Akɑbu u derɑ bɑ Nɑbɔti go
21
1 Yenibɑn biru ye yɑ koorɑ wee. Durɔ goo u wɑ̃ɑ Yisirɛɛliɔ, win yĩsirɑ Nɑbɔti. U resɛm gbɑɑru mɔ, Akɑbu Sɑmɑrin sunɔn sinɑ kpɑɑrun bɔkuɔ. 2 Sɔ̃ɔ teeru Akɑbu u nùn sɔ̃ɔwɑ u nɛɛ, ɑ mɑn wunɛn resɛm gbɑɑ te derio tu ko nɛn sɑɑdiɛ̃. Domi tɑ wɑ̃ɑ nɛn sinɑ kpɑɑrun bɔkuɔ. Kpɑ n nun resɛm gbɑɑru gɑru kɔsire kuɑ tèn resɛm yɑ yeni geɑ kere. Ǹ n mɑɑ gobin nɑ ɑ kĩ, kon nun yi wɛ̃ nge mɛ gbɑɑ ten geerɑ nɛ.
3 Adɑmɑ Nɑbɔti u nɛɛ, Gusunɔ u mɑn bere n kɑ nɛn tubi suɑ n nun wɛ̃, ye nɛn bɑɑbɑbɑ bɑ mɑn deriɑ.
4 Mɑ Akɑbu u gɔsirɑ yɛnuɔ kɑ nuku sɑnkirɑnu u mɔruɑ Nɑbɔti Yisirɛɛligiin gɑri yin sɔ̃. U dɑ u kpunɑ u kɔ̃ruɑ, u yinɑ u di. 5 Yerɑ win kurɔ Yesɑbɛli u nɑ win mi, u nùn bikiɑ u nɛɛ, mbɑn sɔ̃nɑ wunɛn nukurɑ kɑ sɑnkire sere ɑ kpɑnɑ ɑ di.
6 U nun wisɑ u nɛɛ, Nɑbɔtiwɑ nɑ sɔ̃ɔwɑ nɑ nɛɛ, u mɑn win resɛm gbɑɑru derio. Kpɑ n nùn ten gobi kɔsiɑ, ǹ kun mɛ, n nùn gɑru kɔsire kuɑ. Adɑmɑ u nɛɛ, u ǹ mɑn tu wɛ̃ɛmɔ.
7 Yerɑ Yesɑbɛli wi, u nùn sɔ̃ɔwɑ u nɛɛ, n ǹ wunɑ ɑ sɑ̃ɑ Isirelibɑn sunɔ? A seewo ɑ di kɑ nuku dobu. Nɛ, kon nun Nɑbɔtin gbɑɑ te wɛ̃.
8 Yerɑ u guro gurobu kɑ siri kowobu be bɑ wɑ̃ɑ wuu teu kɑ Nɑbɔti tirenu yoruɑ kɑ Akɑbun yĩsiru u Akɑbun yĩreru doke tire ni sɔɔ. 9 Ye u yoruɑ wee. U nɛɛ, i kpɑro i bɑɑwure sɔ̃ u nɔɔ bɔke kpɑ i de tɔmbu bu mɛnnɑ kpɑ i Nɑbɔti gbiisiɑ ben wuswɑɑɔ. 10 Kpɑ i tɔn kɔ̃sobu yiru gɑbu wunɑ bu nɑ win wuswɑɑɔ bu nùn tɑɑrɛ wɛ̃ bɑ n mɔ̀, wiyɑ u Gusunɔ kɑ sinɑ boko bɔ̃rusi. Yen biru i nùn yɑro i kɑ dɑ wuun biruɔ i kpenu kɑsuku i go.
11 Mɑ Nɑbɔtin wuun guro guro be, kɑ ben siri kowo be, bɑ kuɑ nge mɛ Yesɑbɛli u bu sɔ̃ɔwɑ tire ni sɔɔ. 12 Bɑ nɔɔ bɔku te kuɑ wuu giru bɑ mɑɑ Nɑbɔti gbiisiɑ tɔmbun wuswɑɑɔ. 13 Mɑ tɔn kɔ̃sobu yiru ye, bɑ nɑ bɑ sinɑ win wuswɑɑɔ. Bɑ tɔn wɔru ge sɔ̃ɔwɑ bɑ nɛɛ, Nɑbɔti u Gusunɔ kɑ sinɑ boko bɔ̃rusi.
Mɑ bɑ nùn gɑwɑ bɑ kɑ yɑrɑ wuun biruɔ bɑ kpenu kɑsukɑ bɑ go. 14 Mɑ wuun wirugii be, bɑ Yesɑbɛli sɔmɔ gɔriɑ bɑ nɛɛ, bɑ Nɑbɔti kpee ni kɑsukɑ bɑ go. 15 Sɑɑ ye Yesɑbɛli u nuɑ mɑ bɑ Nɑbɔti go, yerɑ u dɑ u Akɑbu sɔ̃ɔwɑ u nɛɛ, ɑ doo ɑ resɛm gbɑɑ te suɑ te Nɑbɔti Yisirɛɛligii u rɑɑ yinɑ u nun dɔre mi, domi u gu.
16 Ye Akɑbu u nuɑ mɛ, yerɑ u dɑ u gbɑɑ te suɑ.
Yinni Gusunɔ
u Akɑbu kɑ Yesɑbɛli tɑɑrɛ wɛ̃
17 Sɑɑ yerɑ Yinni Gusunɔ u Eli Tisibigii sɔ̃ɔwɑ u nɛɛ, 18 ɑ seewo ɑ dɑ ɑ kɑ Akɑbu Isirelibɑn sinɑ boko yinnɑ wi u wɑ̃ɑ Sɑmɑriɔ. Wi wee, u wɑ̃ɑ Nɑbɔtin resɛm gbɑɑrɔ u kɑ tu suɑ. 19 A nùn sɔ̃ɔwɔ ɑ nɛɛ, ɑmɛniwɑ nɛ, Yinni Gusunɔ nɑ geruɑ. Ye u tɔnu go u kpɑ, yerɑ u koo mɑɑ yɛ̃ron tubi suɑ? Tɛ̃ mi bɔ̃nu nu Nɑbɔtin yɛm dɑburɑ, miyɑ nu koo mɑɑ win tiigim dɑbiri.
20-21 Yerɑ Eli u dɑ Akɑbun mi. Ye u turɑ mi, yerɑ Akɑbu u nùn sɔ̃ɔwɑ u nɛɛ, nɛn yibɛrɛ, ɑ den mɑn wɑ?
Eli u nùn wisɑ u nɛɛ, nɑ nun wɑ. Wee, Yinni Gusunɔ u koo nun kɔ̃sɑ suremɑ kpɑ u wunɛn tɔmbu kpuro go kɑ wunɛn yobɔ yèn sɔ̃ ɑ tii yɔ̃su ɑ kɔ̃sɑ kuɑ win wuswɑɑɔ. 22 U koo de wunɛn yɛnu gu ko nge Yeroboɑmu Nɛbɑtin biiguu, ǹ ku mɛ, nge Bɑsɑ Akiyɑn biiguu. Domi ɑ win mɔru seeyɑ, mɑ ɑ Isirelibɑ doke torɑru sɔɔ. 23 Wee ye Yinni Gusunɔ u mɑɑ geruɑ Yesɑbɛlin sɔ̃. U nɛɛ, bɔ̃nɑ nu koo win goru tem Yisirɛɛlin gbɑ̃rɑrun bɔkuɔ. 24 Mɛyɑ mɑɑ Akɑbugibu sɔɔ, wi u gu yɛnuɔ, bɔ̃nɑ nu koo yɛ̃ron goru tem. Wi u mɑɑ gu yɑkɑsɔ, gunɔsɑ su koo yɛ̃ron goru di.
25 Domi goo sɑri wi u tii yɔ̃su kɔ̃sɑ sɔɔ nge Akɑbu, Yinni Gusunɔn wuswɑɑɔ. N deemɑ win kurɔ Yesɑbɛliwɑ u rɑ n nùn dɑm kɛ̃mɔ u kɑ ye ko. 26 U kɔ̃sɑ kuɑ ye yɑ ǹ kɑ nɔɔ gerurɔ. Domi u dɑ u bũnu sɑ̃ɑmɔ nge Amɔrebɑ be Gusunɔ u girɑ. Mɑ u ben tem Isirelibɑ wɛ̃.
Akɑbu u win durum
tuubɑ kuɑ
27 Ye Akɑbu u Elin gɑri yi nuɑ mɛ, yerɑ u tii kɑwɑ u win yɑbe ni u sebuɑ nɛnuɑ u gɛ̃ɛkɑ mɑ u sɑɑki suɑ u tii tɛ̃kusi, u nɔɔ bɔkuɑ. Sɑɑki yerɑ, u rɑ kɑ bɔsu kɑ nuku sɑnkirɑnu. Yerɑ u rɑ mɑm kɑ kpunɛ. 28 Mɑ Yinni Gusunɔ u mɑɑ Eli Tisibigii wi sɔ̃ɔwɑ u nɛɛ, 29 ɑ wɑ nge mɛ Akɑbu u tii kɑwɑ nɛn wuswɑɑɔ? Yen sɔ̃, nɑ ǹ mɑɑ derimɔ kɔ̃sɑ ye, yu koorɑ win wɑɑti sɔɔ. Win biin wɑɑti sɔɔrɑ kon de yu koorɑ.