Yinɑ ye yɑ tɔn kɔ̃so mɑrɑ
18
1 Bilidɑ Suɑgii u Yoobu wisɑ u nɛɛ,
2 sere dommɑ kɑɑ gɑri yini sɑɑrinu kpe.
A den mɑrio kpɑ su mɑɑ gere.
3 Mbɑn sɔ̃nɑ ɑ sun mɛɛrɑ gɑri bɑkɑsu.
Mbɑn sɔ̃nɑ ɑ sun mɛɛrɑ nge yɑɑ sɑberu.
4 Wunɛ Yoobu, wunɛn mɔruwɑ yɑ nun wɑhɑlɑ mɔ̀.
A tɑmɑɑ yɑ koo de tɔmbu bu yɑrinɑ kpɑ wuu gu ko bɑnsu,
kpɑ kpenu nu doonɑ nin ɑyerun di?
5 A n yɛ̃ mɑ tɔn kɔ̃son yɑm bururɑmɑ mu koo gbi.
Mɛn dɔ̃ɔ yɑri kun mɑɑ bɑllimɔ.
6 Yɑm bururɑm mu koo gɔsiɑ yɑm wɔ̃kuru win wɑ̃ɑ yerɔ.
Domi u koo gbi nge fitilɑ.
7 U ǹ mɑɑ sĩimɔ kɑ toro sindu.
Win tiin bwisi koo nùn surɑ.
8 Domi u koo dɑ yinɑ giɑ,
kpɑ win nɑɑsu su yen wɛ̃ɛ wuronu wɔri.
9 Yinɑ koo nùn mwɑ nɑɑ tokurɔ,
kpɑ yen wɛ̃ɛ yi nùn tɛ̃ke.
10 Bɑ nùn tɑɑ bɛrie temɔ, win swɑɑ sɔɔ.
11 N wee nɔni swɑ̃ɑrɑ nùn mɑrɑ tɑ kɑ sikerenɛ.
Mɑ tɑ nùn swĩi birun di.
12 Gɔ̃ɔrɑ nùn wɔri, tɑ win dɑm kpɑ.
Mɑ sɑ̃ɑrɑ nùn deemɑ.
13 Tɑ koo win wɑsin gɔnɑ di beri berikɑn di.
Kpɑ bɑrɑ bɑkɑru tu nùn mwɑ.
14 Bɑ koo nùn wunɑ win wɑ̃ɑ yerun di,
tè sɔɔ u rɑɑ dɑm mɔ.
Kpɑ bu kɑ nùn dɑ gɔɔn sinɑ kpɑɑ bɑkɑrɔ.
15 Wigibɑ koo yɑrinɑ.
Win ɑrumɑnin tii yɑ koo kɑm ko.
Kpɑ sɔ̃ɔ bisu su win yɛnu dɔ̃ɔ mɛni.
16 Tɔn kɔ̃so wi, u ko n sɑ̃ɑwɑ nge dɑ̃ɑ.
Win gbini yi koo gberɑ temɔ.
Kpɑ bu win kɑ̃ɑsi bɔɔri wɔllɔ.
17 Bɑ koo win gɑri duɑri hɑnduniɑ sɔɔ.
Bɑ ǹ mɑɑ win yĩsiru yɑɑyɑmɔ.
18 Domi bɑ nùn yɑrɑ yɑm bururɑm di,
bɑ sure yɑm wɔ̃kuru sɔɔ.
Mɑ bɑ nùn girɑ hɑnduniɑn di.
19 Win bii goo kun nùn bibu mɑruɑmmɛ.
Domi win yɛnugibu kpuro bɑ koo gbi.
20 Tɔn be bɑ wɑ̃ɑ tɛ̃ bɑ koo bɛrum soorɑ.
Kpɑ be bɑ koo mɑrurɑ win biru
bu biti soorɑ win kɑm koo bin sɔ̃.
21 Nge mɛyɑ tɔn kɔ̃sobu kɑ be bɑ ǹ Gusunɔ yɛ̃n wɑ̃ɑ yeru tɑ ko n sɑ̃ɑ.