Wuu sìn mi bɑ rɑ kpikiru de
20
1 Yinni Gusunɔ u Yosue sɔ̃ɔwɑ u nɛɛ, 2 ɑ Isirelibɑ sɔ̃ɔwɔ bu wusu gɔsio sìn mi bɑ ko n dɑ kpikiru de nge mɛ nɑ rɑɑ Mɔwisi sɔ̃ɔwɑ. 3 Bɛɛn suunu sɔɔ, goo ù n win winsim go u kun kĩ, u koo kpĩ u dɑ u kuke wuu sin teu sɔɔ. Sɑnɑm mɛ, wi u nùn nɑɑ swĩi u go, u kɑ mɔru kɔsiɑ, u ǹ mɑɑ nùn goomɔ. 4 Ù n turɑ wuu sin gɑgu sɔɔ, u koo yɔ̃rɑwɑ wuu gen gbɑ̃rɑ kɔnnɔwɔ mi guro gurobu bɑ rɑ siri, kpɑ u tii tusiɑ u gere ye yɑ nùn deemɑ. Sɑɑ ye sɔɔ, bɑ koo nùn wɑ̃ɑ yeru kɑsuɑ wuu ge sɔɔ. 5 Wi u mɑɑ nùn nɑɑ swĩi mi, ù n tunumɑ wuu gen mi, bɑ ǹ mɑɑ wiɔnɔ yɑrɑmɑmɔ u sere nùn go. Domi u ǹ kĩ u kɑ tɔnu wi go. 6 Wuu gen bukurobu bɑ̀ n nùn siri, miyɑ u ko n wɑ̃ɑ sere yɑ̃ku kowo tɔnwero u kɑ gbi. Yen biruwɑ u koo den kpĩ u wurɑ win wuuɔ, u n tii mɔ.
7 Mɑ Isirelibɑ bɑ wuu sini gɔsɑ mi bɑ ko n dɑ kpikiru we. Siyɑ Kedɛsi ye yɑ wɑ̃ɑ Gɑlileɔ, Nɛfitɑlin guunun berɑ giɑ, kɑ Sikɛmu ye yɑ wɑ̃ɑ Efɑrɑimun guunun berɑ giɑ, kɑ Aribɑn wuu ye bɑ mɔ̀ Heboroni ye yɑ wɑ̃ɑ Yudɑn guunun berɑ giɑ. 8 Yuudɛnin guru giɔ bɑ mɑɑ Besɛɛ gɔsɑ Yerikon sɔ̃ɔ yɑri yeru giɑ bɑtumɑɔ mi gɑ̃ɑnu ku rɑ kpi, Rubɛnibɑn tem sɔɔ, kɑ Rɑmɔti ye yɑ wɑ̃ɑ Gɑlɑdiɔ, Gɑdibɑn tem sɔɔ, kɑ Golɑni ye yɑ wɑ̃ɑ Bɑsɑniɔ Mɑnɑsebɑn tem sɔɔ. 9 Wuu siyɑ bɑ gɔsɑ mi goo wi u ǹ kĩ u kɑ tɔnu go, u koo kpĩ u kpikiru dɑ, ǹ n Isirelin nɑ, ǹ n mɑɑ tɔn tukon nɑ, bɑ̀ n nùn gire bu go. Bɑ ǹ kpɛ̃ bu nùn go bɑ kun nùn siri.