Akɑsi u kuɑ Yudɑbɑn sinɑ boko
(I mɑɑ mɛɛrio Bɑndun Gɑri II, 28:1-27)
16
1 Pekɑ, Remɑliɑn biin bɑndun wɔ̃ɔ wɔkurɑ nɔɔbuse sɔɔrɑ Akɑsi, Yotɑmun bii u bɑndu di. 2 Akɑsi wi, u mɔwɑ wɔ̃ɔ yɛndu sɑnɑm mɛ u bɑn te di. Mɑ u kuɑ wɔ̃ɔ wɔkurɑ nɔɔbu kɑ tiɑ bɑndu sɔɔ Yerusɑlɛmuɔ. Adɑmɑ kɔ̃sɑ u kuɑ Yinni Gusunɔn wuswɑɑɔ. U ǹ kue nge win sikɑdo Dɑfidi. 3 Isirelibɑn sinɑmbun yirɑ u swĩi sere u mɑm derɑ bɑ kɑ win bii yɑ̃kuru kuɑ bɑ wɔ̃ɔwɑ nge mɛ bwese tukunu nu rɑ ko ni Yinni Gusunɔ u nɛɛ bu kpeerɑsio. 4 Mɛyɑ bɑ rɑ mɑɑ bũu yɑ̃kuru ko kpɑ bu turɑre dɔ̃ɔ doke gungunu wɔllɔ kɑ guunu wɔllɔ kɑ sere mɑɑ dɑ̃ɑ kubenɔ.
5 Yerɑ sɔ̃ɔ teeru Resini, Sirin sinɑ boko kɑ Pekɑ Remɑliɑn bii Isirelibɑn sinɑ boko bɑ seewɑ bɑ Akɑsi tɑbu wɔri, mɑ bɑ Yerusɑlɛmu tɑrusi. Adɑmɑ bɑ kpɑnɑ bu nùn kɑmiɑ. 6 Sɑɑ ye sɔɔrɑ Resini u Elɑti mwɑ Yudɑbɑn nɔmɑn di, mɑ u bu girɑ min di. U derɑ Edɔmubɑ bɑ nɑ Elɑti mi, sere kɑ gisɔn gisɔ.
7 Yerɑ Akɑsi u Tigilɑti Pilesɛɛ Asirin sinɑ boko sɔmɔ gɔriɑ u nɛɛ, nɛnɑ Akɑsi, wunɛn bɔ̃ɔ, ɑ nɑ ɑ mɑn somi, Sirin sinɑ boko kɑ Isirelibɑn sinɑ bokon sɔ̃ be bɑ mɑn tɑbu wɔrimɑ. 8 Mɑ Akɑsi u sii geesu suɑ kɑ wurɑ ye yɑ wɑ̃ɑ Yinni Gusunɔn sɑ̃ɑ yerɔ, kɑ sinɑmbun ɑrumɑni beru yerɔ. Mɑ u ye kpuro gurɑ u Asirin sinɑ boko wɛ̃. 9 Sɑɑ ye sɔɔrɑ Asirin sinɑ boko wi, u Akɑsin gɑri yi wurɑ. Mɑ u dɑ u Dɑmɑsi wɔri u mwɑ u gen tɔmbu yoru mwɛɛrɑ u kɑ dɑ Kiriɔ. Mɑ u ben sinɑ boko Resini wi mwɑ u go.
10 Ye Akɑsin tii u dɑ Dɑmɑsiɔ u kɑ Tigilɑti Pilesɛɛ yinnɑ mi, yerɑ u bũu turɑru gɑru wɑ mi, mɑ u ten dɛ̃ɛbu kɑ ten yɑsum kɑ ten gunum yĩirɑ u yoruɑ ye yɑ sɑ̃ɑ ten sɑriɑ kpuro gesi. Mɑ u ye yɑ̃ku kowo Uri mɔrisiɑ u nɛɛ, u nùn ten bweseru kuo. 11 Mɑ yɑ̃ku kowo wi, u bũu turɑ ten weenɑsiru kuɑ nge mɛ Akɑsi u nùn yoruɑ u ko. U tu kuɑwɑ Akɑsi u sere gɔsirɑmɑ sɑɑ Dɑmɑsin di. 12 Ye Akɑsi u gɔsirɑmɑ Dɑmɑsi min di, u bũu turɑ te wɑ. 13 Mɑ u susi u yɑ̃ku dɔ̃ɔ mwɑɑrɑrugiru kuɑ kɑ ni bɑ rɑ ko kɑ tɑm kɑ som kɑ sere mɑɑ siɑrɑbun yɑ̃kunu. Mɑ u ten yɑɑ yɛm wisi bũu turɑ ten wɔllɔ. 14 Yɑ̃ku yee te bɑ kuɑ kɑ sii gɑndu Yinni Gusunɔn sɔ̃ tɑ wɑ̃ɑ Yinni Gusunɔn sɑ̃ɑ yerun kɔnnɔ kɑ yɑ̃ku yee ten bɑɑ sɔɔ. Yerɑ Akɑsi u Yinni Gusunɔn yɑ̃ku yee te swɛnyɑsiɑ u tu yi kpɑɑ ten biruɔ sɔ̃ɔ yɛ̃sɑn nɔm geu giɑ. 15 Mɑ sinɑ boko Akɑsi u yɑ̃ku kowo wi sɔ̃ɔwɑ u nɛɛ, sɑɑ tɛ̃n di, ɑ de ɑ n dɑ bururun yɑ̃ku dɔ̃ɔ mwɑɑrɑrugiru ko kɑ yokɑn yɑ̃ku te bɑ rɑ ko kɑ som yɑ̃ku yee kpɑɑ ten mi, kɑ nɛ sinɑ bokon yɑ̃ku dɔ̃ɔ mwɑɑrɑrugiru kɑ yɑ̃ku ni bɑ rɑ ko kɑ som kɑ tɑm kɑ sere mɑɑ yɑ̃ku ni tɔmbɑ kɑ nɑɑmɔ. Kpɑ ɑ n dɑ yɑ̃ku ni bɑ kɑ nɑ kpuro gesin yɛm wisi ten wɔllɔ. Adɑmɑ nɛn tii ko nɑ n dɑ bikiɑru ko Yinni Gusunɔn yɑ̃ku yee te bɑ kuɑ kɑ sii gɑndun mi.
16 Mɑ yɑ̃ku kowo Uri, u wurɑ ye sinɑ boko Akɑsi u geruɑ kpuro. 17 Akɑsi u boo sii gɑndugii sin sɔwɑritii kɔsukɑ mɑ u boo sin tii suɑ. Mɑ u boo bɔkɔ ge swɛnyɑ nɛɛ yin wɔllun di, yi bɑ kuɑ kɑ sii gɑndu. Mɑ u gu sɔndi turɑru gɑrun wɔllɔ te bɑ bɑnɑ kɑ kpenu. 18 Asirin sinɑ bokon nuku dobun sɔ̃, u mɑɑ kɔnnɔ gèn min di bɑ rɑ kɑ du Yinni Gusunɔn sɑ̃ɑ yerɔ tɔ̃ɔ wɛ̃rɑrugiru sɔɔ kɔsɑ, kɑ sinɑmbun duu yeruguu.