Dɑfidi kɑ Sibɑ
16
1 Sɑɑ ye Dɑfidi u sɑrɑm wee, u guu ten wii kpiiru deri kese, yerɑ Sibɑ, Mɛfibosɛtin sɔm kowo u kurɑmɑ Dɑfidin wuswɑɑɔ kɑ kɛtɛkunu yiru ni u pɛ̃ɛ goobu (200) sɔbi kɑ resɛm swɑɑnu wunɔbu (100) kɑ mɑɑ dɑ̃ɑ binu gɑnun swɑɑnu wunɔbu kɑ sere tɑm mɛ bɑ doke gɔnɑn bɔɔ bɑkɑru sɔɔ. 2 Mɑ sinɑ boko u Sibɑ bikiɑ u nɛɛ, mbɑ yenibɑ.
Mɑ Sibɑ u nùn wisɑ u nɛɛ, yinni, kɛtɛku nini, nu sɑ̃ɑwɑ ni wunɛn yɛnugibu bɑ koo sɔni. Pɛ̃ɛ yeni kɑ dɑ̃ɑ bii nini, yɑ sɑ̃ɑwɑ ye wunɛn tɑbu kowobu bɑ koo di. Be bɑ mɑɑ wɑsirɑ gbɑburɔ, tɑm mɛniwɑ bɑ koo nɔ, kpɑ bu dɑm wɑ.
3 Sinɑ boko u kpɑm bikiɑ u nɛɛ, Mɛfibosɛti wunɛn yinnin debubu mɑɑ ni?
Mɑ Sibɑ u nɛɛ, u wɑ̃ɑ Yerusɑlɛmuɔ. Domi u nɛɛ, gisɔrɑ Isirelibɑ bɑ koo nùn win debun bɑndu wesiɑ.
4 Sinɑ boko u nùn sɔ̃ɔwɑ u nɛɛ, tɛ̃, ye Mɛfibosɛti u rɑɑ mɔ, yɑ kuɑ wunɛgiɑ.
Mɑ Sibɑ u kpunɑ u nùn bɛɛrɛ wɛ̃ u nɛɛ, nɑ siɑrɑ, yinni, ye ɑ kɑ mɑn durom mɛni kuɑ.
Simɛi u Dɑfidi wɔmmɔ
5-6 Ye sinɑ boko Dɑfidi u tunumɑ Bɑhurimuɔ, yerɑ Sɔɔlun dusi goo wi bɑ mɔ̀ Simɛi, Gerɑn bii, u yɑrimɑ wuu gen min di, u kpenu suɑ u Dɑfidi kɑ win sinɑ ɑsɑkpɔbu kɑsukumɔ, bɑɑ mɛ Dɑfidin tɑbu durɔbu kɑ win tɔmbu bɑ wɑ̃ɑ win nɔm geuɔ kɑ win nɔm dwɑrɔ. Mɑ u nùn wɔmmɔ, 7 u mɔ̀, ɑ doonɔ, ɑ doonɔ, tɔn gowo wunɛ, kɑm wunɛ. 8 Gusunɔ u nun mɔru kɔsie, mɑ u bɑn te suɑ u wunɛn bii Abusɑlɔmu nɔmu bɛriɑ yèn sɔ̃ ɑ Sɔɔlun yɛnugibu go mɑ ɑ bɑndu di win ɑyerɔ. Wee tɛ̃, ɑ wɔnwɔndu soore, mɛyɑ n mɑɑ kɑ nun wɑ̃, domi wunɛ tɔn gowowɑ.
9 Yerɑ Abisɑi, Seruyɑn bii, u sinɑ boko sɔ̃ɔwɑ u nɛɛ, yinni, mbɑn sɔ̃nɑ bɔ̃ɔ goo teni tɑ kɑ nun wɔmmɔ mɛ. A de n dɑ n nùn wiru burɑ.
10 Mɑ Dɑfidi u nɛɛ, yɑ ǹ bɛɛ wɑ, bɛɛ Seruyɑn bibu. Durɔ wi, ù n mɑn wɔmmɔ yèn sɔ̃ Yinni Gusunɔ u nɛɛ u ko mɛ, wɑrɑ koo nùn yinɑri. 11 Mɑ u Abisɑi kɑ win bwɑ̃ɑbu kpuro sɔ̃ɔwɑ u nɛɛ, wee, nɛn tiin bii wi nɑ mɑrɑ, u kĩ u mɑn go. Kɑɑ sere gere Bɛnyɑmɛɛ wini? Ǹ n mɛn nɑ, i de u mɑn wɔmɛ, Yinni Gusunɔ ù n nùn sɔ̃ɔwɑ mɛ. 12 Sɔrɔkudo Yinni Gusunɔ u koo nɛn wɔnwɔndu wɑ kpɑ u kɔ̃sɑ ye gɔsiɑ geɑ.
13 Ye Dɑfidi u seewɑ u win swɑɑ wɔri u doonɔ kɑ win tɔmbu, yerɑ Simɛi u sĩimɔ guu ten yɛ̃sɑɔ u bu bɛwe u bu kpenu kɑsukumɔ, u bu yɑnim wisimɔ, u Dɑfidi wɔnsimɔ. 14 Ye sinɑ boko kɑ win tɔn be, bɑ turɑ Yuudɛnin dɑɑrɔ, bɑ wɑsirɑ gem gem. Mɑ bɑ wɛ̃rɑ mi.
Abusɑlɔmu u wɑ̃ɑ
Yerusɑlɛmuɔ
15 Abusɑlɔmu u tunumɑ Yerusɑlɛmuɔ kɑ Isirelibɑ dɑbinu. Ahitofɛli u mɑɑ wɑ̃ɑ kɑ be. 16 Sɑnɑm mɛ Usɑi Aɑkigii, Dɑfidin bɔrɔ u tunumɑ Abusɑlɔmun mi, yerɑ u geruɑ u nɛɛ, sinɑ boko, wunɛn hunde yu dɑkɑɑ dɑ.
17 Mɑ Abusɑlɔmu u nùn sɔ̃ɔwɑ u nɛɛ, mbɑ n kuɑ ɑ ǹ kɑ wɑ̃ɑ wunɛn bɔrɔ Dɑfidin wuurɔ. Nge mɛyɑ ɑ kɑ nùn kĩru sɔ̃ɔsimɔ?
18 Usɑi u nùn wisɑ u nɛɛ, n ǹ mɛn bɑɑ. Domi wi Yinni Gusunɔ kɑ tɔn beni kɑ Isirelibɑ kpuro bɑ gɔsɑ, wigiiwɑ nɑ sɑ̃ɑ. Wiyɑ nɑ kon mɑɑ kɑ yɔ̃rɑ. 19 Yen biru n ǹ wunɑ win bii? Nge mɛ nɑ rɑɑ wunɛn tundo sɑ̃wɑ, nge mɛyɑ kon mɑɑ nun sɑ̃.
Abusɑlɔmu
u kɑ Dɑfidin kurɔbu kpunɑ
20 Yerɑ Abusɑlɔmu u Ahitofɛli sɔ̃ɔwɑ u nɛɛ, i wesiɑnɔ sɑnnu kpɑ i gere ye sɑ ko ko.
21 Mɑ Ahitofɛli u Abusɑlɔmu sɔ̃ɔwɑ u nɛɛ, ɑ doo ɑ kɑ wunɛn tundon kurɔ be bɑ sinɑ kpɑɑru kɔ̃su mi kpunɑ. Sɑɑ ye sɔɔrɑ Isirelibɑ kpuro bɑ koo giɑ mɑ ɑ kɑ wunɛn tundo wi kɑrɑnɑwɑ mɑm mɑm. Kpɑ be bɑ kɑ nun wɑ̃ɑ kpuro bu kɑ nun yɔ̃rɑ dim dim.
22 Mɑ bɑ Abusɑlɔmu kuru girɑ dii tɛɛrɑ wɔllɔ, mɑ u kɑ win tundon kurɔ be mɛnnɑ Isireli ben nɔni biru.
23 N deemɑ sɑɑ ye sɔɔ, bɑ rɑ n Ahitofɛlin gɑri gɑrisiwɑ nge Gusunɔn tiin gere. Mɛyɑ Abusɑlɔmu kɑ Dɑfidin tii bɑ rɑ n yi gɑrisi.