Yoobu u Sofɑɑ wisɑ u nɛɛ,
tɔn kɔ̃sobun tii bɑ rɑ n doo nɔɔru mɔ
21
1 Yoobu u nɛɛ,
2 i nɛn gɑri nɔɔwɔ.
Ì n wurɑ i mɑn swɑɑ dɑki, i mɑn nukuru yɛmiɑsiɑwɑ mi.
3 I de n gɑri gere.
Nɑ̀ n gɑri geruɑ nɑ kpɑ, ko i kpĩ i mɑn yɛ̃ɛ.
4 Tɔnuwɑ nɑ weeweenu koosimɔ?
Nge mbɑn sɔ̃nɑ kon tɛmɑnɑ.
5 I mɑn mɛɛrio, kpɑ biti yu bɛɛ mwɑ
kpɑ i bɛɛn nɔsu kɔre.
6 Nɑ̀ n nɛn wɑ̃ɑru bwisikɑ,
nɑ rɑ nɑndewɑ, nɛn wɑsi yi n diirimɔ.
7 Mbɑn sɔ̃nɑ Gusunɔ u rɑ de tɔn kɔ̃so u n wɑ̃ɑ,
kpɑ u n dɑm mɔ sere kɑ win tɔkɔrɔ.
8 U rɑ bibu mɑ kpɑ be, bu mɑɑ se bu mɑ.
Kpɑ u n be kpuro mɛɛrɑ bɑ n kuurɑmɔ win nɔni sɔɔ.
9 Bɔri yɛndɑ wɑ̃ɑ ben yɛnusɔ, bɑ ǹ bɛrum mɔ.
Gusunɔ kun mɑɑ bu sɛɛyɑsiɑmɔ pɑi.
10 Sɑɑ kpuro, ben kɛtɛ kinɛru tɑ̀ n ben nɛɛ yɔɔwɑ yi rɑ mɑwɑ.
Yi ku rɑ nukuru yɑri.
11 Bɑ rɑ ben bibu deri bɑ n duki mɔ̀ nge yɑ̃ɑnu,
kpɑ bɑ n dweebu mɔ̀,
12 bɑ n bɑrɑ kpɑ̃nu kɑ mɔrɔkunu soomɔ, bɑ n womusu mɔ̀,
kpɑ bɑ n nuku dobu mɔ̀, bɑ n guunu soomɔ.
13 Bɑ rɑ ben wɑ̃ɑru diwɑ nuku dobu sɔɔ,
kpɑ bu gbi subɑru sɔɔ.
14 Wee bɑ rɑ rɑɑ yellu Gusunɔ sɔ̃ bu nɛɛ,
ɑ gɛɛro min di, sɑ ǹ kĩ su wunɛn swɛɛ giɑ.
15 Wɑrɑ rɑ n Gusunɔ Dɑm kpurogii
su kɑ sere nùn yoru diiyɑ.
Arufɑɑni yerɑ̀ sɑ kon mɔ sɑ̀ n nùn kɑnɑmɔ.
16 Tɔn ben bweseru, bɑ ǹ doo nɔɔru mɔ ro?
Adɑmɑ nɛ, nɑ ǹ tɔn kɔ̃sobun bwisi kɛ̃ru kĩ.
17 Kɑ mɛ, ɑ rɑ wɑ mi tɔn kɔ̃sobun yɑm bururɑm mu gbimɔ?
A rɑ wɑ bɑ nɔni sɔ̃ɔre?
Gusunɔ u rɑ bu sɛɛyɑsie win mɔrun sɔ̃?
18 A rɑ wɑ bɑ sɑ̃ɑ nge yɑkɑsu,
ǹ kun mɛ nge doo sɑkosu si woo gɑ kɑ doonɑ?
19 Bɛɛ i gerumɔ i mɔ̀,
tɔn ben bibun bweserɑ Gusunɔ u rɑ sɛɛyɑsie.
Adɑmɑ nɛ, nɑ nɛɛ, ben tiiwɑ n weenɛ u sɛɛyɑsiɑ,
kpɑ bu giɑ mɑ beyɑ bɑ torɑ,
20 kpɑ ben tii bu ben kɑm kobu wɑ.
Nge mɛyɑ bɑ koo kɑ Gusunɔn mɔru dendɑ bu wɑ.
21 Domi bɑ̀ n gu bɑ kpɑ,
ben bɑɑye kɑ ye yɑ koo ben bibu deemɑ.
22 Sɑ ko kpĩ su Gusunɔ keu sɔ̃ɔsi,
wi, wi u sɑ̃ɑ win gɔrɑdobɑn siri kowo?
23-24 Gɑbun wɑ̃ɑrɑ rɑ dorewɑ, bɑ n wɑ̃ɑ bɔri yɛndu sɔɔ.
Kpɑ bɑ n wɑsi bwɑ̃ɑ do, bɑ n dɑm mɔ nge ɑluwɑɑsi
sere bu dɑ bu kɑ gbi.
25 Adɑmɑ gɑbu bɑ rɑ gbiwɑ wɑhɑlɑ sɔɔ,
bɑ kun doo nɔɔru wɑ bɑɑ fiiko.
26 Be kpurowɑ bɑ koo gbi, kpɑ bu ko kɔkɔnun dĩɑnu.
27 I bɛɛn tii lɑɑkɑri ko,
nɑ bɛɛn bwisikunu yɛ̃ kɑ kɔ̃sɑ ye i mɑn mɑnimɔ.
28 Domi i nɛɛ, mɑnɑ tɔn bokon yɛnu gɑ wɑ̃ɑ,
gè sɔɔ tɔn kɔ̃sobɑ wɑ̃ɑ.
29 Adɑmɑ i ǹ be bɑ sɑrɔ swɑɑɔ bikiɑre?
I kĩ i sikiwɑ ye bɑ bɛɛ sɔ̃ɔwɑ tɔn kɔ̃son sɔ̃?
30 Wɑhɑlɑ yɑ̀ n tɔn kɔ̃so deemɑ u rɑ yɑriwɑ ye sɔɔn di.
Bɑɑ Gusunɔ ù n kɑ nùn mɔru kuɑ,
u rɑ kisirewɑ ye sɔɔn di.
31 Ǹ n mɛn nɑ, wɑrɑ u koo mɑɑ nùn gerusi.
Wɑrɑ u koo nùn win kɔ̃sɑ kɔsie.
32 Domi ù n gu, siki wɔruɔrɑ bɑ kɑ nùn dɔɔ.
Kpɑ bɑ n siki te kɔ̃su.
33 Tɔn dɑbirɑ tɑ koo win goru swĩi bu kɑ dɑ siku yerɔ.
Kpɑ u kpin yee burɑru wɑ temɔ.
34 Ǹ n mɛn nɑ, nuku yɛmiɑ birɑ̀ i mɑn kuɑ.
Bɛɛn ye i mɑn wisɑ mi kpuro,
yɑ ǹ sɑ̃ɑ dee dee. Weesɑ i mɔ̀.