Bɑ Yuudɛnin sɔ̃ɔ duu yerun
berɑ bɔnu kuɑ
14
1 Yɑ̃ku kowo Eleɑsɑɑ kɑ Yosue, Nunin bii, kɑ Isirelibɑn bwese kɛrɑ bɑɑyeren guro gurobu berɑ bɑ Isirelibɑ tem bɔnu kuɑ. Wee nge mɛ bɑ mu bɔnu koosinɑ. 2 Bwese kɛrɑ nɔɔbɑ nnɛ kɑ Mɑnɑsen bwese kɛrɑn sukum ye yɑ tie ye yɑ ǹ dɑɑ tem wɑ, yerɑ bɑ tem mɛ bɔnu kuɑ. Tɛtɛwɑ bɑ kɑ mu bɔnu kuɑ nge mɛ Yinni Gusunɔ u Mɔwisi sɔ̃ɔwɑ bu ko. 3 N deemɑ Mɔwisi u rɑɑ Isirelibɑn bwese kɛrɑ yiru kɑ Mɑnɑsen bwese kɛrɑn sukum tem wɛ̃ Yuudɛnin sɔ̃ɔ yɑri yeru giɑ. Adɑmɑ u ǹ Lefibɑ tem gɑm wɛ̃, 4 mɑ n kun mɔ wusu gɑsu kɑ sin kpɑrɑ yenu. Mɑnɑse kɑ Efɑrɑimu bɑ sɑ̃ɑwɑ Yosɛfun bibu. Berɑ bɑ kuɑ bwese kɛrɑ yiru. 5 Isirelibɑ bɑ tem mɛ bɔnu kuɑwɑ nge mɛ Yinni Gusunɔ u Mɔwisi sɔ̃ɔwɑ.
6 Sɔ̃ɔ teeru Yudɑn bibu bɑ Yosue deemɑ Giligɑliɔ. Mɑ Kɑlɛbu, Yɛfunɛ Kenisin bii, u Yosue sɔ̃ɔwɑ u nɛɛ, wunɛn tii ɑ yɑɑye ye Yinni Gusunɔ u win sɔm kowo Mɔwisi sɔ̃ɔwɑ nɛ kɑ wunɛn sɔ̃ Kɑdɛsi Bɑɑnɛɑɔ. 7 Nɛ Kɑlɛbu, wɔ̃ɔ weeruwɑ nɑ mɔ sɑnɑm mɛ Mɔwisi Gusunɔn sɔm kowo u mɑn gɔrɑ Kɑdɛsi Bɑɑnɛɑn di n nɑ n tem mɛ bɔsu bɔsu n mɛn sɑriɑ mɛɛri. Nɑ nɑ nɑ bɔsu nɑ mɛɛrɑ. Mɑ nɑ wurɑ nɑ nùn sɔ̃ɔwɑ mɑm mɑm ye nɑ wɑ. 8 Adɑmɑ be bɑ mɑn yɔ̃sirimɑ nɑ kɑ tem mɛ mɛɛrim nɑ mi, bɑ derɑ tɔmbɑ tem mɛ bwɛ̃rɑ yɑrɑ. Adɑmɑ nɛ, nɑ Gusunɔn gere mɛm nɔɔwɑwɑ mɑm mɑm. 9 Yen dɔmɑ terɑ Mɔwisi u bɔ̃ruɑ u nɛɛ, berɑ mi nɛn tii nɑ mɛɛrim dɑ mi, yɑ koo ko nɛ kɑ nɛn bibun bweserugiɑ sere kɑ bɑɑdommɑɔ yèn sɔ̃ nɑ Gusunɔn gere mɛm nɔɔwɑ mɑm mɑm. 10 Yen wɔ̃ɔ weeru kɑ nɔɔbuwɑ mini ye Yinni Gusunɔ u kɑ Mɔwisi gɑri yi sɔ̃ɔwɑ sɑɑ ye bɛsɛ Isirelibɑ sɑ wɑ̃ɑ gbɑburɔ. Sɑɑ mɑɑ dɔmɑ ten diyɑ Yinni Gusunɔ u mɑn kɔ̃su nge mɛ u nɔɔ mwɛɛru kuɑ sere nɑ kɑ gisɔ wɔ̃ɔ wɛnɛ kɑ nɔɔbu turɑ. 11 Kɑ mɛ, nɑ dɑm mɔ sere kɑ gisɔ n kɑ tɑbu dɑ, ǹ kun mɛ n kɑ sɔmburu gɑru ko, nge mɛ nɑ rɑɑ mɔ sɑnɑm mɛ Mɔwisi u mɑn gɔrimɑ n tem mɛn sɑriɑ mɛɛri. 12 Yen sɔ̃ tɛ̃, ɑ mɑn guunun berɑ giɑ wɛ̃ɛyɔ mi Yinni Gusunɔ u mɑn nɔɔ mwɛɛru kuɑ. Nɑ nùn sɔ̃ɔwɑ mɑ Anɑkin bweserɑ tɑ wɑ̃ɑ berɑ mi. Bɑ ben wusu gbɑ̃rɑnu toosiwɑ mɑm mɑm. Yen sɔ̃, Gusunɔ ù n kɑ mɑn wɑ̃ɑ, kon tem mɛ mwɑ nge mɛ win tii u geruɑ.
13-14 Yosue u Kɑlɛbu Yɛfunɛ Kenisin bii domɑru kuɑ. Mɑ u nùn Heboronin berɑ wɛ̃. Yerɑ yɑ kuɑ wigiɑ yèn sɔ̃ u Gusunɔ ben Yinnin gere mɛm nɔɔwɑ mɑm mɑm. 15 Heboroni yerɑ bɑ rɑ rɑɑ soku Aribɑn wuu. Aribɑ wi, u yĩsiru yɑrɑ Anɑkin bweseru sɔɔ.
Yenibɑ kpuron biruwɑ Isirelibɑ bɑ wɛ̃rɑ bɑ ǹ mɑɑ tɑbu kue.