɑmɔ,
Gusunɔ u koo nùn wɔri kɑ mɔru bɑkɑ.
Kpɑ u de sɛ̃ɛnu nu nùn wisi nge gurɑ.
24 Bɑɑ ù n tɑbu yɑ̃ɑ sisuginu dukɑ suurimɔ,
bɑ koo nùn twee kɑ sii gɑndun tɛndu.
25 Bɑɑ ù n sɛ̃u teu wunɑ win wɑsin di,
ǹ kun mɛ ù n yɑɑsɑ wukɑ win woo sɔndun di,
gɔɔn bɛrum koo nùn surɑ.
26 Asɔrɔ yɑ koo win dukiɑ deemɑ.
Kpɑ dɔ̃ɔ wi tɔnun bii kun sɔ̃ruɑ u nùn mwɑ,
wi kɑ win yɑ̃nu.
27 Wɔllu tɑ koo win durum sɔ̃ɔsi,
kpɑ tem mu nùn seesi.
28 Win dirun ɑrumɑni kpuro koo kɑm ko
Yinni Gusunɔn mɔrun tɔ̃ru sɔɔ.
29 Yeniwɑ Yinni Gusunɔ u tɔn kɔ̃sobu yiiye.
Yerɑ yɑ bu mɑrɑ siɑ.