Yoobun seedɑgii wɑ̃ɑ wɔllɔ
16
1 Yoobu u Elifɑsi wisɑ u nɛɛ,
2 nɑ gɑri yin bweseru nɔɔre nɔn dɑbinu.
Bɛɛ, i sɑ̃ɑwɑ nuku yɛmiɑsio be bɑ nɛn wɑhɑlɑ sosimɔ.
3 Dommɑ kɑɑ wunɛn gɑri sɑɑri kɑmgii nini kpe.
Mbɑn sɔ̃nɑ ɑ kɑ mɑn sikirinɑmɔ.
4 Ì n dɑɑ wɑ̃ɑ nɛn ɑyerɔ,
kpɑ nɑ n mɑɑ wɑ̃ɑ bɛɛgirɔ,
kon bɛɛ gɑri sɑɑrisi n wii gimɑnu koosi.
5 Nɛn gɑri yi koo bɛɛ dɑm kɛ̃,
kpɑ n bɛɛ nukuru yɛmiɑsiɑ kɑ nɛn gɑri yi.
6 Nɑ̀ n gɑri mɔ̀, nɛn wɑhɑlɑ yɑ ǹ kpeemɔ.
Nɑ̀ n mɑɑ mɑɑri, yɑ ǹ doonɔ.
7 Wee tɛ̃, Gusunɔ u derɑ nɑ dɑm dwiiyɑ.
Mɑ u nɛn yɛnun yɑ̃nu kpuro gurɑ.
8 Nɑ woorɑ, nɛn gɔnɑ gɑwɑre.
Yɑ sɔ̃ɔsimɔ mɑ nɑ torɑ.
9 Gusunɔ u kuɑ nɛn yibɛrɛ,
u mɑɑ mɑn gire kɑ mɔru u nɔɔ dɔnnɛ.
Mɑ u mɑn nɔni girɑri u kɑsu u nɛn wɑsi kɑsuku nge gbeeku yɑɑ.
10 U derɑ tɔmbɑ mɑn yɑɑ kɑsikimɔ kɑ ben gɑri sɑɑrinu.
Bɑ mɑn wɔmmɔ, bɑ mɑn bɑɑri soomɔ.
Be kpurowɑ bɑ mɑn nɑɑ swĩi.
11 Gusunɔ u mɑn be bɑ ǹ win bɛɛrɛ yɛ̃ nɔmu sɔndiɑ.
U mɑn tɔn kɔ̃sobu nɔmu bɛriɑ.
12 Nɑ rɑɑ wɑ̃ɑ bɔri yɛndu sɔɔ mɑ u mɑn burisinɑ.
U mɑn nɛnuɑ birun di, mɑ u mɑn kɔsukɑ.
U mɑn kuɑ nge tũburu te u tweemɔ.
13 Win sɛ̃ɛnu mɑn kooro bure.
U nɛn gɑbu swii yɑburɑ kɑ wɔnwɔndu sɑriru.
Mɑ u nɛn yɛ̃sɔ kɔrɑ u yɑri temɔ.
14 U mɑn wɔrimɑ nge tɑbu durɔ.
Mɑ u mɑn soomɔ u mɛɛrɑ mɔ̀.
15 Nɑ sɑɑki deewɑ,
mɑ nɑ nɛn wiru tuɑ wisi nuku sɑnkirɑnun sɔ̃.
16 Nɑ wuri kuɑ sere nɛn nɔni swɛ̃rɑ,
mɑ nɑ gɔɔ nɔnu terɑ.
17 N ǹ mɔ nɑ kɔ̃sɑ gɑɑ kuɑ.
Nɛn kɑnɑru tɑ rɑ n mɑɑ dɛɛrewɑ bɑɑdommɑ.
18 Wunɛ tem, ɑ ku nɛn yɛm bere.
A de nɛn kuuki yi nɔɔrɑ bɑɑmɑ kpuro.
19 Domi nɑ yɛ̃ kɑm kɑm mɑ nɑ seedɑgii mɔ wɔllɔ.
U wɑ̃ɑ mi, u kɑ mɑn yinɑmɔ.
20 Nɛn kpɑɑsibu bɑ mɑn yɑɑkoru mɔ̀.
Adɑmɑ Yinni Gusunɔwɑ nɑ kɑnɑmɔ kɑ swĩi.
21 Nɛn seedɑgii wi, u sun sirio nɛ kɑ Gusunɔ
nge mɛ bɑ rɑ tɔnu kɑ win beruse sirie hɑnduniɑ sɔɔ.
22 Domi nɛn wɑ̃ɑrun tɔ̃nu nu kpeemɑ.
Mɑ nɑ dɔɔ kɑ swɑɑ yèn min di bɑ ku rɑ mɑɑ wurɑmɛ.