Isirelibɑ bɑ Yeriko kpeerɑsiɑ
6
1 Yerikogibu bɑ ben wuun gbɑ̃rɑrun gɑmbobɑ bɛri, bɑ dɑ̃ɑ sɛ̃siki, Isirelibɑ bu ku kɑ du. Goo kun duɔ mi, goo kun mɑɑ yɑriɔ min di. 2 Mɑ Yinni Gusunɔ u Yosue sɔ̃ɔwɑ u nɛɛ, wee, nɑ nun Yeriko nɔmu bɛriɑ kɑ yen sunɔ kɑ yen tɑbu durɔ dɑmgibu. 3 Wunɛ kɑ wunɛn tɑbu durɔbu kpuro i n dɑ sĩ sĩ i kɑ wuu ge sikerenɑ nɔn teeru tɔ̃ru bɑɑtere sere n kɑ ko sɔ̃ɔ nɔɔbɑ tiɑ. 4 Yɑ̃ku kowobu nɔɔbɑ yiru bɑ ko n Yinni Gusunɔn woodɑn kpɑkororu gbiiye bɑ n yɑɑ kɔbi nɛni. Sɔ̃ɔ nɔɔbɑ yiruse i ko wuu ge sikerenɑwɑ nɔn nɔɔbɑ yiru kpɑ yɑ̃ku kowo be, bɑ n kɔbi yi soomɔ. 5 Bɑ̀ n kɔbi yi so bɑ gɑwɑ, mɑ i yin swĩi nuɑ, tɔmbu kpuro bu tɑbun kuuki koowo. Sɑɑ yerɑ wuu gen gbɑ̃rɑru tɑ koo wɔrumɑ, kpɑ bɑɑwure u du deedeeru mi u yɔ̃n di.
6 Mɑ Yosue Nunin bii u yɑ̃ku kowobu sokɑ u bu sɔ̃ɔwɑ u nɛɛ, bu Yinni Gusunɔn woodɑn kpɑkororu suo bu senu sɔndi kpɑ ben nɔɔbɑ yiru bu kɔbi suɑ bu woodɑn kpɑkoro te gbiiyɑ.
7 Yerɑ u win tɔmbu sɔ̃ɔwɑ u nɛɛ, i seewo i sĩ sĩ i n kɑ wuu ge sikerenɑmɔ, kpɑ tɑbu kowobu gɑbu bɑ n woodɑn kpɑkoro te gbiiye.
8-9 Ye Yosue u kɑ tɔn be gɑri yi kuɑ u kpɑ, mɑ bɑ swɑɑ wɔri. Tɑbu kowo be, bɑ gbiɑ, mɑ yɑ̃ku kowo be bɑ kɔbi nɛni bɑ swɑɑ wɔri bɑ kɔbi yi soomɔ. Mɑ bɑ kɑ bu woodɑn kpɑkoro te swĩi biruɔ. Tɑbu kowo be bɑ mɑɑ tie, bɑ kpɑkoro te swĩi. Sɑɑ ye be kpuro bɑ sĩimɔ bɑ wuu ge sikerenɑmɔ, yɑ̃ku kowo be, bɑ ben kɔbi soomɔ. 10 N deemɑ Yosue u rɑɑ tɔn be yiire bu ku gbɑ̃rɑ, bu ku wɔki, bu ku mɑm de gɑri gɛɛ yi yɑri ben nɔsun di, sere tɔ̃ɔ te u koo bu sɔ̃ bu kuuki ko. Tɔ̃ɔ terɑ bɑ koo kuuki ko. 11 Yerɑ bɑ kɑ woodɑn kpɑkoro te wuu ge sikerenɑ nɔn teeru. Mɑ bɑ wurɑ ben sɑnsɑniɔ sere mɑɑ sisiru.
12 Yosue u seewɑ buru buru yellu mɑ yɑ̃ku kowobu bɑ woodɑn kpɑkoro te suɑ. 13 Ben nɔɔbɑ yiru be bɑ kɔbi nɛni, bɑ swɑɑ wɔri bɑ sĩimɔ ten wuswɑɑɔ. Tɑbu kowobu gɑbu bɑ bu gbiiye bɑ tɑbu yɑ̃nu bɛki. Mɑ gɑbu bɑ kpɑkoro te swĩi biruɔ, sɑɑ ye be kpuro bɑ sĩimɔ mɑ yɑ̃ku kowo be, bɑ kɔbi yi soomɔ. 14 Sɔ̃ɔ yiruse bɑ wuu ge sikerenɑ nɔn teeru mɑ bɑ wurɑ ben sɑnsɑniɔ. Nge mɛyɑ bɑ kuɑ sere n kɑ kuɑ sɔ̃ɔ nɔɔbɑ tiɑ. 15 Ye n kuɑ sɔ̃ɔ nɔɔbɑ yiruse, mɑ bɑ seewɑ buru buru yɑm sɑ̃reru bɑ wuu ge sikerenɑ nɔn nɔɔbɑ yiru. Tɔ̃ɔ te tɔnɑwɑ bɑ gu sikerenɑ nɔn nɔɔbɑ yiru. 16 Nɔn nɔɔbɑ yiruse te, sɑɑ ye yɑ̃ku kowo be, bɑ kɔbi yi so, yerɑ Yosue u tɔn be sɔ̃ɔwɑ u nɛɛ, i kuuki koowo. Domi Yinni Gusunɔ u bɛɛ wuu ge nɔmu bɛriɑ. 17 I ǹ ko i ko i kun wuu ge kɑ ye yɑ wɑ̃ɑ ge sɔɔ kpuro kpeerɑsie. Yɑ ko n sɑ̃ɑwɑ nge yɑ̃ku dɔ̃ɔ mwɑɑrɑrugiru Yinni Gusunɔn sɔ̃. Adɑmɑ i ko i Rɑhɑbu, kurɔ tɑnɔ wi, kɑ wigii be bɑ wɑ̃ɑ win dirɔ deri, yèn sɔ̃ u tɔn be sɑ rɑɑ gɔrɑ mi beruɑ. 18 I n tii sɛ kɑ gɑ̃ɑ ni Yinni Gusunɔ u nɛɛ, i kpeerɑsiɑ. Domi ì n nu suɑ, bɛsɛ Isirelibɑ sɑ ko nɔni swɑ̃ɑru wɑ kpɑ su kɑm ko. 19 Adɑmɑ ye n sɑ̃ɑ sii geesu kɑ wurɑ, kɑ sii gɑndu kɑ sere sii wɔ̃kusu, ye kpurowɑ i ko Yinni Gusunɔ gurɑ i yiiyɑ win ɑrumɑnin beru yerɔ.
20 Ye yɑ̃ku kowobu bɑ ben kɔbi so, tɔn be, bɑ yin swĩi nuɑ mɑ bɑ kuuki kuɑ. Yerɑ wuu gen gbɑ̃rɑrɑ wɔrumɑ. Mɑ ben bɑɑwure u duɑ deedeeru mi u yɔ̃n di. Mɑ bɑ wuu ge mwɑ. 21 Mɑ bɑ ye yɑ wɑ̃ɑ ge sɔɔ kpuro go mɑm mɑm kɑ tɑkobi, tɔn durɔbu kɑ tɔn kurɔbu, bibu kɑ bukurobu, kɑ yɑɑ sɑbenu kpuro.
Yosue u Rɑhɑbu kɑ wigibu
fɑɑbɑ kuɑ
22 N deemɑ Yosue u rɑɑ durɔbu yiru be bɑ tem mɛn sɑriɑ mɛɛrim dɑ sɔ̃ɔwɑ u nɛɛ, bu doo kurɔ win dirɔ kpɑ bu wi kɑ wigibu kpuro yɑrɑmɑ nge mɛ bɑ rɑɑ yen nɔɔ mwɛɛru kuɑ kɑ bɔ̃ri.
23 Mɑ durɔ be, bɑ duɑ bɑ Rɑhɑbu yɑrɑmɑ kɑ win bɑɑ kɑ win mɛro kɑ win sesubu, win mɛro bisibu kpuro gesi, bɑ kɑ bu dɑ Isirelibɑn sɑnsɑnin biruɔ. 24 Yen biruwɑ bɑ wuu ge dɔ̃ɔ sɔkɑ kɑ bɑɑyere kpuro ye yɑ wɑ̃ɑ wuu ge sɔɔ mɑ n kun mɔ ye n sɑ̃ɑ sii geesu, kɑ wurɑ, kɑ sii gɑndu kɑ sere sii wɔ̃kusu. Yerɑ bɑ doke Yinni Gusunɔn sɑ̃ɑ yerun ɑrumɑnin beru yerɔ. 25 Yosue u Rɑhɑbu, kurɔ tɑnɔ wi fɑɑbɑ kuɑ kɑ win mɛro bisibu kpuro. Mɑ bɑ wɑ̃ɑ kɑ Isirelibɑ sɑnnu sere kɑ gisɔ yèn sɔ̃ u Yosuen tɔmbu beruɑ be u gɔrɑ bu Yerikon sɑriɑ mɛɛri.
26 Yen biruwɑ Yosue u bɔ̃ruɑ u nɛɛ,
bɑɑwure wi u seewɑ u Yeriko bɑnɑ kpɑm,
u koo ko bɔ̃ruro Yinni Gusunɔn wuswɑɑɔ.
Ù n kpɛɛkpɛɛku surɑmɔ,
win bii gbiikoowɑ u koo gbi.
Ù n mɑɑ bɑnɑ wiru go u gɑmbobɑ dokemɔ,
kpɑ win bii dɑ̃ɑko u gbi.
27 Mɑ Yinni Gusunɔ u wɑ̃ɑ kɑ Yosue mɑ u yĩsiru yɑrɑ tem mɛ kpuro sɔɔ.