Bɑ Yehu gum tɑ̃re
u kɑ ko Isirelibɑn sinɑ boko
9
1 Sɔ̃ɔ teeru Elisee u turo sokɑ Gusunɔn sɔmɔn bwɑ̃ɑbun wuurun di u nùn sɔ̃ɔwɑ u nɛɛ, ɑ sɔɔru koowo kpɑ ɑ gum kɔbɑ ye suɑ ɑ kɑ dɑ Rɑmɔtiɔ Gɑlɑdin temɔ. 2 À n turɑ mi, ɑ doo ɑ Yehu wɑ Yosɑfɑtin bii, Nimusin debubu. A nùn wunɔ wigibun suunu sɔɔn di ɑ kɑ dɑ diru gɑrun mi, bee tiɑ. 3 Miyɑ kɑɑ nùn gum tɑ̃re u ko sunɔ kpɑ ɑ nùn sɔ̃ ɑ nɛɛ, ɑmɛniwɑ Yinni Gusunɔ u geruɑ. U nɛɛ, u koo nùn ko Isirelibɑn sinɑ boko. Yen biru kpɑ ɑ gɑmbo kɛniɑ ɑ dukɑ doonɑ. A ku rɑ yɔ̃re.
4 Mɑ Gusunɔn sɔmɔ ɑluwɑɑsi wi, u dɑ Rɑmɔti mi, Gɑlɑdin temɔ. 5 Ye u turɑ mi, yerɑ u deemɑ wee, be, tɑbu sinɑmbu bɑ mɛnnɛ bɑ wesiɑnɑmɔ. Mɑ u bu sɔ̃ɔwɑ u nɛɛ, i mɑn isɑ kuo, nɑ kĩ n kɑ bɛɛn turo gɑri ko.
Mɑ Yehu u nùn wisɑ u nɛɛ, bɛsɛn wɑrɑ.
Mɑ sɔmɔ wi, u nɛɛ, tɑbu sunɔ wunɑ.
6 Yerɑ u seewɑ bɑ dɑ yɛnuɔ. Ye bɑ turɑ dirɔ, mɑ u nùn gum mɛ tɑ̃re wirɔ u nɛɛ, ɑmɛniwɑ Gusunɔ Isirelibɑn Yinni u geruɑ. U nɛɛ, wunɑ u gɔsɑ ɑ kɑ ko win tɔmbu Isirelibɑn sinɑ boko. 7 Kpɑ ɑ wunɛn Yinni Akɑbun bweseru kpuro go. U koo mɑɑ de ɑ win sɔmɔbu kɑ win sɔm kowobu kpuron yɛm mɔɔru mwɑ Yesɑbɛlin mi. 8 Akɑbun bweseru kpurowɑ u koo de ɑ kpeerɑsiɑ sere kɑ ben bibɔ. 9 Kpɑ bwese te, tu ko nge mɛ Yeroboɑmu Nɛbɑtin biigirɑ kuɑ kɑ Bɑsɑ Akiyɑn biigiru. 10 Mɛyɑ bɑ ǹ mɑɑ Yesɑbɛli sikumɔ, bɔ̃nɑ nu koo win goru tem Yisirɛɛliɔ.
Ye Gusunɔn sɔmɔ wi, u gɑri yi geruɑ u kpɑ, yerɑ u gɑmbo kɛniɑ u dukɑ yɑkurɑ.
11 Yehu u yɑrimɑ u dɑ u win berusebu deemɑ. Mɑ bɑ nùn bikiɑ bɑ nɛɛ, n kɑ sere do? Mbɑn sɔ̃nɑ wiiro wini u nɑ wunɛn mi.
Mɑ Yehu u bu wisɑ u nɛɛ, bɛɛn tii i durɔ wi yɛ̃, i mɑɑ yɛ̃ ye u koo kpĩ u gere.
12 Adɑmɑ bɑ nɛɛ, ɑɑwo, sɑ ǹ yɛ̃. A sun sɔ̃ɔwɔ ye u geruɑ.
Mɑ Yehu u nɛɛ, ɑmɛni kɑ ɑmɛniwɑ u mɑn sɔ̃ɔwɑ. Yen biru u mɑn gum tɑ̃re mɑ u nɛɛ, Yinni Gusunɔwɑ u mɑn gɔsɑ n kɑ ko Isirelibɑn sinɑ boko.
13 Mii mii bɑ seewɑ bɑ ben yɑ̃nu potirɑ bɑ tɛriɑ dii kɔnnɔn yɔɔtiɑ wɔllɔ bɑ Yehu swĩi mi. Mɑ bɑ kɔbɑ soomɔ bɑ mɔ̀ Yehu u kuɑ sunɔ.
Bɑ nɔɔsinɑ bu kɑ Yorɑmu
Isirelibɑn sinɑ boko go
14 Sɑɑ ye sɔɔ, Yorɑmu kɑ Isirelibɑ bɑ Sirin sinɑ boko Hɑsɑɛli wɔrim dɑ Rɑmɔtiɔ Gɑlɑdin temɔ. Yerɑ Yehu Yosɑfɑtin bii Nimusin debubu u nùn seesi. 15 N deemɑ Yorɑmu wi, u ginɑ wɑ̃ɑ Yisirɛɛliɔ bɑ nùn nɔɔrimɔ mɛɛrɑ ye u wɑn sɔ̃ sɑnɑm mɛ u tɑbu mɔ̀ kɑ Sirin sunɔ wi.
Yerɑ Yehu u win tɑbu sinɑ kpɑɑsibu sɔ̃ɔwɑ u nɛɛ, ǹ n bɛɛn kĩrun nɑ, i ku de bɑɑ bɛɛn tɔn turo u yɑri u dɑ Yisirɛɛliɔ u sinɑ boko yen lɑbɑɑri sɔ̃.
16 Sɑɑ yerɑ Yudɑn sinɑ boko Akɑsiɑ u mɑɑ Yorɑmu mɛɛrim nɑ win mɛɛrɑ yen sɔ̃. Yerɑ Yehu u win tɑbu kɛkɛ ye dumi gɑwe yɔɔwɑ u mɑɑ dɑ mi. 17 Mɑ wuu kɔ̃so u Yehun tɑbu wuuru wɑ tɑ wee. Yerɑ u dɑ u sinɑ boko sɔ̃ɔwɑ u nɛɛ, nɑ tɑbu wuuru gɑru wɑɑmɔ tɑ wee.
Mɑ Yorɑmu u nɛɛ, ɑ mɑɑsɔ goo gɔrio u dɑ u bu bikiɑ u nɛɛ, bɔri yɛndun gɑriyɑ bɑ kɑ sĩimɔ?
18 Mɑ mɑɑsɔ wi, u dɑ Yehun mi, u nɛɛ, sinɑ boko u nɛɛ, bɔri yɛndun gɑriyɑ i kɑ sĩimɔ?
Mɑ Yehu u nɛɛ, mbɑ n nun wɑ, ɑ wuro nɛn biruɔ!
Yerɑ kɔ̃so wi, u mɑɑ dɑ sinɑ bokon mi, u nɛɛ, gɔro wi, u turɑ tɔn ben mi, ɑdɑmɑ u ǹ gɔsirɑmɛ.
19 Mɑ Yorɑmu u mɑɑ derɑ mɑɑsɔ kpɑo u dɑ. Ye u turɑ mi, yerɑ u nɛɛ, sinɑ boko u nɛɛ, bɔri yɛndun gɑriyɑ i kɑ sĩimɔ?
Mɑ Yehu u nɛɛ, mbɑ n nun wɑ. A wuro nɛn biruɔ!
20 Yerɑ kɔ̃so wi, u mɑɑ dɑ sinɑ bokon mi, u nɛɛ, winin tii u turɑ mi. Adɑmɑ u ǹ wurɑmɛ. Tɔn wuu te tɑ mɑɑ wee mi, tɑ sɑ̃ɑwɑ nge Yehu Nimusin biigiru. Domi wi u tɑbu kɛkɛ ye kpɑre u mɔ̀wɑ nge wiiro.
21 Yerɑ Yorɑmu u nɛɛ, i nɛn tɑbu kɛkɛ sɔɔru koowo, mɑ bɑ ye sɔɔru kuɑ. Yerɑ wi, Yorɑmu, Isirelibɑn sinɑ boko kɑ Akɑsiɑ Yudɑbɑn sinɑ boko bɑ seewɑ bɑ dɔɔ bu kɑ Yehu yinnɑ, ben bɑɑwure u wɑ̃ɑ win tɑbu kɛkɛ sɔɔ. Mɑ bɑ Yehu deemɑ Nɑbɔti Yisirɛɛligiin gbɑɑrɔ.
Yorɑmun gɔɔ
22 Sɑɑ yè sɔɔ Yorɑmu u Yehu wɑ, yerɑ u nùn bikiɑ u nɛɛ, ɑlɑfiɑwɑ ɑ kɑ sĩimɔ mɛ?
Mɑ Yehu u nɛɛ, ɑmɔnɑ ɑlɑfiɑ yɑ ko n kɑ wɑ̃ɑ, domi ɑ derɑ wunɛn mɛro Yesɑbɛli u bũnu gɑsirimɔ u sɑ̃ɑmɔ mɑ u sɔroru mɔ̀.
23 Mɑ Yorɑmu u biruku yirɑ wurɑ u dukɑ yɑkurɑ. U nɔɔgiru suɑ u nɛɛ, kɛ̃sirɑ tunumɑ, Akɑsiɑ.
24 Sɑɑ yerɑ Yehu u win tɛndu suɑ u Yorɑmu tobɑ win senun bɑɑ sɔɔ. Mɑ sɛ̃u gɑ dɑ gɑ wɔri win woo sɔndɔ. Mɑ u wɔrumɑ u gu, win tɑbu kɛkɛ ye sɔɔ. 25-26 Mɑ Yehu u win tɑbu sunɔ turo Bidikɑɑ sɔ̃ɔwɑ u nɛɛ, sɑnɑm mɛ sɑ Akɑbu swĩi kɑ dumi ɑ yɑɑye ye Yinni Gusunɔ u geruɑ win sɔ̃? U nɛɛ, nge mɛ Akɑbu u Nɑbɔti kɑ win bibun yɛm yɑri gbɑɑ te sɔɔ, nge mɛyɑ u koo mɑɑ de win bweserun yɛm mu yɑri gbɑɑ te sɔɔ. Yen sɔ̃, ɑ Yorɑmun goo te suo ɑ kɑre gbɑɑ ten mi.
Bɑ Akɑsiɑ
Yudɑbɑn sinɑ boko go
(I mɑɑ mɛɛrio Bɑndun Gɑri II, 22:7-9)
27 Ye Akɑsiɑ u wɑ mɛ, yerɑ u dukɑ suɑ u dɑ Bɛti Gɑni giɑ. Mɑ Yehu u nùn nɑɑ swĩi sere Gurin gungurɔ, Yibileɑmun bɔkuɔ. Mɑ u nɛɛ, i nùn tweeyo, mɑ bɑ nùn twee bɑ kɑ dɑ Mɛgidoɔ. Miyɑ u gu. 28 Mɑ win bwɑ̃ɑbɑ win goru suɑ bɑ kɑ dɑ Yerusɑlɛmuɔ bɑ sikuɑ, win bɑɑbɑbɑn sikɑɔ, Dɑfidin wuuɔ.
29 N deemɑ Akɑsiɑ wi, u bɑndu diwɑ Yudɑɔ Akɑbun bii Yorɑmun bɑndun wɔ̃ɔ wɔkurɑ tiɑse sɔɔ.
Bɑ Yesɑbɛli go
30 Yen biruwɑ Yehu u duɑ Yisirɛɛliɔ. Ye Yesɑbɛli u nuɑ mɛ, yerɑ u win wuswɑɑ burɑru kuɑ u kirobɑ doke nɔniɔ. Mɑ u win wiru yɑrɑ fɛnɛntin di u kɑ yɑm mɛɛrɑ. 31 Sɑnɑm mɛ Yehu u duɑ wuuɔ, yerɑ Yesɑbɛli u nùn sɔ̃ɔwɑ u nɛɛ, Simiri wi u rɑ win yinni gon kɔsire, n sere do ɑ kɑ nɑ mi?
32 Mɑ Yehu u wuswɑɑ seeyɑ fɛnɛnti yen berɑ giɑ wɔllɔ u nɛɛ, wɑrɑ u kɑ mɑn yɔ̃rɑ.
Mɑ sinɑ bokon sɔm kowobun wirugibu gɑbu yiru ǹ kun mɛ itɑ bɑ nùn mɛɛrimɑ temɔ. 33 Yerɑ u nɛɛ, i Yesɑbɛli kɑsɑ koomɑ temɔ.
Mɑ bɑ nùn kɑsɑ kuɑ. Yerɑ win yɛm yɑri gbɑ̃rɑru wɔllɔ, kɑ mɑɑ dumin wɔllɔ. Mɑ Yehu u nùn yɑsisi kɑ tɑbu kɛkɛ ye dumi gɑwe.
34 Yen biruwɑ Yehu u duɑ sinɑ kpɑɑru mi, mɑ u di u nɔrɑ. Yerɑ u nɛɛ, i doo i kurɔ kɑm wi sike domi u sɑ̃ɑwɑ sinɑ bokon bii.
35 Ye bɑ dɑ, yerɑ bɑ deemɑ win wii koko kɑ win nɑɑsu kɑ nɔm tɑrɑnu tɔnɑwɑ nu wɑ̃ɑ mi, mɑ bɑ nu suɑ bɑ sikuɑ. 36 Mɑ bɑ dɑ bɑ ye Yehu sɔ̃ɔwɑ, yerɑ u bu wisɑ u nɛɛ, mɛyɑ Yinni Gusunɔ u rɑɑ geruɑ sɑɑ win sɔmɔ Eli Tisibigiin nɔɔn di, ye u nɛɛ, bɔ̃nɑ nu koo Yesɑbɛlin goru tem Yisirɛɛlin gberɔ. 37 Nge mɛyɑ win wɑsin sukum mu kuɑ tɑɑki Yisirɛɛlin gberɔ. Kpɑ bu ku rɑɑ kɑ nɛɛ, Yesɑbɛlin sikirɑ mini.