Wuu si bɑ Lefin bwese kɛrɑ wɛ̃
(I mɑɑ mɛɛrio Bɑndun Gɑri I, 6:39-66)
21
1 Lefin bwese kɛrɑn bukurobu bɑ nɑ bɑ yɑ̃ku kowo Eleɑsɑɑ kɑ Yosue Nunin bii kɑ Isirelin bwese kɛri yi yi tien bukurobu deemɑ 2 Siloɔ Kɑnɑnin temɔ. Bɑ nɛɛ, Yinni Gusunɔ u Mɔwisi woodɑ wɛ̃ u nɛɛ, u sun wusu wɛ̃ mi sɑ ko n wɑ̃ɑ kɑ sere mɑɑ kpɑrɑ yenu.
3 Yerɑ Isirelibɑ bɑ wusu gɑsu gɔsɑ ben bwese kɛrɑ bɑɑyeren tem sɔɔ kɑ kpɑrɑ yenu bɑ Lefibɑ wɛ̃ nge mɛ Yinni Gusunɔ u Mɔwisi sɔ̃ɔwɑ.
4 Ye bɑ wuu si bɔnu mɔ̀ kɑ tɛtɛ, Kehɑtin yɛnugibu be bɑ sɑ̃ɑ Aroni yɑ̃ku kowon bibu, beyɑ bɑ gbiɑ bɑ tɛtɛ di. Wusu wɔkurɑ itɑwɑ bɑ wɑ Yudɑbɑn tem sɔɔ kɑ Simɛɔbɑgim sɔɔ kɑ Bɛnyɑmɛɛbɑgim sɔɔ. 5 Ben be bɑ mɑɑ tie yɛnu ge sɔɔ, beyɑ bɑ wusu wɔkuru tɛtɛ di si su wɑ̃ɑ Efɑrɑimubɑn tem sɔɔ kɑ Dɑnubɑgim sɔɔ kɑ Mɑnɑsen bwese kɛrɑ ye yɑ wɑ̃ɑ sɔ̃ɔ duu yeru giɑn tem sɔɔ. 6 Gɛɛsɔnin yɛnugibu bɑ mɑɑ wusu wɔkurɑ itɑ tɛtɛ di si su wɑ̃ɑ Isɑkɑribɑn tem sɔɔ kɑ Asɛɛbɑgim sɔɔ, kɑ Nɛfitɑlibɑgim sɔɔ kɑ Mɑnɑsebɑgim sɔɔ mɛ mu wɑ̃ɑ Bɑsɑniɔ sɔ̃ɔ yɑri yerɔ. 7 Mɛrɑrin yɛnugibu, be, bɑ mɑɑ wusu wɔkurɑ yiru tɛtɛ di si su wɑ̃ɑ Rubɛnibɑn tem sɔɔ kɑ Gɑdibɑgim sɔɔ kɑ Sɑbulonibɑgim sɔɔ. 8 Mɛyɑ Isirelibɑ bɑ kuɑ bɑ kɑ Lefin bwese kɛrɑ ye wuu si wɛ̃ kɑ sin kpɑrɑ yenu nge mɛ Yinni Gusunɔ u Mɔwisi sɔ̃ɔwɑ.
9-10 Lefin tɔn be bɑ sɑ̃ɑ Kehɑtin yɛnugibu Aronin bweseru sɔɔ, beyɑ bɑ gbiɑ bɑ tɛtɛ di. Wuu si bɑ wɑ Yudɑbɑn tem sɔɔ kɑ Simɛɔbɑgim sɔɔ, si wee. 11 Bɑ bu Aribɑn wuu wɛ̃ ge bɑ rɑ mɑɑ soku Heboroni kɑ gen kpɑrɑ yenu. Anɑkibɑn sikɑdo Aribɑn yĩsirɑ bɑ kɑ gu sokumɔ. Gɑ wɑ̃ɑwɑ Yudɑn guunun berɑ giɑ. 12 Gen gberu kpɑɑnɛbɑrɑ bɑ rɑɑ Kɑlɛbu Yɛfunɛn bii wɛ̃. 13 Heboroni yen biru, bɑ mɑɑ bu Libinɑ wɛ̃, 14 kɑ Yɑtiri kɑ Ɛsitemɔɑ, 15 kɑ Holoni, kɑ Debiri, 16 kɑ Aini, kɑ Yutɑ, kɑ Bɛti Semɛsi. Si kpuro su sɑ̃ɑwɑ wusu nɔɔbɑ nnɛ, gen bɑɑgere kɑ gen kpɑrɑ yenu. Yudɑbɑ kɑ Simɛɔbɑn tem sɔɔrɑ si kpuro su wɑ̃ɑ. 17 Bɛnyɑmɛɛbɑn tem sɔɔ, bɑ Gɑbɑoni tɛtɛ di kɑ Gebɑ, 18 kɑ Anɑtɔtu kɑ Alimɔɔ. Wusu nnɛwɑ mi, gen bɑɑgere kɑ gen kpɑrɑ yenu. 19 Wuu si kpuro, si bɑ yɑ̃ku kowo Aronin bweseru wɛ̃ su sɑ̃ɑwɑ wɔkurɑ itɑ, gen bɑɑgere kɑ gen kpɑrɑ yenu.
20 Kehɑtin yɛnugii be bɑ tie Aronin bwese te sɔɔ, bɑ mɑɑ wusu wɑ Efɑrɑimubɑn tem sɔɔ. 21 Siyɑ Sikɛmu ye yɑ wɑ̃ɑ Efɑrɑimun guunun berɑ giɑ mi bɑ ko n dɑ kpikiru de, kɑ Gesɛɛ, 22 kɑ Kibisɑimu kɑ Bɛti Horoni. Si kpuro su sɑ̃ɑwɑ wusu nnɛ, gen bɑɑgere kɑ gen kpɑrɑ yenu. 23 Dɑnubɑn tem sɔɔ, bɑ bu Ɛliteke wɛ̃ kɑ Gibetoni, 24 kɑ Ayɑloni kɑ Gɑti Rimɔɔ. Si kpuro su sɑ̃ɑwɑ wusu nnɛ, gen bɑɑgere kɑ gen kpɑrɑ yenu. 25 Mɑnɑsen bwese kɛrɑ ye yɑ wɑ̃ɑ sɔ̃ɔ duu yeru giɑn temɔ be, bɑ mɑɑ bu wusu yiru wɛ̃, Tɑnɑki kɑ Gɑti Rimɔɔ, gen bɑɑgere kɑ gen kpɑrɑ yenu. 26 Wuu si bɑ bu wɛ̃ mi kpuro su sɑ̃ɑwɑ wɔkuru, gen bɑɑgere kɑ gen kpɑrɑ yenu. 27 Lefi be bɑ tie bɑ sɑ̃ɑ Gɛɛsɔnin yɛnugibu, bɑ mɑɑ wusu yiru wɑ Mɑnɑsen bwese kɛrɑ ye yɑ wɑ̃ɑ sɔ̃ɔ yɑri yeru giɑn temɔ. Wuu siyɑ Golɑni, Bɑsɑnin temɔ mi bɑ ko n dɑ kpikiru de kɑ Bɛsitɑrɑ, gen bɑɑgere kɑ gen kpɑrɑ yenu. 28 Isɑkɑribɑn tem sɔɔ, bɑ bu Kisioni wɛ̃ kɑ Dɑbɑrɑti, 29 kɑ Yɑɑmuti, kɑ Eni Gɑnimu. Si kpuro su kuɑwɑ wusu nnɛ, gen bɑɑgere kɑ gen kpɑrɑ yenu. 30 Asɛɛbɑn tem sɔɔ, bɑ bu Mikɑli kɑ Abudoni kɑ Hɛlikɑti 31 kɑ Rehɔbu wɛ̃. Si kpuro su kuɑwɑ wusu nnɛ, gen bɑɑgere kɑ gen kpɑrɑ yenu. 32 Nɛfitɑlibɑgim sɔɔ mɑɑ, bɑ bu Kedɛsi wɛ̃ ye yɑ wɑ̃ɑ Gɑlilen temɔ, mi bɑ ko n dɑ kpikiru de, kɑ Hɑmɔti Dori, kɑ Kɑɑtɑni. Siyɑ su kuɑ wusu itɑ, gen bɑɑgere kɑ gen kpɑrɑ yenu. 33 Wuu si Gɛɛsɔni be, bɑ tɛtɛ di mi, su sɑ̃ɑwɑ wɔkurɑ itɑ, gen bɑɑgere kɑ gen kpɑrɑ yenu.
34 Be bɑ sɑ̃ɑ Mɛrɑribɑ Lefin bwese te sɔɔ, bɑ mɑɑ bu wusu nnɛ wɛ̃, gen bɑɑgere kɑ gen kpɑrɑ yenu Sɑbulonibɑn tem sɔɔ. Wuu siyɑ Yokunɛɑmu kɑ Kɑɑtɑ 35 kɑ Dimmɑ kɑ Nɑhɑlɑli. 36 Rubɛnibɑn tem sɔɔ bɑ bu wusu nnɛ wɛ̃, gen bɑɑgere kɑ gen kpɑrɑ yenu. Siyɑ Besɛɛ kɑ Yɑsɑ, 37 kɑ Kedemɔti kɑ Mɛfɑti. 38-39 Gɑdibɑn tem sɔɔ, Mɛrɑri be, bɑ mɑɑ wusu nnɛ wɑ, gen bɑɑgere kɑ gen kpɑrɑ yenu. Wuu siyɑ Mɑhɑnɑimu kɑ Hɛsiboni kɑ Yesɛɛ kɑ Rɑmɔti ye yɑ wɑ̃ɑ Gɑlɑdin temɔ, mi bɑ ko n dɑ kpikiru de. 40 Wuu si Mɛrɑri be, bɑ tɛtɛ di, si kpuro su sɑ̃ɑwɑ wɔkurɑ yiru.
41-42 Wuu si Lefin bwese kɛri yi wɑ Isirelin bwese kɛri yi yi tien mi, su kuɑwɑ weerɑɑkuru yiru sɑri, gen bɑɑgere kɑ gen kpɑrɑ yenu.
43 Nge mɛsumɑ Yinni Gusunɔ u kɑ Isirelibɑ tem mɛ kpuro wɛ̃ nge mɛ u ben sikɑdobɑ nɔɔ mwɛɛru kuɑ. Mɑ bɑ sinɑ mɛ sɔɔ, mu kuɑ begim. 44 Mɛyɑ u mɑɑ derɑ bɑ wɑ̃ɑ bɔri yɛndu sɔɔ, nge mɛ u rɑɑ ben sikɑdobɑ nɔɔ mwɛɛru kuɑ. U bu ben yibɛrɛbɑ kpuro nɔmu bɛriɑ. Ben goo sɑri wi u kɑ tii yinɑ. 45 Nge mɛyɑ Yinni Gusunɔ u kɑ win nɔɔ mwɛɛ ni kpuro yibiɑ ni u Isirelibɑ kuɑ, bɑɑ nin teeru tɑ ǹ kɑm wɔrɑ.