Eli u nɛɛ, gbeburɑ koo nɑ
17
1 Gusunɔn sɔmɔ Eli wi u wɑ̃ɑ Tisibiɔ Gɑlɑdin temɔ u sinɑ boko Akɑbu sɔ̃ɔwɑ u nɛɛ, kɑ Gusunɔ Isirelibɑn Yinni wi nɑ sɑ̃ɑmɔ minin wɑ̃ɑru, gurɑ kɑ kɑkoru, yen gɑɑ kun mɑɑ nɛmɔ wɔ̃ɔ sinin bɑɑ sɔɔ sere dɔmɑ te nɑ wure nɑ nɛɛ, yɑ koo nɛ.
Eli u wɑ̃ɑ
dɑɑ te bɑ mɔ̀ Keritiɔ
2 Yerɑ Yinni Gusunɔ u Eli sɔ̃ɔwɑ u nɛɛ, 3 ɑ seewo minin di kpɑ ɑ dɑ sɔ̃ɔ yɑri yeru giɑ ɑ n wɑ̃ɑ Keritin dɑɑrɔ Yuudɛnin guruɔ. 4 Dɑɑ ten nimɑ kɑɑ n dɑ n nɔrumɔ kpɑ n gunɔmɔri gɔrimɑ yi kɑ nun dĩɑnu nɑɑwɑ.
5 Mɑ Eli u doonɑ min di u kuɑ nge mɛ Yinni Gusunɔ u nùn sɔ̃ɔwɑ. U dɑ u wɑ̃ɑ dɑɑ ten mi. 6 Yerɑ gunɔmɔri yi, yi rɑ kɑ nùn pɛ̃ɛ kɑ yɑɑ nɑɑwɛ bururu kɑ yokɑ. Dɑɑ ten nimɑ u rɑ n mɑɑ nɔrumɔ.
Eli kɑ kurɔ gɔmini goo
Sɑrepɑtɑɔ
7 Sɑnɑm dɔɔ sɑnɑm wee, dɑɑ ten nim mu kpɑ. Domi gurɑ kun mɑɑ nɛɛre tem mɛ sɔɔ. 8 Yerɑ Yinni Gusunɔ u kpɑm Eli sɔ̃ɔwɑ u nɛɛ, 9 ɑ seewo ɑ dɑ Sɑrepɑtɑɔ, Sidonin temɔ, kpɑ ɑ n wɑ̃ɑ mi. Domi nɑ gɔmini goo sɔ̃ɔwɑ u nun diisiɑ.
10 Mɑ u seewɑ u dɑ Sɑrepɑtɑ mi. Ye u wuu ge duɔ, yerɑ u deemɑ gɔmini goo wee, u dɑ̃ɑ kɑsu. Mɑ u nùn sokɑ u nɛɛ, ɑ suuru koowo ɑ doo, ɑ mɑn nim kɑsuɑmɑ fiiko n nɔ.
11 Ye u nim mɛ kɑso dɔɔ, Eli u kpɑm nùn sokɑ u nɛɛ, ɑ mɑn pɛ̃ɛ kpiribu kɑsuɑmɑ mi, n nɔɔ kpɛ̃ɛ.
12 Mɑ kurɔ wi, u nùn wisɑ u nɛɛ, kɑ Gusunɔ wunɛn Yinnin wɑ̃ɑru, nɑ ǹ dĩɑ yebunu gɑnu mɔ yɛnuɔ, mɑ n kun mɔ som nɔm kure teeru te nɑ mɔ kɑɑrɔ kɑ sere mɑɑ gum fiiko bwɑ̃ɑrɔ. Yen dɑ̃ɑ nɑ kɑsu mini, nɑ̀ n sĩɑ yɛnuɔ, n kɑ doo ko su di kɑ nɛn bii. Yen biru kpɑ sɑ n gɔɔ mɑrɑ.
13 Eli u nùn sɔ̃ɔwɑ u nɛɛ, ɑ ku bɛrum ko, ɑ doo ɑ ko nge mɛ ɑ geruɑ. Adɑmɑ ɑ ginɑ mɑn kirɑ piibu kuɑmɑ kɑ som mɛ. Yen biru kpɑ ɑ wunɛ kɑ wunɛn biigiru ko. 14 Domi Gusunɔ Isirelibɑn Yinni u geruɑ u nɛɛ, som mɛ mu wɑ̃ɑ kɑɑ te sɔɔ, kɑ gum mɛ mu wɑ̃ɑ bwɑ̃ɑ te sɔɔ, mu ǹ kpeemɔ pɑi, sere n kɑ ko tɔ̃ɔ te u koo de gurɑ yu nɛ.
15 Mɑ u dɑ u kuɑ nge mɛ Eli u geruɑ. Wi kɑ win yɛnugibu kɑ Elin tii bɑ mɑɑ wɑ bɑ di sɔ̃ɔ dɑbi dɑbinu. 16 Som mɛ, kɑ gum mɛ, mu ǹ kpɑ nge mɛ Yinni Gusunɔ u rɑɑ geruɑ win sɔmɔ Elin nɔɔn di.
Eli u kurɔ gɔmini win bii
wesiɑ wɑsiru
17 Yenibɑn biru, kurɔ win bii u bɑrɑ gem gem mɑ u gu. 18 Yerɑ u Eli sɔ̃ɔwɑ u nɛɛ, Gusunɔn tɔnu wunɛ, ɑ nɑwɑ ɑ kɑ Gusunɔ nɛn torɑnu yɑɑyɑsiɑ? Domi wee nɛn bii u gu.
19 Eli u kurɔ wi sɔ̃ɔwɑ u nɛɛ, ɑ mɑn bii wi wɛ̃ɛmɑ.
Mɑ u nùn mwɑ kurɔ win nɔmɑn di u kɑ dɑ dii ten gidɑmbisɑn wɔllɔ mi u rɑ n wɑ̃ɑ. Mɑ u nùn kpĩ win kpin yerɔ. 20 Mɑ u Yinni Gusunɔ kɑnɑ u nɛɛ, Yinni kɑɑ dewɑ kɔ̃sɑ yu kurɔ wi deemɑ wìn mi nɑ sɔbiɑ? Kpɑ ɑ de win bii u gbi?
21 Yerɑ u bii wi kibɑrisi nɔn itɑ u Gusunɔ kɑnɑ u nɛɛ, Gusunɔ nɛn Yinni, ɑ de bii wi, u se.
22 Mɑ Yinni Gusunɔ u Elin kɑnɑ te mwɑ, bii win wɛ̃siɑrɑ wurɑmɑ u kuɑ wɑso. 23 Yerɑ Eli u nùn suɑmɑ u kɑ sɑrɑmɑ wɑsiru u nùn win mɛro wɛ̃. U nɛɛ, wunɛn bii wee.
24 Mɑ kurɔ wi, u Eli sɔ̃ɔwɑ u nɛɛ, tɛ̃, nɑ giɑ mɑ Gusunɔn tɔnuwɑ ɑ sɑ̃ɑ. Gɑri yi ɑ mɑɑ gerumɔ yi sɑ̃ɑwɑ gem, yi weewɑ Gusunɔn min di.