Elifɑsi u Yoobu wisɑ u nɛɛ,
tɔn kɔ̃so kun wɑhɑlɑ biɑmɔ
15
1 Elifɑsi Temɑgii u Yoobu wisɑ u nɛɛ,
2 wi u bwisi mɔ u koo tɔnu wisi kɑ gɑri yi yi ǹ ɑrufɑɑni mɔ?
U ko n gɑri yɑrɑmɔ nge woo?
3 Wee gɑri yi ɑ geruɑ ɑ kɑ tii yinɑ mi, yi ǹ sɑ̃ɑ gɑ̃ɑnu.
Gɑri yi ɑ sɑɑrɑ mini kpuro sɔɔ,
sɑri yi yi koo tɔnu somi.
4 Wunɛ, ɑ mɑm Gusunɔn nɑsiɑru tɛɛsimɔwɑ,
mɑ ɑ win bɛɛrɛ yɛ̃ru kpeerɑsiɑmɔ.
5 Wunɛn kom kɔ̃sumɑ mu sɔ̃ɔsirɑmɔ wunɛn nɔɔn di.
Mɑ ɑ gɑri gerumɔ kɑ bwisi.
6 Wunɛn nɔɔn gɑriyɑ yi nun tɑɑrɛ wɛ̃ɛmɔ, n ǹ mɔ nɛ.
Gɑri yi ɑ geruɑ mi kpuro,
yiyɑ yi wunɛn torɑnu sɔ̃ɔsimɔ.
7 Wunɑ bɑ gbiɑ bɑ tɑkɑ kuɑ hɑnduniɑ sɔɔ?
Wunɑ ɑ gbiɑ ɑ wɑ̃ɑ bɑ sere gungunu kuɑ?
8 A Gusunɔn gɑri ɑsirigii swɑɑ dɑki?
A win bwisi mwɑ kpuro, ɑ yi wunɛn tiin sɔ̃?
9 Mbɑ ɑ yɛ̃ ye bɛsɛn tii sɑ ǹ yɛ̃.
Yɛ̃ɛ terɑ̀ ɑ mɔ te bɛsɛn tii sɑ ǹ mɔ.
10 Bɛsɛn suunu sɔɔ, tɔmbɑ wɑ̃ɑ
be bɑ seri bururɑ bɑ tɔkɔnu kuɑ n kere wunɛn tundo.
11 A bɛsɛn gɑri yi sɑ nun sɔ̃ɔwɑ kɑ lɑɑkɑri mɛɛrɑwɑ gɑ̃ɑ piiminu,
yìn min di Gusunɔ u nun nukuru yɛmiɑsiɑmɔ?
12 Mɑnɑ wunɛn bwisikunu kɑ nun dɔɔ.
Mbɑ wunɛn nɔni gɔsikiɑ ninin tubusiɑnu.
13 Gɑri yi ɑ sɑɑrimɔ mini, Gusunɔwɑ ɑ kɑ mɔru mɔ̀.
14 Tɔnu u koo kpĩ u n dɛɛre?
Wi bɑ mɑrɑ, u koo kpĩ u n yibɑ Gusunɔn wuswɑɑɔ?
15 Gusunɔ ù kun win gɔrɑdobɑ nɑɑnɛ kue,
mɑ u ǹ wɔllu mɛɛrɑ tɑ dɛɛre,
16 wunɛ tɔnu ɑmɔnɑ kɑɑ kɑ kpĩ ɑ n dɛɛre win wuswɑɑɔ,
wunɛ wi ɑ rɑ kɔ̃sɑ ko kiri kiri nge mɛ bɑ rɑ nim nɔ.
17 Tɛ̃, Yoobu, ɑ mɑn swɑɑ dɑkio kpɑ n nun gɑri sɔ̃.
Kon nun sɔ̃wɑ ye nɑ wɑ.
18 Sɔ̃ɔsi te bwisigibu bɑ sɔ̃ɔsi,
bɑ tu giɑwɑ ben sikɑdobɑn min di.
19 Be tɔnɑwɑ Gusunɔ u rɑɑ tem mɛ wɛ̃,
sɔɔ goo rɑɑ mɑɑ sɑri be sɔɔ.
20 Adɑmɑ tɔn kɔ̃so u ko n wɑ̃ɑwɑ nɔni swɑ̃ɑru sɔɔ
win wɑ̃ɑrun tɔ̃ru kpuro sɔɔ.
21 Kpɑ u n gbɑ̃sukunu nɔɔmɔ ni nu koo nùn bɛrum mwɑ.
Wi u koo nùn kɑm koosiɑ, u koo nùn wɔri subɑru sɔɔ.
22 Tɔn kɔ̃so wi, u ku rɑ n yĩiyɔ u yɑm wɔ̃kuru dukɑ suuri.
Domi tɑkobi rɑ n nùn mɑrɑwɑ.
23 U rɑ n sirenɛwɑ bɑɑmɑ, u n kɑsu ye u koo di.
U yɛ̃ kɔ mɑ yɑm wɔ̃kurɑ nùn mɑrɑ.
24 Mɑ u nɑnde wɑhɑlɑ kɑ nɔni swɑ̃ɑrun sɔ̃,
ye yɑ nùn wɔriɔ nge sinɑ bokon tɑbu kowobu
be bɑ tɑbun sɔɔru kpɑ.
25 Domi u Gusunɔ seesi.
U Dɑm kpurogii nɔɔ kuurimɔ.
26 U kɑ̃kɑ u Gusunɔ tɑbu wɔri,
win tɛrɛrun sinum sɔ̃.
27 Win wuswɑɑ bɑllimɔ.
Mɑ win gɑ̃ɑnu nu yɑɑ tɑɑsinɛ.
28 U wɑ̃ɑ wuu si bɑ kɔsukɑ sɔɔ,
sìn diɑ bɑ deri, mɑ yɑ wɔrumɑm dɔɔ.
29 U ǹ gobi mɔ. Win dukiɑ kun mɑɑ kuurɑmɔ.
U ǹ mɑɑ yĩsiru yɑrimɔ win temɔ.
30 U ǹ kpɛ̃ u gɔɔn tɔ̃ru dukɑ suuri.
Win bweseru kpuro tɑ koo dɔ̃ɔ mwɑɑrɑwɑ.
Kpɑ Gusunɔ u nùn wom wure u go.
31 Ù n kɔ̃sɑ nɑɑnɛ sɑ̃ɑ u tii nɔni wɔ̃kuɑwɑ mi.
Domi kɔ̃sɑ yen ɑreyɑ u koo wɑ.
32 Are yi, yi koo nɑwɑ u sere gbi.
Win bwese kɛrɑ kun mɑɑ seemɔ,
nge dɑ̃ɑ kɑ̃ɑsɑ ye yɑ ǹ mɑɑ kpɑrɑmɔ.
33 U ko n sɑ̃ɑwɑ nge resɛm yèn bii birenu bɑ wɔkɑ,
ǹ kun mɛ nge olifin dɑ̃ɑ tèn wɛ̃su bɑ dɛrɑ.
34 Tɔn kɔ̃so u ǹ bweseru wɑsi.
Dɔ̃ɔ u koo wi u nɔm birɑn kɛ̃nu mwɑɑmɔn yɛnu wɔri.
35 Wi u kɔ̃sɑ bwisikɑ, kɔ̃sɑ u koo ko.
Domi bwisi kɔ̃si yiyɑ yi rɑ n wɑ̃ɑ win nukurɔ.
Kpɑ yi n nùn nɔni wɔ̃kuɑ.