Bɑ Abusɑlɔmun tɑbu kowobu
kɑmiɑ
18
1 Yen biru Dɑfidi u seewɑ u win tɑbu kowobu gɑrɑ be bɑ kɑ nùn wɑ̃ɑ. Yerɑ u bu kuɑ wuu wuukɑ tɔmbu nɔrɔm nɔrɔm (1.000) kɑ wunɔm wunɔm (100), wuu nin bɑɑtere kɑ ten wirugii. 2 Mɑ u tɔn be bɔnu kuɑ subɑ itɑ. U sube teeru suɑ u Yoɑbu Seruyɑn bii nɔmu bɛriɑ. U mɑɑ sube tee teni suɑ u Abisɑi, Yoɑbun wɔnɔ nɔmu bɛriɑ. Tee te tɑ mɑɑ tie, mɑ u Itɑi Gɑtigii wɛ̃. Mɑ u bu sɔ̃ɔwɑ u nɛɛ, nɛn tii, kon kɑ bɛɛ dɑ tɑbu gberɔ.
3 Mɑ bɑ nùn sɔ̃ɔwɑ bɑ nɛɛ, ɑ ku kɑ sun dɑ. Domi yibɛrɛbɑ bɑ̀ n sun wɔri sɑ duki mɔ̀, yɑ ǹ ko n bu gɑ̃ɑnu sɑ̃ɑ, bɑɑ bɑ̀ n bɛsɛn bɔnu go. Adɑmɑ wunɛ, bɑ̀ n nun nɔmɑ turɑ, ɑ sɑ̃ɑwɑ nge bɛsɛn nɔrɔbun subɑ wɔkuru (10.000). Yen sɔ̃, n sɑnɔ ɑ n sɔ̃ wuuɔ kpɑ ɑ n kɑ sun somimɑmɔ.
4 Mɑ sinɑ boko u bu sɔ̃ɔwɑ u nɛɛ, ye yɑ bɛɛ wɛ̃re, yeyɑ kon ko.
Mɑ u dɑ u yɔ̃ gbɑ̃rɑ kɔnnɔn bɔkuɔ sɑɑ ye tɑbu kowobu bɑ yɑriɔ wuu wuukɑ, gɑbu wunɔm wunɔm, gɑbu mɑɑ nɔrɔm nɔrɔm (1.000). 5 Sinɑ boko u Yoɑbu kɑ Abisɑi kɑ Itɑi woodɑ yeni wɛ̃ u nɛɛ, i ku kɑ Abusɑlɔmu bii ɑluwɑɑsi wi bɔɔbɔm ko, ì n yɛ̃ i mɑn kĩn nɑ.
Mɑ tɔmbu kpuro bɑ sinɑ bokon woodɑn gɑri yi nuɑ yi u wirugii be sɔ̃ɔwɑ Abusɑlɔmun sɔ̃.
6 Yerɑ bɑ yɑrɑ bɑ dɑ tɑbu gberɔ bu kɑ Isireli be bɑ Abusɑlɔmu swĩi yinnɑ. Mɑ bɑ sɑnnɔ wɔrinɑ Efɑrɑimun sɔ̃ɔwɔ. 7 Dɑ̃ɑ sɔ̃ɔ miyɑ Dɑfidin tɔn be, bɑ Abusɑlɔmugibu go go. Tɔmbu nɔrɔbun subɑ yɛndɑ (20.000) bɑ go dɔmɑ te. 8 Mɑ tɑɑ bi, bu tɛriɑ tem mɛ kpuro sɔɔ. Tɔn be bɑ kɑm kuɑ dɑ̃ɑ sɔ̃ɔ ge sɔɔ, bɑ kere be bɑ nɔmɑ turɑ bɑ go.
Yoɑbu u Abusɑlɔmu go
9 Wee ye yɑ Abusɑlɔmu deemɑ. U kurɑmɑ Dɑfidin tɑbu kowobun wuswɑɑɔ u win kɛtɛku sɔni. Yerɑ kɛtɛku ge, gɑ kɑ nùn duɑ dɑ̃ɑ bɑkɑru gɑrun kɔkɔrɔ. Miyɑ dɑ̃ɑ ten kɑ̃ɑsɑ gɑɑ yɑ win seri sɔre mɑ kɛtɛku ge, gɑ doonɑ gɑ nùn deri mi, u sɑ̃ɑre, u ǹ kɑ wɔllu, u ǹ mɑɑ kɑ tem. 10 Ye Dɑfidin tɔmbun turo u nùn wɑ, mɑ u dɑ u Yoɑbu sɔ̃ɔwɑ u nɛɛ, wee, nɑ Abusɑlɔmu wɑ u sɑ̃ɑre dɑ̃ru gɑrun kɔkɔrɔ.
11 Yoɑbu u durɔ wi sɔ̃ɔwɑ u nɛɛ, ye ɑ nùn wɑ mɛ, mbɑ n kuɑ ɑ ǹ kɑ nùn so ɑ sure, kpɑ n dɑ nun sii geesun gobi wɔkuru kɛ̃ kɑ kpɑkɑ.
12 Mɑ durɔ wi, u Yoɑbu wisɑ u nɛɛ, bɑɑ nɑ̀ n sii geesun gobi nɔrɔbu (1.000) wɑ, nɑ ǹ sinɑ bokon bii nɔmu sɔndimɔ. Domi sɑ nɔɔmɔ sɑnɑm mɛ sinɑ boko u wunɛ kɑ Abisɑi kɑ Itɑi woodɑ wɛ̃ɛmɔ u nɛɛ, i ku kɑ win bii Abusɑlɔmu bɔɔbɔm ko. 13 Yen biru nɑ̀ n woodɑ ye sɑrɑ nɑ nùn go, wunɛn tii ɑ ǹ kɑ mɑn yɔ̃rɑmɔ. Gɑ̃ɑnu mɑɑ sɑri ni nu sinɑ boko berue.
14 Mɑ Yoɑbu nɛɛ, nɑ ǹ mɑɑ yɔ̃rɑmɔ kɑm sɔɔ n kɑ tɛ kɑ wunɛn gɑri yi.
Yerɑ u dɛki itɑ suɑ yi yi nɔɔ sɛ̃u sɑ̃ɑ u dɑ mi dɑ̃ɑ te, tɑ Abusɑlɔmu sɔre. Mɑ u nùn yi sɔkurɑ win sɔndun deedeerɔ sɑnɑm mɛ u ǹ ginɑ gɔɔ kpɑ. 15 Mɑ ɑluwɑɑsi wɔku te tɑ Yoɑbun tɑbu yɑ̃nu sɔɔwɑ bɑ Abusɑlɔmu kooro bure bɑ so bɑ dɑkurɑ.
16 Yerɑ Yoɑbu u derɑ bɑ kɔbɑ so win tɔmbu bu kɑ wurɑmɑ bu ku mɑɑ Abusɑlɔmun tɔmbu nɑɑ swĩi. 17 Mɑ bɑ Abusɑlɔmun goru suɑ bɑ kpɛ̃ɛ wɔru bɔkɔ gɑgu sɔɔ dɑ̃ɑ sɔ̃ɔ mi. Yerɑ bɑ kpenu mɛnnɑ bɑ subɑ win goo ten wɔllɔ bɑ nin tɑkɑru kuɑ. Isireli be bɑ rɑɑ Abusɑlɔmu swĩi kpuro bɑ duki yɑrinɑ. Ben bɑɑwure u wurɑ win yɛnuɔ.
18 N deemɑ sɑnɑm mɛ Abusɑlɔmu u wɑ̃ɑ wɑ̃ɑru sɔɔ, u tii gɑnɑ gɑɑ bɑniɑ kɑ kpenu wɔwɑ sɔɔ ye bɑ sokumɔ sinɑ bokogiɑ. U ye kuɑwɑ bɑ n kɑ nùn yɑɑye, domi u nɛɛ, u ǹ bii mɑrɑ wi u koo de bɑ n nùn yɑɑye. Yen sɔ̃nɑ u gɑnɑ ye sokɑ kɑ win tiin yĩsiru. Yerɑ bɑ sokumɔ sere kɑ gisɔ Abusɑlɔmun yɑɑyɑtiɑ.
Bɑ Dɑfidi Abusɑlɔmun gɔɔ
sɔ̃ɔwɑ
19 Akimɑsi, Sɑdɔkun bii, u Yoɑbu sɔ̃ɔwɑ u nɛɛ, ɑ de n dukɑ dɑ n sinɑ boko lɑbɑɑri dorɑ yeni sɔ̃, mɑ Yinni Gusunɔ u nùn wɔrɑ win yibɛrɛbɑn nɔmɑn di.
20 Mɑ Yoɑbu u nùn sɔ̃ɔwɑ u nɛɛ, ɑ ǹ kɑ lɑbɑɑri ye dɔɔ gisɔ. A de sere sɑnɑm gɑm domi sinɑ bokon biiwɑ u gu.
21 Yerɑ Yoɑbu u yoo Kusigii wi u kɑ bu wɑ̃ɑ mi sɔ̃ɔwɑ u nɛɛ, ɑ doo ɑ sinɑ boko sɔ̃ ye ɑ wɑ kɑ wunɛn nɔni.
Mɑ durɔ wi, u kpunɑ Yoɑbun wuswɑɑɔ u nùn bɛɛrɛ wɛ̃. Yen biru u seewɑ u dukɑ dɑ. 22 Akimɑsi, Sɑdɔkun bii wi, u kpɑm Yoɑbu sɔ̃ɔwɑ u nɛɛ, ɑ de n Kusigii wi swĩi biruɔ bɑɑ ǹ n yen mɛren nɑ.
Mɑ Yoɑbu u nɛɛ, nɛn bii, mbɑn sɔ̃nɑ ɑ kĩ ɑ dɑ, domi lɑbɑɑri yeni, yɑ ǹ nun ɑrufɑɑni gɑɑ wɛ̃ɛmɔ ɑ̀ n ye sinɑ boko sɔ̃ɔwɑ.
23 Mɑ Akimɑsi u nɛɛ, bɑɑ ǹ n yen mɛren nɑ, kɑ mɛ, nɑ kon dɑwɑ.
Yoɑbu u nɛɛ, ǹ n mɛn nɑ, ɑ doo.
Mɑ Akimɑsi u kpɑ kɑ Yuudɛnin wɔwɑ giɑ u Kusigii wi gbiiri.
24 Sɑɑ ye sɔɔ, Dɑfidi u sɔ̃ wuun gbɑ̃rɑrun kɔnnɔsu yirun bɑɑ sɔɔ. N deemɑ wuun kɔ̃so u yɔɔwɑ dii tɛɛrɑn wɔllɔ gbɑ̃rɑrun kɔnnɔn deedeeru. Ye u wiru seeyɑ, yerɑ u wɑ wee, goo u dukɑ mɔ̀ u wee wi turo. 25 Yerɑ u nɔɔgiru suɑ u sinɑ boko sɔ̃ɔwɑ u nɛɛ, goo wɔɔ u wee!
Mɑ sinɑ boko u nɛɛ, ǹ n tɔn turon nɑ, lɑbɑɑri dorɑ u kɑ wee.
Sɑɑ ye sɔɔ, durɔ wi, u turuku mɔ̀. 26 Mɑ kɔ̃so wi, u mɑɑ goo wɑ u wee. Yerɑ u kpɑm nɔɔgiru suɑ kɔnnɔn berɑ giɑ u nɛɛ, goo wɔɔ u mɑɑ dukɑ mɔ̀ u wee!
Sinɑ boko u nùn wisɑ u nɛɛ, lɑbɑɑri dorɑ win tii u mɑɑ kɑ wee.
27 Kɔ̃so wi, u nɛɛ, wi u gbiɑ mi, win duku nɑɑsu su kɑ Akimɑsi, Sɑdɔkun biigisu weenɛ.
Mɑ sinɑ boko u nɛɛ, tɔn geowɑ. Lɑbɑɑri geɑ u kɑ sisi.
28 Ye Akimɑsi u turuku kuɑ, yerɑ u nɔɔgiru suɑ kɑ dɑm u nɛɛ, sinɑ boko, wunɛ kɑ bɑrukɑ!
Mɑ u nùn kpunɑ u geruɑ u nɛɛ, su Gusunɔ wunɛn Yinni siɑrɑ ye u kɑ wunɛ nɛn yinni wɔrɑ be bɑ nun seesimɔn nɔmɑn di.
29 Mɑ sinɑ boko u bikiɑ u nɛɛ, Abusɑlɔmu bii ɑluwɑɑsi wi, u wɑ̃ɑ ɑlɑfiɑ sɔɔ?
Akimɑsi u nùn wisɑ u nɛɛ, yinni, sɑnɑm mɛ Yoɑbu u nɛ kɑ wunɛn sɔmɔ Kusigii wi gɔrimɑ, sɑɑ yerɑ nɑ tɔn dɑbinun wurenu nuɑ, ɑdɑmɑ nɑ ǹ yɛ̃ mbɑ n kuɑ.
30 Mɑ sinɑ boko u nùn sɔ̃ɔwɑ u nɛɛ, ɑ dɛsiro minin di ɑ yɔ̃rɑ giɔ.
Yerɑ Akimɑsi u dɛsirɑ u dɑ u yɔ̃rɑ mi. 31 Sɑɑ yerɑ Kusigii wi, u mɑɑ tunumɑ sinɑ bokon mi, mɑ u nùn sɔ̃ɔwɑ u nɛɛ, nɛn yinni sinɑ boko, ɑ swɑɑ dɑkio ɑ lɑbɑɑri dorɑ nɔ. Gisɔ Yinni Gusunɔ u nun siriɑ u nun wɔrɑ be bɑ nun seesimɔ kpuron nɔmɑn di.
32 Sinɑ boko u Kusigii wi bikiɑ u nɛɛ, Abusɑlɔmu, bii ɑluwɑɑsi wi, u wɑ̃ɑ ɑlɑfiɑ sɔɔ?
Kusigii wi, u wisɑ u nɛɛ, nge mɛ n bii ɑluwɑɑsi wi kuɑ, Gusunɔ u de n wunɛn yibɛrɛbɑ kɑ be bɑ nun seesimɔ kpuro kuɑ mɛ.