Usɑi u Ahitofɛlin kpunɑɑ
sɑnkɑ
17
1 Yen biru Ahitofɛli u Abusɑlɔmu sɔ̃ɔwɑ u nɛɛ, ɑ de n tɔmbu nɔrɔbun subɑ wɔkurɑ yiru (12.000) gɔsi kpɑ n Dɑfidi nɑɑ swĩi wɔ̃ku te. 2 Sɑɑ ye sɔɔ, u ko n wɑsire, u ǹ ko n mɑɑ dɑm gɑm mɔ, kpɑ n nùn nɑre. Win tɔmbu bɑ̀ n yɑrinɑ bɑ nùn deri wi turo, kpɑ n nùn sɛ̃re n go. 3 Mɛsumɑ kon ko Isirelibɑ kpuro bu kɑ wurɑmɑ wunɛn mi. Domi wi ɑ kɑsu mi, sɑ̀ n nùn nɔmɑ turɑ, be kpuro bɑ koo wurɑmɑ wunɛn mi, kpɑ bɑ n wɑ̃ɑ bɔri yɛndu sɔɔ.
4 Mɑ gɑri yi, yi Abusɑlɔmu kɑ Isirelibɑn guro gurobu kpuro dore. 5 Adɑmɑ Abusɑlɔmu u nɛɛ, bu Usɑi Aɑkigii sokumɑ kpɑ bu mɑɑ nɔ ye win tii koo gere.
6 Ye Usɑi u tunumɑ Abusɑlɔmun mi, mɑ Abusɑlɔmu u nùn sɔ̃ɔwɑ u nɛɛ, ɑmɛniwɑ Ahitofɛli u geruɑ. Yɑ nun wɛ̃re su ko mɛ? Nge ɑmɔnɑ ɑ wɑ.
7 Usɑi u nɛɛ, Ahitofɛlin bwisi yi u nun kɛ̃mɔ mini gisɔ, yi ǹ bwisi gee. 8 Wunɛn tii, ɑ wunɛn tundo kɑ win tɔmbu yɛ̃ mɑ bɑ sɑ̃ɑwɑ tɑbu durɔbu. Bɑ kɔ̃ruɑwɑ nge gbeeku yɑɑ gɔbɑ ye bɑ binu mwɑɑri. Yen biru ɑ yɛ̃ mɑ wunɛn tundo wi, u sɑ̃ɑwɑ tɑbun sɑriɑ yɛ̃ro. U ǹ wurɑmɔ u kpunɑ kɑ tɔn be sɑnnu. 9 Wee ɑ̀ n dɑ tɛ̃, u kukuɑ kpee wɔru gɑgu sɔɔ, ǹ kun mɛ yɑm gɑm. Win tɔmbu bɑ̀ n gbiɑ bɑ sun wɔri, mɑ bɑ bɛsɛn gɑbu go, wi u ye nuɑ, u koo nɛɛ, wee, bɑ Abusɑlɔmun tɔmbu go go. 10 Sɑɑ ye sɔɔ, bɛsɛn suunu sɔɔ, bɑɑ goo ù n sɑ̃ɑ tɑbu durɔ, mɑ u wɔrugɔru mɔ nge gbee sunɔ, yɛ̃ro koo bɛrum duurɑ. Domi Isirelibɑ kpuro bɑ yɛ̃ mɑ wunɛn tundo u sɑ̃ɑ tɑbu durɔ. Mɛyɑ u mɑɑ tɑbu kowo dɑmgibu mɔ. 11 Bwisi yi nɑ mɔ kon nun kɛ̃ wee. A de Isirelibɑ kpuro be bɑ wɑ̃ɑ Dɑnun di sere kɑ Beri Sebɑɔ bu mɛnnɑ bɑ n dɑbi nge yɑni sɛɛri nim wɔ̃kun goorɔ kpɑ wunɛn tii ɑ n bu gbiiye i kɑ tɑɑ bi dɑ. 12 Kpɑ su bu wɔri subɑru sɔɔ mi bɑ gesi wɑ̃ɑ su bu wukiri mɑm mɑm nge mɛ dirum mu rɑ yɑkɑsu wukiri. Sɑ̀ n kuɑ mɛ, ben goo kun kisirɑmɔ bɑɑ sunɔn tii. 13 Bɑ̀ n duɑ wuu gɑgu sɔɔ bɑ kukuɑ, Isirelibɑ kpuro bɑ koo wuu ge wɔri bu gen gɑni wɛ̃ɛ sɔ̃re bu gɑwɑ bu suriri kpɑ bu gen kpenu gurɑ bu dɑ bu sure wɔwɑ sɔɔ. Bɑɑ gen kpee teerɑ kun tiɑrɑmɔ.
14 Mɑ Abusɑlɔmu kɑ win tɔmbu bɑ nɛɛ, Usɑi Aɑkigiin bwisi yi, yi Ahitofɛligii kere.
N deemɑ Yinni Gusunɔwɑ u kĩ u Ahitofɛlin bwisi gee yi sĩiyɑ kpɑ kɔ̃sɑ yu Abusɑlɔmu deemɑ.
Bɑ Dɑfidi bwisi kɑ̃ u kɑ dukɑ
15 Yerɑ Usɑi u dɑ u Sɑdɔku kɑ Abiɑtɑɑ yɑ̃ku kowo be sɔ̃ɔwɑ u nɛɛ, mɛni kɑ mɛniwɑ Ahitofɛli u Abusɑlɔmu kɑ Isirelibɑn guro gurobu bwisi kɑ̃. Mɑ nɛ, nɑ mɑɑ bu sɔ̃ɔwɑ mɛni kɑ mɛni. 16 Yen sɔ̃, ɑ goo gɔrio tɛ̃ Dɑfidin mi, u nùn sɔ̃ u ku rɑɑ kpunɑ dɑɑ ten tɔburɑ yerɔ gbɑburu mi, wɔ̃ku te. U tɔburo u doonɑ kɑ win tɔmbu kpɑ bu ku rɑɑ bu nɔmɑ turi bu go.
17 N deemɑ sɑɑ ye sɔɔ, Yonɑtɑm kɑ Akimɑsi bɑ wɑ̃ɑ Eni Rogɛliɔ domi bɑ ǹ kɑ̃kɔ bu du wuuɔ goo u bu wɑ. Yen sɔ̃nɑ bɑ rɑ wɔndiɑ goo gɔri ben mi, u bu sɔ̃ kpuro ye yɑ koorɑmɔ, kpɑ be mɑɑ bu dɑ bu Dɑfidi sinɑ boko sɔ̃. 18 Adɑmɑ sɔ̃ɔ teeru, ɑluwɑɑsi goo u bu wɑ mɑ u dɑ u Abusɑlɔmu sɔ̃ɔwɑ. Yen sɔ̃nɑ bɑ seewɑ fuuku fuuku, bɑ yɑkurɑ bɑ dɑ durɔ goon yɛnuɔ Bɑhurimuɔ. N deemɑ durɔ wi, u dɔkɔ mɔ win yɛnu yɑɑrɑɔ. Mɑ bɑ duɑ ye sɔɔ bɑ kukuɑ. 19 Yerɑ durɔ win kurɔ u bekuru gɑru suɑ u kɑ dɔkɔ ye wukiri mɑ u dobi yi bɑ surɑ tɛriɑ ten wɔllɔ kpɑ bu ku kɑ giɑ mɑ bɑ wɑ̃ɑ mi. 20 Ye Abusɑlɔmun bwɑ̃ɑbɑ dɑ yɛnu mi, yerɑ bɑ kurɔ wi bikiɑ bɑ nɛɛ, mɑnɑ Akimɑsi kɑ Yonɑtɑm bɑ wɑ̃ɑ.
Mɑ kurɔ wi, u bu wisɑ u nɛɛ, bɑ dɑɑ piibu geni tɔburɑ bɑ doonɑ.
Bɑ bu kɑsu kɑsu bɑ ǹ wɑ. Mɑ bɑ gɔsirɑ Yerusɑlɛmuɔ. 21 Ye bɑ doonɑ bɑ kpɑ, yerɑ Yonɑtɑm kɑ Akimɑsi bɑ yɑrimɑ dɔkɔ yen min di, bɑ dɑ bɑ Dɑfidi gɑri yi sɔ̃ɔwɑ bɑ nɛɛ, u seewo fuuku kɑ win tɔmbu bu dɑɑ te tɔburɑ bu doonɑ. Domi ɑmɛniwɑ Ahitofɛli u Abusɑlɔmu bwisi kɑ̃ win sɔ̃.
22 Ye Dɑfidi u gɑri yi nuɑ, mɑ u seewɑ kɑ win tɔmbu u Yuudɛnin dɑɑ te tɔburɑ. Be kpurowɑ bɑ doonɑ yɑm mu sere sɑ̃rɑ.
23 Ye Ahitofɛli u wɑ bɑ ǹ kɑ win gɑri sɔmburu kue, yerɑ u win kɛtɛku gɑɑri bɔkuɑ u sĩɑ win wuuɔ, u dɑ win tiin yɛnuɔ u win yɛnugibu sɑɑriɑ kpuro mɛ bɑ koo koosinɑ. Yen biru u win tii soorɑ doke u gu. Mɑ bɑ nùn sikuɑ win bɑɑbɑn sikirɔ.
Dɑfidi u wɑ̃ɑ Mɑhɑnɑimuɔ
24 Ye Dɑfidi u turɑ Mɑhɑnɑimuɔ, sɑɑ yerɑ, Abusɑlɔmu u Yuudɛnin dɑɑru tɔburɑmɑ, wi kɑ win tɔmbu kpuro. 25 U Amɑsɑ kuɑ win tɑbu sunɔ Yoɑbun ɑyerɔ. Amɑsɑn tundon yĩsirɑ Yitirɑ, Isireli\f |b17:25 Isireli|d - Bɑndun Gɑri I, 2:17 sɔɔ bɑ nɛɛ, Yitirɑ u sɑ̃ɑwɑ Isimɛɛli.\F. Win mɛrowɑ Abigɑli, Nɑkɑsin bii. Wi kɑ Seruyɑ, Yoɑbun mɛro bɑ sɑ̃ɑwɑ mɔɔ kɑ wɔnɔ.
26 Abusɑlɔmu kɑ win tɔmbu bɑ ben sɑnsɑni girɑwɑ Gɑlɑdin temɔ.
27 Sɑɑ yè sɔɔ Dɑfidi u wɑ̃ɑ Mɑhɑnɑimuɔ, yerɑ Sobi, Nɑkɑsin bii, wi u sɑ̃ɑ Amɔnibɑn bweseru sɑɑ Rɑbɑn di, kɑ Mɑkiri Amiɛlin bii sɑɑ Lodebɑɑn di, kɑ Bɑɑsilɑi, Gɑlɑdigii, sɑɑ Rogɛlimun di, 28 bɑ kɑ Dɑfidi kpin yenu nɑɑwɑ kɑ gbɛ̃ɛ bɑsilɑbɑ, kɑ wekenu, kɑ mɑɑ dĩɑnu. Niyɑ ɑlikɑmɑ kɑ ɔɔsu, kɑ som, kɑ gbere wɔ̃ɔrɑnu kɑ swii kɑ dɑ̃si kɑ sɔ̃ki yi bɑ sɔnwɑ, 29 kɑ tim, kɑ nɑɑ bogum kɑ yɑ̃ɑ yɑɑ, kɑ gɑsɑnu. Domi bɑ nɛɛ, gɔ̃ɔru kɑ nim nɔru kɑ wɑsirɑru, yɑ ko n tɔn be wɑhɑlɑ koomɛ gbɑburun di.