Yoobu kun mɑɑ yĩiyɔbu mɔ
17
1 Yoobu u nɛɛ,
nɑ wɛ̃siɑmɔ kɑ wɑhɑlɑ, nɛn wɑ̃ɑrɑ kpeeyɔ.
Siki wɔru gɑ mɑn mɑrɑ.
2 Tɔn yɑɑko kowobu bɑ mɑn kooro bure.
Bɑ mɑn nɔɔ kuurimɔ beri berikɑ.
3 Yinni Gusunɔ, ɑ de wunɛn tii ɑ mɑn mɔru bɑrɑ.
Mɑ n kun mɔ wunɛ, wɑrɑ u koo mɑn sɑnnɑ.
4 A ben bwisi wunɑ.
A ku de bu nɑsɑrɑ wɑ.
5 Bɑ sɑ̃ɑwɑ nge tɔnu wi mɔn teni tɑ kɑ yɑ̃,
te tɑ nɛɛ, u win kpɑɑsibu dim sokɑ,
mɑ win bibu bɑ kɑ gɔ̃ɔru sɔ̃.
6 Bɑ mɑn womusu doke,
bɑ mɑn yɑ̃ɑtɑm siemɔ.
7 Nɛn nɔni yi ǹ mɑɑ do, nuku sɑnkirɑnun sɔ̃.
Mɑ nɛn wɑsi yi dɑm dwiiyɑ, yi doonɔ nge sɑɑru.
8 Gemgibu bɑ biti soore nɛn wɑhɑlɑ yenin sɔ̃.
Tɑɑrɛ sɑrirugibu bɑ koo tɔn kɔ̃sobu seesi.
9 Wi u sɑ̃ɑ gemgii u koo yɔ̃rɑwɑ dim dim win swɑɑ sɔɔ.
Kpɑ wi u dɛɛre, u tii dɑm kɛ̃ u sosi.
10 Adɑmɑ bɛɛ nɛn kpɑɑsibu kpuro,
i wurɑmɑ i mɑɑ gɑri sɑɑri nɛn wuswɑɑɔ.
Kɑ mɛ, nɑ ǹ goo wɑsi bɛɛ sɔɔ wi u bwisi mɔ.
11 Nɛn wɑ̃ɑru tɑ kpɑ.
Wee himbɑ ye nɑ rɑɑ sɑ̃ɑ ye kpuro yɑ kɑm kuɑ.
12 Nɛn kpɑɑsibɑ tɑmɑɑ wɔ̃kurɑ sɑ̃ɑwɑ sɔ̃ɔ sɔɔ.
Sɔ̃ɔ ù n duɔ, kpɑ bu nɛɛ, yɑm sɑ̃rɑmɑwɑ.
13 Gɔribun wɑ̃ɑ yerɑ nɑ mɑrɑ tu ko nɛn wɑ̃ɑ yeru.
Yɑm wɔ̃kuru sɔɔrɑ kon nɛn kpin yeru yi.
14 Kon siki wɔru sɔ̃ n nɛɛ,
geyɑ gɑ sɑ̃ɑ nɛn tundo.
Kpɑ n mɑɑ kɔkɔnu sɔ̃ n nɛɛ,
niyɑ nu sɑ̃ɑ nɛn mɛro kɑ nɛn sesubu.
15 Mɑnɑ nɑ mɑɑ yĩiyɔbu mɔ.
Wɑrɑ u koo kpĩ u bu wɑ.
16 Bɑ koo sɑrɑ gɔribun wɑ̃ɑ yerɔ,
kpɑ su dɑ tuɑ sɔɔ sɑnnu.