5
1 Yoobu, ɑ kuuki koowo, goo ù n koo re nun wisi.
Nge Gusunɔn gɔrɑdo wɑrɑ kɑɑ soku kpɑ u nɑ u nun wurɑri.
2 Gɑri bɔkɔ u rɑ gbiwɑ win mɔrun sɔ̃.
Bwisi sɑrirugii u rɑ gbiwɑ win nisinun sɔ̃.
3 Nɑ gɑri bɔkɔ wɑ u kuurɑ.
Mɑ nɑ wɑ win wɑ̃ɑ yerɑ wɔriki.
4 Mɑ win bibɑ fɑɑbɑn swɑɑ deri.
Goo sɑri wi u koo bu wɔrɑ siri yerɔ.
5 Tɔn tukobɑ koo win dĩɑ ni u gɑ̃ kɑtɑ ko bu gurɑ,
bɑɑ kɑ ni u kɑrɑ koosi kɑ sɑ̃ki.
Kpɑ be bɑ win dukiɑn binɛ mɔ bu ye suɑ bu kɑ doonɑ.
6 Wɑhɑlɑ ku rɑ yɑri sɑɑ tuɑn di.
Mɛyɑ nɔni swɑ̃ɑrɑ ku rɑ mɑɑ kpi sɑɑ tem di.
7 Adɑmɑ wi bɑ mɑrɑ kpuro u koo wɑhɑlɑ kowɑ,
nge mɛ bɑ̀ n dɔ̃ɔ wure, dɔ̃ɔ buri yi rɑ yɔ̃.
8 Adɑmɑ nɛ Elifɑsi, ǹ n nɛn sɔ̃n nɑ, Gusunɔwɑ kon somiru kɑnɑ.
Kpɑ n nùn nɛn wɑhɑlɑ kpuro sɔ̃.
9 U rɑ gɑ̃ɑ bɑkɑnu kowɑ ni tɔnu kun kpɛ̃ u giɑ.
U rɑ mɑɑmɑɑki dɑbinu ko.
10 U rɑ de gurɑ yu nɛ tem sɔɔ,
kpɑ gbeɑ yu nim wɑ.
11 U rɑ be bɑ tii kɑwe wɔlle sue,
kpɑ u be bɑ nuki sɑnkire yɑrɑ ben nuku sɑnkirɑrun di.
12 U rɑ be bɑ bwisi kɔ̃si mɔn himbɑ kɑm koosie,
kpɑ bu ku mɑɑ kpĩ bu ye yibiɑ.
13 U rɑ dewɑ bwisigibun tiin bwisi yi bu yinɑ mwɑ,
kpɑ ben wesiɑnɔ gu ko kɑm.
14 Ben mi, sɔ̃ɔ sɔɔ gbɑ̃ɑrɑ yɑ rɑ n bu sɑ̃ɑwɛwɑ yɑm wɔ̃kuru,
kpɑ bɑ n bɑbi.
15 Adɑmɑ Gusunɔ u rɑ dɑm sɑrirugii gɑnɛ ben tɑbu yɑ̃nun di,
kpɑ u nùn wɔrɑ ben nɔmɑn di.
16 Nge mɛyɑ u rɑ dɑm sɑrirugii wi yĩiyɔbu wɛ̃,
kpɑ u durumgiin nɔɔ kɔre.
17 Domɑrugiiwɑ wi Gusunɔ Dɑm kpurogii u sɛɛyɑsiɑmɔ.
Yen sɔ̃, Yoobu, ɑ ku yinɑ ù n nun sɛɛyɑsiɑmɔ.
18 Domi wiyɑ u rɑ tɔnu mɛɛrɑ ko, kpɑ u yɛ̃ron bosu nɔɔri.
Wiyɑ u rɑ tɔnu kɔsuku, kpɑ u nùn bɛkiɑ.
19 Nɔn dɑbinu u koo nun yɑrɑ nuku sɑnkirɑrun di,
kpɑ kɔ̃sɑ gɑɑ yu ku mɑɑ nun deemɑ.
20 Gɔ̃ɔru tɑ̀ n duɑ tem sɔɔ, u koo nun gɔɔ gbɑrɑri,
kpɑ u nun fɑɑbɑ ko tɑbu sɔɔ.
21 U koo nun bɔ̃ri gbɑrɑ.
Sɑnɑm mɛ yibɛrɛbɑ bɑ koo tem kɑm koosiɑ, u koo nun wɔrɑ.
22 Kpɑ ɑ n yɛ̃ɛmɔ gɔ̃ɔrun sɑɑ sɔɔ, kɑ sɑnɑm mɛ bɑ tem kɑm koosiɑmɔ.
A ǹ kɑɑ n mɑɑ yɑɑ gɔbɑ gɑɑn bɛrum mɔ.
23 A ǹ mɑɑ ɑsɔrɔ wɑsi wunɛn gberɔ.
Domi bɑ ǹ tu kpenu suremɔ.
Yɛɛ gɔbi kun mɑɑ duɔ mi.
24 Kɑɑ n bɔri yɛndu mɔwɑ wunɛn yɛnuɔ.
Kpɑ wunɛn sɑbenun gɔ̃ɔ gɑ n yibɑ bɑɑdommɑ.
25 Mɛyɑ mɑɑ wunɛn bibun bweseru tɑ koo kpɛ̃ɑ
kpɑ tu kɔwɑrɑ nge yɑkɑ bii.
26 Tɔkɔru sɔɔrɑ kɑɑ gbi
nge mɛ bɑ rɑ dobi gɛ̃ yen sɑɑ yɑ̀ n turɑ.
27 Gɑ̃ɑ niniwɑ sɑ giɑ bɛsɛn wɑ̃ɑru sɔɔ.
Nu mɑɑ sɑ̃ɑwɑ gem.
Yen sɔ̃, ɑ nu bwisikuo, kpɑ ɑ nu mwɑ wunɛn tiin sɔ̃.