Yoobu u Elifɑsi wisɑ
6
1 Yoobu u Elifɑsi wisɑ u nɛɛ,
2 bɑ̀ n nɛn nɔni swɑ̃ɑru
kɑ nɛn wɑhɑlɑ kpuro kilo sɔndi,
3 yɑ ko n nim wɔ̃kun yɑni sɛɛri bunum kere.
Yen sɔ̃nɑ nɑ gɑri mɔ̀ nge wiiro.
4 Domi Dɑm kpurogii u mɑn yɑburɑ kɑ sɛ̃ɛnu.
Mɑ nin dɛ̃ɛ nɛn wɑsi duuri.
Mɑ u mɑn gɑ̃ɑ nɑnumginu kpɑre nge tɑbu kowo.
5 Kɛtɛku gbeeku gɑ rɑ swĩ
gɑ̀ n yɑkɑ bekusu wɑ gɑ dimɔ?
Kɛtɛ yɑ rɑ swĩ yɑ̀ n yɑkɑsu wɑ yɑ dimɔ?
6 Bɑ koo kpĩ bu dĩɑnu di ni nu mɑɑri sɔ̃ɔ sɔ̃ɔ nu ǹ bɔru mɔ?
Goo sɛ̃ɛrun kpikum mu rɑ n do?
7 Nɑ ku rɑ dĩɑ nin bweseru kɑ̃.
Nge mɛyɑ nɑ wɑhɑlɑ ye nɑ mɔ̀ mini tusɑ.
8 Gusunɔ u nɛn kɑnɑru mɔɔ,
kpɑ u mɑn kuɑ ye nɛn gɔ̃ru gɑ kĩ.
9 U den win nɔmu dɛmiɔ u mɑn mwɑ,
u munku u dɑkurɑ.
10 Sɑɑ ye sɔɔrɑ kon nuku dobu ko nɛn wɑhɑlɑ bɑkɑ yeni sɔɔ.
Kpɑ nɛn nukuru tu yɛmiɑ.
Nɑ yɛ̃ mɑ Yinni Gusunɔ u dɛɛre,
nɑ ǹ mɑɑ win woodɑ gɑɑ yinɛ.
11 Mbɑ ko nɑ n mɑɑ yĩiyɔ sɑnɑm mɛ nɑ ǹ dɑm mɔ.
Mbɑ nɑ mɑɑ mɑrɑ, domi nɑ yɛ̃ mɑ nɑ guwɑ mi kɔ.
12 Nɑ dɑm mɔwɑ nge kperu?
Nɛn wɑsi yi sɑ̃ɑwɑ nge sii gɑndu?
13 Aɑwo, nɑ sɑ̃ɑwɑ dɑm sɑrirugii.
Goo mɑɑ sɑri wi u koo mɑn fɑɑbɑ ko.
14 N weenɛwɑ wi u nɔni sɔ̃ɔre u durom wɑ win bɔrɔn mi,
bɑɑ u kun Dɑm kpurogii nɑsie.
15 Adɑmɑ wee, bɛɛ nɛn bɔrɔbɑ i mɑn nuki sɑnkɑ nge dɑɑ te tɑ nim gberɑ.
16 Purɑn sɑɑ, kpɑ tɑ n nim yibumɔ bɑɑmɑn di mɛ mu dɛɛre.
17 Yɑm susurun sɑɑ, kpɑ sɔ̃ɔ u tu gberɑsiɑ.
18-20 Nim nɔru gɑ̀ n tenkubɑ mɔ̀,
be bɑ wee sɑɑ Temɑ kɑ Sɑbɑn di, yerɑ bɑ rɑ gɛre mi.
Domi bɑ tu nɑɑnɛ sɑ̃ɑ.
Adɑmɑ bɑ̀ n turɑ mi, ben gɔmɑ rɑ dwiiyewɑ,
kpɑ bu yɑɑyɑɑre ko bu kɔ̃ɔrɑ, bu gbi gbɑburɔ.
21 I sɑ̃ɑwɑ nge dɑɑ te.
I nɛn weeweenu nɔɔmɔ, mɑ i bɛrum soore.
22 Nɑ bɛɛ bikiɑre n nɛɛ, i mɑn kɛ̃ru kɛ̃ɛmɑ bɛɛn ɑrumɑnin di,
23 n wɑ n kɑ yɑri yibɛrɛn nɔmun di?
N kun mɛ i kɑ mɑn yɑkiɑ tɔn kɔ̃so goon nɔmɑn di?
24 I mɑn sɔ̃ɔsio mi nɑ torɑ, kpɑ n mɑri.
25 Tɔnu u koo gem wurɑ.
Adɑmɑ ye i mɑn gerusimɔ mi, mɑnɑ yen ɑsɑnsi wɑ̃ɑ.
26 I kĩwɑ i nɛn gɑri gɔburu wɑ, i yi mɛɛri kɑm,
kpɑ i mɑn tɑɑrɛ wɛ̃, nɛ wi nɑ ǹ mɑɑ gɑ̃ɑnu yĩiyɔ?
27 Bɛɛ, i ko kpĩ i gobeku tɛtɛ toosi,
kpɑ i mɑm bɛɛn bɔrɔ dɔrɑ.
28 Tɛ̃, nɑ bɛɛ kɑnɑmɔ, i mɑn mɛɛrimɑ.
Kon bɛɛ weesu kuɑwɑ bɑtumɑ sɔɔ?
29 I suuru koowo, i de i kun sɑ̃ɑ murɑfitibɑ fɑ!
I de i nɛn dɛɛrɑru wɑ.
30 Gɑri kɔ̃si yi rɑ n wɑ̃ɑ nɛn nɔɔwɔ?
I tɑmɑɑ nɑ ku rɑ geɑ kɑ kɔ̃sɑ wunɑnɛ?