Tɔnun wɑ̃ɑrɑ sɑ̃ɑwɑ wɔnwɔndu
14
1 Yoobu u nɛɛ,
tɔnu wi bɑ gesi mɑrɑ, win wɑ̃ɑrɑ ku rɑ n dɛ̃u.
Mɛyɑ tɑ rɑ n mɑɑ nɔni swɑ̃ɑru yibɑ.
2 U rɑ sewɑ nge dɑ̃ɑ wɛ̃su, kpɑ bu nùn burɑ.
U rɑ doonɛwɑ nge sɑɑru.
3 Tɔnu wiyɑ ɑ mɛɛrɑ,
mɑ ɑ nùn siribu sokɑ?
4 Wɑrɑ u koo kpĩ u gɑ̃ɑ kɔ̃sunun di gɑ̃ɑ dɛɛrɑnu yɑrɑ.
Goo sɑri.
5 À n tɔnun wɑ̃ɑrun tɔ̃ru yi ɑ ten suru gɑrɑ,
u ǹ mɑɑ sɑrɑmɔ mɛ.
6 Ǹ n mɛn nɑ, ɑ ku mɑɑ nùn nɔni girɑri,
ɑdɑmɑ ɑ de u wɛ̃rɑ,
kpɑ u win sɔmburu ko, u win kɔsiɑru mwɑ kɑ nuku dobu.
7 Dɑ̃ru tɑ rɑ n yĩiyɔbu mɔ
mɑ tɑ koo se bɑ̀ n tu burɑ.
Domi tɑ koo kpɑrɑ.
8 Ten gbini yì n mɑɑ tɔkɔ kuɑ,
mɑ ten korɑ wɔrumɑ tɑ gu,
9 ten gbinɑ gɑɑ rɑ mɑɑ kpɑrewɑ yɑ̀ n nim wɑ
kpɑ yu kpii pɔturɑ ko.
10 Adɑmɑ tɔnu u rɑ gbiwɑ, kpɑ u kun mɑɑ wɑ̃ɑ.
Ù n gu, mɑnɑ u rɑ n wɑ̃ɑ.
11 Dɑɑ burerun nim mu rɑ gbere.
Dɑɑ bɑkɑnun nim mu rɑ mɑɑ kpe.
12 Nge mɛyɑ tɔnu u rɑ kpunɛ u kun mɑɑ seewe.
U ǹ mɑɑ dom yɑndɑmɔ
sere wɔllu tu kɑ kpe.
13 Gusunɔ, nɑ kĩ ɑ mɑn bere gɔribun wɑ̃ɑ yerɔ,
nɑ n kukuɑ mi, sere wunɛn mɔru yu kɑ sure,
kpɑ nɑ n wɑ̃ɑ mi sere dɔmɑ te kɑɑ mɑn yɑɑyɑ.
14 Tɔnu ù n koo rɑɑ se sɑnɑm mɛ u gu,
nɑ kon yĩiyɔbu mɔ nɛn wɑhɑlɑ yeni sɔɔ
sere nɛn wɑ̃ɑru tu kɑ kɔsi.
15 Sɑɑ ye sɔɔ, Gusunɔ,
ɑ̀ n nɛn bɛkɛ bɑrɔ,
ɑ̀ n mɑn soku,
nɛ wi nɑ sɑ̃ɑ wunɛn tɑkɑ koorɑ, kon nun wurɑri.
16 Wee tɛ̃ ɑ mɑn swĩi mi nɑ nɑɑsu wukɑ kpuro.
Adɑmɑ sɑɑ gɑɑ sisi yè sɔɔ ɑ ǹ mɑɑ nɛn durum gɑrisimɔ.
17 Kɑɑ nɛn torɑnu doke sɑɑki sɔɔ ɑ bɔke.
Kpɑ ɑ mɑn nɛn durum kpuro wɔkɑ.
18 Guunu koo wɔruku nu kɑm ko.
Kpɑ kpenu nu swɛnyɑ mi nu rɑɑ wɑ̃ɑn di.
19 Nim mu koo kpenu kɔsuku,
kpɑ mu mɑɑ kɑ tem kusɑnu doonɑ.
Nge mɛyɑ ɑ rɑ tɔnun yĩiyɔbu kɑm koosie win wɑ̃ɑru sɔɔ.
20 Kpɑ ɑ nùn nɔni swɑ̃ɑ dɑbinu kpɛ̃ɛ.
À n deemɑ u ǹ mɑɑ sɑ̃ɑ nge yellu,
kpɑ ɑ nùn girɑ u doonɑ.
21 Bɑɑ win bibu bɑ̀ n yĩsiru yɑrɑ,
win tii u ǹ mɑɑ kpɛ̃ u n yɛ̃.
Mɛyɑ bɑ̀ n mɑɑ wɑ̃ɑ sekuru sɔɔ,
u ǹ kpɛ̃ u n yɛ̃.
22 Win wɑhɑlɑ tɔnɑwɑ yɑ koo nùn nɔni sɔ̃.
Wi turowɑ u ko n nuki sɑnkire win gɔ̃ruɔ.