Yosiɑsi
u kuɑ Yudɑbɑn sinɑ boko
(I mɑɑ mɛɛrio Bɑndun Gɑri II, 34:1-2)
22
1 Wɔ̃ɔ nɔɔbɑ itɑwɑ Yosiɑsi u mɔ sɑɑ ye u bɑndu di Yerusɑlɛmuɔ. U kuɑ wɔ̃ɔ tɛnɑ kɑ itɑ bɑn te sɔɔ. Win mɛron yĩsirɑ Yedidɑ, Adɑyɑ Bosikɑtigiin bii. 2 Yosiɑsi wi, u kuɑ ye yɑ Yinni Gusunɔ wɛ̃re, domi u sĩɑ win sikɑdo Dɑfidin yirɑ kpuro sɔɔ, u ǹ yen gɑɑ gɛɛrɑri.
Bɑ Yinni Gusunɔn woodɑn
tireru wɑ
(I mɑɑ mɛɛrio Bɑndun Gɑri II, 34:8-18)
3 Ye Yosiɑsi u kuɑ wɔ̃ɔ yɛndu yiru sɑri bɑndu sɔɔ, yerɑ sɔ̃ɔ teeru u win tire yoro Sɑfɑni Asɑliɑn bii, Mɛsulɑmun debubu gɔrɑ sɑ̃ɑ yerɔ u nɛɛ, 4 ɑ doo yɑ̃ku kowo tɔnwero Hilikiyɑn mi, ɑ nùn sɔ̃ ɑ nɛɛ, u gobi yi dooru koowo yi bɑ kɑ nɑ Yinni Gusunɔn sɑ̃ɑ yerɔ yi tɔmbɑ kɔ̃sobu wɛ̃. 5 Kpɑ bu sɑ̃ɑ yerun sɔm kowobun wirugibu gobi yi nɔmu bɛriɑ. 6 Kpɑ bu kɑ yi dɑ̃ɑ dɑ̃kobu kɑ bɑnɔbu kɑ sɔm kowobu kɔsiɑ kpɑ bu kɑ dɑ̃ɑ dwe kɑ kpenu ni bɑ koo kɑ sɑ̃ɑ yee te sɔmɛ. 7 Adɑmɑ bu ku bikiɑ nge mɛ bɑ kɑ gobi yi dendisinɑ, domi bɑ sɑ̃ɑwɑ nɑɑnɛgibu.
8 Sɑfɑni u dɑ u Hilikiyɑ gɑri yi sɔ̃ɔwɑ. Mɑ Hilikiyɑ u Sɑfɑni sɔ̃ɔwɑ u nɛɛ, nɑ Yinni Gusunɔn woodɑn tireru wɑ sɑ̃ɑ yerɔ. Mɑ u nùn tu wɛ̃ u gɑrɑ. 9 Yen biru Sɑfɑni u gɔsirɑmɑ u nɑ sinɑ bokon mi, u nùn gɔrɑ tusiɑ. U nɛɛ, wunɛn bwɑ̃ɑbɑ gobi yi suɑ bɑ sɑ̃ɑ yerun sɔm kowobun wirugibu nɔmu bɛriɑ.
10 Mɑ u mɑɑ nɛɛ, tireru gɑru wee te yɑ̃ku kowo tɔnwero Hilikiyɑ u mɑn wɛ̃.
Mɑ u tu sinɑ boko gɑriɑ.
Yosiɑsi sinɑ boko
u bikiɑru dɑ Huludɑn mi
(I mɑɑ mɛɛrio Bɑndun Gɑri II, 34:19-28)
11 Sɑɑ yè sɔɔ sinɑ boko Yosiɑsi u tire ten gɑri nuɑ, yerɑ u win tiin yɑberu nɛnuɑ u kɑrɑnɑ nuku sɑnkirɑnun sɔ̃. 12 Mɑ u yɑ̃ku kowo Hilikiyɑ kɑ Akikɑmu Sɑfɑnin bii kɑ Akɑbori Miseen bii kɑ sere Sɑfɑni win tire yoro kɑ Asɑyɑ win sɔm kowo sɔ̃ɔwɑ u nɛɛ, 13 i doo i Yinni Gusunɔ bikiɑ ye tire tenin gɑri gerumɔ nɛ kɑ nɛn tɔmbu Yudɑbɑn sɔ̃. Domi mɔru ye Yinni Gusunɔ u kɑ sun mɔ̀ yɑ kpɑ̃, yèn sɔ̃ bɛsɛn bɑɑbɑbɑ bɑ ǹ tire ten gɑri swɑɑ sue bu sere ko nge mɛ tɑ geruɑ.
14 Mɑ yɑ̃ku kowo Hilikiyɑ kɑ Akikɑmu kɑ Akɑbori kɑ Sɑfɑni kɑ Asɑyɑ bɑ dɑ bɑ Gusunɔn sɔmɔ Huludɑ wɑ Yerusɑlɛmun wɔɔ berɑ kpɑɑɔ. Huludɑ win durɔwɑ Sɑlumu Tikifɑn bii, Hɑrɑsin debubu. Sɑlumu wiyɑ u rɑ yɑ̃ku kowobun yɑbenu bere. Ye bɑ turɑ mi, yerɑ bɑ Huludɑ gɑri yi sɔ̃ɔwɑ. 15 Mɑ u bu wisɑ u nɛɛ, ɑmɛniwɑ Gusunɔ Isirelibɑn Yinni u geruɑ. U nɛɛ, i durɔ wi u bɛɛ gɔrimɑ sɔ̃ɔwɔ i nɛɛ, 16 ɑmɛniwɑ Yinni Gusunɔ u geruɑ. U nɛɛ, u koo de kɔ̃sɑ yu nɑ Yerusɑlɛmuɔ kpɑ yu min tɔmbu deemɑ nge mɛ tire ten gɑri yi geruɑ te wi Yudɑbɑn sinɑ boko u gɑrɑ. 17 Domi bɑ wi Yinni Gusunɔ deri, mɑ bɑ bũnu turɑre dɔ̃ɔ dokeɑmmɛ bu kɑ win mɔru seeyɑ kɑ ben kookoosu kpuro. Yen sɔ̃ tɛ̃, u kɑ Yerusɑlɛmugibu mɔru mɔ̀, yɑ ǹ mɑɑ suremɔ. 18 Adɑmɑ Yudɑbɑn sunɔ wi u bɛɛ gɔrimɑ, i nùn sɔ̃ɔwɔ i nɛɛ, ɑmɛniwɑ Gusunɔ Isirelibɑn Yinni u geruɑ win woodɑ ye u gɑrɑn sɔ̃. U nɛɛ, 19 yèn sɔ̃ wi, sinɑ boko u nuɑ Yerusɑlɛmugibu bɑ koo kɔ̃sɑ wɑ, bu nuki sɑnkirɑ kpɑ bu bu gɛm, mɑ gɑri yi, yi wi sinɑ bokon gɔ̃ru so, mɑ u tii kɑwɑ Yinni Gusunɔn wuswɑɑɔ u swĩ, u win yɑberu nɛnuɑ u kɑrɑnɑ, 20 yen sɔ̃nɑ u koo de wi, sinɑ boko u gbi bɔri yɛndu sɔɔ kpɑ bu nùn sike win bɑɑbɑbɑn sikɑɔ. Win nɔni kun mɑɑ kɔ̃sɑ ye wɑsi, ye yɑ koo Yerusɑlɛmu deemɑ.
Yosiɑsi u Gusunɔn ɑrukɑwɑni dubiɑ
ye u kɑ Isirelibɑ bɔkuɑ
(I mɑɑ mɛɛrio Bɑndun Gɑri II, 34:29-32)
Mɑ tɔn be, bɑ gɔsirɑmɑ bɑ sinɑ boko gɑri yi kpuro sɔ̃ɔwɑ.