Yosue 5

¹ Sɑɑ ye sɔɔ, Amɔrebɑn sinɑm be bɑ wɑ̃ɑ Yuudɛnin sɔ̃ɔ duu yeru giɑ kɑ Kɑnɑnigii be bɑ wɑ̃ɑ nim wɔ̃ku ge bɑ mɔ̀ Mɛditerɑnɛn berɑ giɑ, be kpuro bɑ nuɑ mɑ Yinni Gusunɔ u Yuudɛnin nim gberɑsiɑ Isirelibɑn wuswɑɑɔ sere bɑ kɑ tɔburɑ bɑ kpɑ. Yerɑ bɑ nɑndɑ mɑ ben toronu kɑrɑ Isireli ben sɔ̃.

Bɑ Isirelibɑ bɑngo kuɑ

Giligɑliɔ

² Sɑnɑm mɛ sɔɔrɑ Yinni Gusunɔ u Yosue sɔ̃ɔwɑ u nɛɛ, ɑ wobunu koowo kɑ kpenu kpɑ ɑ Isireli be kpuro bɑngo ko be bɑ mɑrɑ gbɑburɔ.

³ Mɑ Yosue u kuɑ nge mɛ Yinni Gusunɔ u geruɑ, u Isirelibɑ bɑngo ye kuɑ guuru gɑrun mi, mɑ bɑ tu sokɑ Bɑngon kperu. ^4-5 N deemɑ be bɑ yɑrimɑ Egibitin di mi, be kpurowɑ bɑ bɑngo sɑ̃ɑ. Adɑmɑ be bɑ mɑrɑ gbɑburɔ, bɑ ǹ ben goo bɑngo kue. Mɑ ben tɔn durɔ be bɑ tɑbu toobun sɑkɑ turɑ bɑ kɑ yɑrɑ Egibitin di mi, be kpuro bɑ gu gbɑburɔ swɑɑ sɔɔ sɑnɑm mɛ bɑ wee. ⁶ Domi Isirelibɑ bɑ sĩɑ wɔ̃ɔ weeru gbɑburu mi, mɑ ben tɑbu durɔ be bɑ rɑɑ bɑngo sɑ̃ɑ, bɑ kɑm kuɑ, yèn sɔ̃ bɑ ǹ Yinni Gusunɔn gere mɛm nɔɔwɛ. Mɑ u geruɑ kɑ bɔ̃ri u nɛɛ, bɑ ǹ koo mɑɑ tem mɛ wɑ mɛ mu tim kɑ bom yibɑ, mɛ u ben bɑɑbɑbɑ nɔɔ mwɛɛru kuɑ. ⁷ Ben bii be Yinni Gusunɔ u seeyɑ ben ɑyenɔ, beyɑ Yosue u bɑngo kuɑ, domi bɑ ǹ dɑɑ bu bɑngo kue swɑɑɔ. ⁸ Sɑɑ ye bɑ tɔn be bɑngo kuɑ, bɑ sinɑ sɑnsɑniɔ sɛ̃ɛ sere ben boo u kɑ kpɑ. ⁹ Yerɑ Yinni Gusunɔ u Yosue sɔ̃ɔwɑ u nɛɛ, gisɔrɑ nɑ bɛɛ seku te wunɑri te i rɑɑ mɔ sɑɑ ye i sɑ̃ɑ yobu Egibitiɔ.

Yen sɔ̃nɑ bɑ yɑm mi sokumɔ Giligɑli sere kɑ gisɔ. Yĩsi ten tubusiɑnɑ, bɑ wunɑ.

Bɑ Gɔɔ sɑrɑribun

tɔ̃ɔ bɑkɑru di

¹⁰ Isirelibɑ bɑ sinɑ ben sɑnsɑniɔ Giligɑli mi, ye yɑ wɑ̃ɑ wɔwɑɔ Yerikon bɔkuɔ. Mɑ bɑ Gɔɔ sɑrɑribun tɔ̃ɔ bɑkɑru di surun sɔ̃ɔ wɔkurɑ nnɛsen yokɑ. ¹¹ Tɔ̃ɔ bɑkɑ ten sisirɑ bɑ tem mɛn dĩɑnu dibu toruɑ. Bɑ dobi sɔnwɑ bɑ temɑ, bɑ mɑɑ pɛ̃ɛ di ye bɑ kun seeyɑtiɑ doke. ¹² Dɔmɑ terɑ mɑnnɑ yɑ yɔ̃rɑ mɑ bɑ Kɑnɑnin tem min dĩɑnu dim toruɑ wɔ̃ɔ ge.

Yosue kɑ durɔ

wi u tɑkobi nɛni

¹³ Ye Yosue u Yeriko turuku kuɑ, subɑru sɔɔ u durɔ goo wɑ u yɔ̃ win wuswɑɑɔ u tɑkobi womɛ u nɛni. Yerɑ u susi durɔ win mi, u nɛɛ, wunɛ bɛsɛgiiwɑ? Nge wɛrɔwɑ ɑ sɑ̃ɑ.

¹⁴ Durɔ wi, u wisɑ u nɛɛ, ɑɑwo, nɑ ǹ yen goo. Nɑ sɑ̃ɑwɑ Yinni Gusunɔn tɑbu kowobun wirugii. Yen sɔ̃nɑ nɑ nɑ wunɛn mi tɛ̃.

Ye Yosue u nuɑ mɛ, mɑ u kpunɑ u wuswɑɑ tem girɑri, u nɛɛ, yinni, nɑ sɑ̃ɑwɑ wunɛn bɔ̃ɔ, mbɑ ɑ kĩ ɑ mɑn sɔ̃.

¹⁵ Tɑbu kowobun wirugii wi, u Yosue sɔ̃ɔwɑ u nɛɛ, ɑ wunɛn sɑlubɑtɑ poto, domi yɑm mi ɑ yɔ̃ mi, Gusunɔ u wɑ̃ɑ mi.

Mɑ Yosue u kuɑ mɛ.