Bɑ Akɑbun bweseru go
10
1 Akɑbu u bibu mɔwɑ wɑtɑ kɑ wɔkuru, bɑ wɑ̃ɑ Sɑmɑriɔ. Mɑ Yehu u Yisirɛɛlin sinɑmbu tireru yoruɑ kɑ yen guro gurobu kɑ sere be bɑ Akɑbun bii be nɛni u nɛɛ, 2 bɛɛ be i sinɑ bokon bibu kɔ̃su kɑ win tɑbu kɛkɛ yi dumi gɑwe, kɑ win dumi kɑ wuu gbɑ̃rɑruguu kɑ win tɑbu yɑ̃nu, tire teni tɑ̀ n bɛɛn nɔmɑ duɑ, ye ko i ko wee, 3 i mɛɛrio win bii be sɔɔ, wi n weenɛ u win bɑɑn gɔnɑ kɔsire ko kpɑ i nùn ko sunɔ. Yen biru kpɑ i nùn sɑnnɑ.
4 Ye bɑ tire te wɑ, mɑ bɑ bɛrum soorɑ gem gem bɑ nɛɛ, wee sinɑmbu yiru bɑ ǹ kpĩɑ bɑ yɔ̃re wunɛ Yehun wuswɑɑɔ. Kɑɑ sere gere bɛsɛ? 5 Sinɑ kpɑɑrun sɔm kowobun wirugii kɑ wuun wirugibu kɑ guro gurobu, kɑ be bɑ sinɑ bii be nɛni, bɑ mɛnnɑ bɑ Yehu bii gɔriɑ bɑ nɛɛ, sɑ ko n sɑ̃ɑwɑ wunɛn bwɑ̃ɑbu. Ye ɑ mɑɑ geruɑ kpuro yerɑ sɑ ko ko. Sɑ ǹ goo bɑndu wɛ̃ɛmɔ.
6 Yerɑ Yehu u mɑɑ bu tireru yoruɑ u nɛɛ, ì n sɑ̃ɑn nɑ nɛgibu, mɑ i ko i nɛn gere wurɑ, i mɑn bii ben winu bɔɔriɑmɑ Yisirɛɛliɔ siɑ ɑmɑdɑɑre.
N deemɑ tem min wirugibɑ bɑ sinɑ bokon bibu wɑtɑ kɑ wɔku te nɛni.
7 Ye bɑ tire te wɑ, yerɑ bɑ sinɑ bibu wɑtɑ kɑ wɔku te mwɛɛrɑ, bɑ ben winu burɑ. Mɑ bɑ nu gure birenu sɔɔ bɑ kɑ Yehu dɑɑwɑ Yisirɛɛliɔ. 8 Mɑ win sɔmɔ u dɑ u nùn sɔ̃ɔwɑ u nɛɛ, bɑ kɑ sinɑ bii ben wii ni nɑ. Yerɑ u nɛɛ, bu nu bɔnu koowo subɑ yiru kpɑ bu nu yi kɔnnɔwɔ sere sisiru bururu. 9 Ye u yɑrɑ sisiru bururu, mɑ u dɑ u yɔ̃rɑ tɔmbu kpuron wuswɑɑɔ u nɛɛ, bɛɛ i sɑ̃ɑwɑ gemgibu. Adɑmɑ nɛ, nɑ nɛn yinni sinɑ boko Yorɑmu seesi mɑ nɑ nùn go. Beni mɑɑ ni, wɑrɑ u be go. 10 I n yɛ̃ mɑ Yinni Gusunɔn gɑri yi u geruɑ Akɑbun bweserun sɔ̃, yen gɑɑ kun kɑm wɔrimɔ domi u win nɔɔ mwɛɛru yibiɑmɔwɑ te u kuɑ sɑɑ win sɔmɔ Elin nɔɔn di.
11 Mɑ Yehu u tɔn be bɑ tie Akɑbun yɛnuɔ kpuro go Yisirɛɛliɔ, sɑɑ be bɑ sɑ̃ɑ wirugibu kɑ win kpɑɑsibu kɑ win bũu yɑ̃ku kowobu, bɑɑ ben turo u ǹ deri.
Yehu u Akɑsiɑn tɔmbu go
(I mɑɑ mɛɛrio Bɑndun Gɑri II, 22:8)
12 Yen biru Yehu u seewɑ u dɑ Sɑmɑriɔ mi yɑ̃ɑ kpɑrobu bɑ rɑ ben yɑ̃ɑnu sɔri bu kɑ nin sɑnsu bɔɔri. 13 Yerɑ u kɑ Akɑsiɑ Yudɑbɑn sinɑ bokon mɛro bisibu gɑbu yinnɑ. Mɑ u bu bikiɑ u nɛɛ berɑ̀ i sɑ̃ɑ.
Bɑ nùn wisɑ bɑ nɛɛ, sɑ sɑ̃ɑwɑ Akɑsiɑn mɛro bisibu. Sɑ nɑwɑ su kɑ Yesɑbɛlin bibu tɔbiri kɑ sinɑ bokon bii be bɑ tie Yisirɛɛliɔ.
14 Yerɑ Yehu u win bwɑ̃ɑbu sɔ̃ɔwɑ u nɛɛ, i bu mɔɔ wɑsiru.
Mɑ bɑ bu mwɛɛrɑ wɑsiru bɑ sɑkirɑ. Bɑɑ ben turo bɑ ǹ deri. Yen biru bɑ ben gonu sure dɔkɔ kpiriru gɑru sɔɔ. Be bɑ go mi, ben geerɑ sɑ̃ɑwɑ tɔnu weeru kɑ yiru.
Yehu u mɑɑ
Akɑbun tɔn be bɑ tie go
15 Ye Yehu u doonɑ min di, yerɑ u kɑ Yonɑdɑbu, Rekɑbun bii yinnɑ u wee. Mɑ u nùn tɔburɑ. Yen biru u nɛɛ, wunɛn gɔ̃ru gɑ dɛɛre nge mɛ nɛguu gɑ sɑ̃ɑ wunɛn sɔ̃?
Mɑ Yonɑdɑbu u nùn wisɑ u nɛɛ, oo.
Mɑ Yehu u nɛɛ, ǹ n mɛn nɑ, ɑ mɑn nɔmɑ wɛ̃ɛmɑ.
Mɑ u nùn nɔmɑ wɛ̃. Yerɑ Yehu u nùn yɔɔsiɑ win tɑbu kɛkɛ sɔɔ, u yɔ̃rɑ win bɔkuɔ. 16 Mɑ u nɛɛ, su dɑ sɑnnu kpɑ ɑ wɑ sɔmbu te nɑ mɔ̀ kɑ kĩru Yinni Gusunɔn sɔ̃.
17 Ye bɑ turɑ Sɑmɑriɔ, mɑ Yehu u Akɑbun tɔn be bɑ tie kpuro go. U bu kpeerɑsiɑ nge mɛ Yinni Gusunɔ u geruɑ sɑɑ win sɔmɔ Elin nɔɔn di.
Yehu u bũu wi bɑ mɔ̀ Bɑɑlin
sɑ̃ɔbu kpuro go
18 Yen biru Yehu u tɔmbu kpuro mɛnnɑ u bu sɔ̃ɔwɑ u nɛɛ, Akɑbu u bũu wi bɑ mɔ̀ Bɑɑli sɑ̃wɑ fiiko. Adɑmɑ nɛ, kon nùn sɑ̃wɑ gem gem. 19 Yen sɔ̃ tɛ̃, i mɑn Bɑɑlin yɑ̃ku kowobu mɛnnɑmɑ kɑ ben sɔrobu kɑ ben bwɑ̃ɑbu be bɑ rɑ gesi Bɑɑli ye sɑ̃ kpuro. I ku rɑ de bɑɑ ben tɔn turo u sinɑ. Domi nɑ kĩ n yɑ̃ku bɑkɑru kowɑ Bɑɑlin mi. Ben wi u mɑɑ yinɑ u nɑ sere bu yɛ̃ro go.
Adɑmɑ u yeni gerumɔwɑ u kɑ Bɑɑlin sɑ̃ɔbu kpuro bwisi kuɑ u bu go. 20 Yehu u bu sɔ̃ɔwɑ u nɛɛ, bu kpɑro kpɑ tɔmbu kpuro bu mɛnnɑ sɔ̃ɔ teeru bu Bɑɑli sɑ̃. Mɑ bɑ kpɑrɑ. 21 Yerɑ u mɑɑ sɔmɔbu gɔrɑ Isirelibɑn tem kpuro sɔɔ. Bɑ Bɑɑlin sɑ̃ɔbu kpuro mɛnnɑ. Bɑɑ ben tɔn turo kun sinɛ. Mɑ be kpuro bɑ yibɑ bũu wi bɑ mɔ̀ Bɑɑlin diru mi, siki siki. 22 Mɑ u wi u rɑ bũu dii ten yɑ̃ku yɑ̃nu bere sɔ̃ɔwɑ u nɛɛ, u yɑ̃ɑ ni yɑrɑmɑ u be bɑ koo bũu ni sɑ̃ kpuro wɛ̃. Mɑ u nu yɑrɑmɑ. 23 Yerɑ Yehu kɑ Yonɑdɑbu Rekɑbun bii bɑ duɑ bũu diru mi, bɑ bũu sɑ̃ɔ be sɔ̃ɔwɑ bɑ nɛɛ, i mɛɛrio sɑ̃ɑ sɑ̃ɑ Yinni Gusunɔn sɑ̃ɔbu bɑ̀ n wɑ̃ɑ mi. Domi Bɑɑlin sɑ̃ɔbu tɔnɑ tɔnɑwɑ sɑ kĩ bɑ n wɑ̃ɑ mini.
24 N deemɑ Yehu u tɑbu durɔbu gɔsɑ tɔmbu wɛnɛ u yɔ̃rɑsiɑ dii ten kɔnnɔwɔ u bu sɔ̃ɔwɑ u nɛɛ, bɛɛn wi u derɑ tɔn be bɑ wɑ̃ɑ dii te sɔɔ, bɑɑ ben turo, u yɑrɑ u doonɑ, yɛ̃rowɑ bɑ koo go. Mɑ wi Yehu kɑ Yonɑdɑbun tii bɑ duɑ bu kɑ siɑrɑbun yɑ̃kuru ko Bɑɑlin mi kɑ mɑɑ yɑ̃ku dɔ̃ɔ mwɑɑrɑrugiru. 25 Sɑnɑm mɛ bɑ yɑ̃ku ni kuɑ bɑ kpɑ, yerɑ Yehu u tɑbu kowo be sɔ̃ɔwɑ u nɛɛ, i duo mi, i bũu sɑ̃ɔ be kpuro go, i ku rɑ de bɑɑ ben turo u yɑri.
Mɑ bɑ duɑ mi, bɑ bu go go kɑ tɑkobi. Yerɑ bɑ goo ni yɑrɑ bɑ kɑ dɑ wuun biruɔ. Yen biru bɑ gɔsirɑ bɑ wurɑ bũu diru mi. 26 Mɑ bɑ Bɑɑlin bwɑ̃ɑroku ge yɑrɑmɑ bɑ dɔ̃ɔ mɛni tɔɔwɔ. 27 Yen biru bɑ bũu dii te surɑ. Mɑ mi kpuro n kuɑ tɔmbun swɑɑ swĩi yeru sere kɑ gisɔ.
Yehun gɔɔ
28 Nge mɛsumɑ Yehu u kɑ Bɑɑlin sɑ̃ɑru kpeerɑsiɑ Isireliɔ. 29 Adɑmɑ kɑ mɛ, u Yeroboɑmu Nɛbɑtin biin yirɑ swĩi, wi u Isirelibɑ doke torɑru sɔɔ, ye bɑ kɑ nɑɑ buu wurɑginu sɑ̃wɑ ni u kuɑ u yi Betɛliɔ, kɑ Dɑnuɔ.
30 Yerɑ Yinni Gusunɔ u Yehu sɔ̃ɔwɑ u nɛɛ, wunɛn bibu bɑ koo bɑndu diwɑ Isireliɔ sere kɑ ben debuminɔ, yèn sɔ̃ ɑ kuɑ ye yɑ wɑ̃ nɛn nɔni sɔɔ. A Akɑbun bweseru go nge mɛ nɑ geruɑ.
31 Adɑmɑ kɑ mɛ, Yehu u ǹ Gusunɔ Isirelibɑn Yinni mɛm nɔɔwɛ kpuro, domi Yeroboɑmun yirɑ u swĩi, wi u Isirelibɑ doke torɑru sɔɔ.
32-33 Sɑɑ ye sɔɔrɑ Yinni Gusunɔ u Isirelibɑn tem kɑwɑbu toruɑ. Mɑ u derɑ Hɑsɑɛli u bu seesi u ben tem nɔɔ burɑ yenu kpuro mwɛɛrɑ. Nge mɛyɑ n kuɑ bɑ ǹ kɑ Yuudɛnin sɔ̃ɔ yɑri yerun berɑ kpuro mɔ n kɑ dɑ sere dɑɑ te bɑ mɔ̀ Aɑnɔɔwɔ, Anɛɛn berɑ giɑ, Gɑlɑdi kɑ Bɑsɑnin temɔ, mi Gɑdigibu kɑ Rubɛnibɑ kɑ Mɑnɑsebɑ bɑ wɑ̃ɑ.