Tem mɛ mu tie
Isirelibɑ bu mwɑ
13
1 Yosue u tɔkɔ kuɑ gem gem. Yerɑ Yinni Gusunɔ u nùn sɔ̃ɔwɑ u nɛɛ, wee, ɑ tɔkɔ kuɑ. Adɑmɑ tem mɛ mu tie mu kpɑ̃ mɛ Isirelibɑ bɑ ǹ ginɑ mwɛ. 2 Mɛyɑ Filisitibɑn tem kɑ Gesuribɑn tem 3 kɑ Afɑbɑn tem mɛ mu wɑ̃ɑ sɔ̃ɔ yɛ̃sɑn nɔm dwɑrɔ. Tem mɛ kpuro mu sɑ̃ɑwɑ Kɑnɑnibɑn tem. Mu wɑ̃ɑwɑ sɑɑ dɑɑ te bɑ mɔ̀ Sikorin di te tɑ wɑ̃ɑ Egibitin tem nɔɔ burɑ yerɔ, sere Ekoronin tem nɔɔ burɑ yerɔ sɔ̃ɔ yɛ̃sɑn nɔm geu giɑ. Mɛn wuu mɑroɔwɑ Filisitibɑn sinɑmbu nɔɔbu bɑ wɑ̃ɑ. Wuu siyɑ Gɑsɑ kɑ Asidɔdu kɑ Asikɑloni kɑ Gɑti kɑ Ekoroni. 4 Kɑnɑnin tem mɛ mu mɑɑ tie bu mwɑ, mu wɑ̃ɑwɑ sɑɑ Mɛɑrɑn di ye yɑ sɑ̃ɑ Sidonigibun wuu, n kɑ girɑri Afɛkiɔ Amɔrebɑn tem nɔɔ burɑ yerɔ, 5 kɑ mɑɑ Gibɑligibun tem, kɑ sere Libɑnin tem kpuro sɔ̃ɔ yɑri yeru giɑ, sɑɑ Bɑɑli Gɑdi ye yɑ wɑ̃ɑ guu te bɑ mɔ̀ Hɛɛmɔɔn gɑ̃ɑrɔn di n kɑ girɑri Hɑmɑtin duu yerɔ, 6 kɑ sere Libɑnin guunun berɑ giɑ n kɑ dɑ Miserefɔti Mɑimuɔ mi Sidonigibu bɑ wɑ̃ɑ. Nɛ, Yinni Gusunɔ kon bu tem mɛn tɔmbu girɑ kpɑ ɑ bu tem mɛ bɔnu kuɑ kɑ tɛtɛ nge mɛ nɑ nun yiire ɑ ko. 7 Ben bwese kɛri nɔɔbɑ nnɛ ye kɑ Mɑnɑsen bwese kɛrɑn sukum be bɑ ǹ dɑɑ gɑ̃ɑnu wɑ, berɑ kɑɑ tem mɛ bɔnu kuɑ.
Bɑ tem mɛ mu wɑ̃ɑ Yuudɛnin
sɔ̃ɔ yɑri yeru giɑ bɔnu kuɑ
8 Mɔwisi, Gusunɔn sɔm kowo u Rubɛnin bwese kɛrɑ kɑ Gɑdibɑ kɑ Mɑnɑsen bwese kɛrɑn sukum tem bɔnu kuɑ mɛ mu wɑ̃ɑ Yuudɛnin dɑɑrun sɔ̃ɔ yɑri yeru giɑ. 9 Ben tem mɛ, mu wɑ̃ɑwɑ sɑɑ Aroɛɛn di ye yɑ wɑ̃ɑ dɑɑ te bɑ mɔ̀ Aɑnɔɔn goorɔ, sɔ̃ɔ yɛ̃sɑn nɔm dwɑru giɑ n kɑ dɑ wuu ge gɑ wɑ̃ɑ dɑɑ ten wɔwɑn suunu sɔɔ, sere Diboniɔ Mɛdibɑn bɑtumɑ sɔɔ, 10 kɑ wuu si Sihoni Amɔrebɑn sinɑ boko wi u wɑ̃ɑ Hɛsiboniɔ u mɔ n kɑ girɑri Amɔnibɑn tem nɔɔ burɑ yerɔ, 11 kɑ Gɑlɑdiɔ ye yɑ sɑ̃ɑ Gesuribɑ kɑ Mɑɑkɑgibun tem kɑ sere guu te bɑ mɔ̀ Hɛɛmɔɔwɔ, kɑ Bɑsɑniɔ n kɑ girɑri Sɑlikɑɔ, 12 kɑ sere sinɑ boko Ogun temɔ wi u rɑɑ wɑ̃ɑ Bɑsɑniɔ u bɑndu dii Asitɑrɔtuɔ kɑ Edɛɛɔ. Wiyɑ u tie Refɑn bweseru sɔɔ. Sinɑm be yiru kpurowɑ Mɔwisi u kɑmiɑ u ben tem mwɛɛrɑ. 13 Adɑmɑ Isirelibɑ bɑ ǹ Gesuribɑ kɑ Mɑɑkɑgibu gire. Yen sɔ̃nɑ bwesenu yiru ye, yɑ wɑ̃ɑ Isirelibɑn suunu sɔɔ sere kɑ gisɔn gisɔ.
14 Lefin bwese kɛrɑ tɔnɑwɑ bɑ ǹ tem wɛ̃ mi bɑ ko n wɑ̃ɑ. Domi Gusunɔ u derɑ be kɑ ben bibun bweseru bɑ yɑ̃kunun sukum dimɔ, yerɑ yɑ kuɑ ben tubi nge mɛ u rɑɑ bu sɔ̃ɔwɑ.
15 Tem mɛ Mɔwisi u Rubɛnin bwese kɛrɑ wɛ̃ yɛnu kɑ yɛnu, 16 mɛyɑ mu wɑ̃ɑ sɑɑ Aroɛɛn di ye yɑ wɑ̃ɑ dɑɑ te bɑ mɔ̀ Aɑnɔɔn goorɔ, n kɑ dɑ wuu ge gɑ wɑ̃ɑ wɔwɑ yen suunu sɔɔ kɑ bɑtumɑ ye yɑ wɑ̃ɑ Mɛdibɑn bɔkuɔ, 17 kɑ Hɛsiboni kɑ wuu si su wɑ̃ɑ bɑtumɑ ye sɔɔ. Siyɑ Diboni kɑ Bɑmɔtu Bɑɑli kɑ Bɛti Bɑɑli Mɛɔni, 18 kɑ Yɑhɑsi kɑ Kedemɔti, kɑ Mɛfɑti, 19 kɑ Kiriɑtɑimu kɑ Sibimɑ kɑ Sere Hɑsɑsɑɑ ye yɑ wɑ̃ɑ guurɔ te tɑ wɑ̃ɑ wɔwɑɔ, 20 kɑ Bɛti Peori kɑ guu te bɑ mɔ̀ Pisigɑn berɑ giɑ kɑ Bɛti Yesimɔti, 21 kɑ sere Sihoni Amɔregii wi u rɑɑ bɑndu dii Hɛsiboniɔn wuu si su wɑ̃ɑ bɑtumɑ sɔɔ. N deemɑ Mɔwisi u sunɔ wi kɑmiɑ, kɑ Mɑdiɑnibɑn sinɑmbu. Beyɑ Efi kɑ Rekɛmu kɑ Suri kɑ Huri kɑ Rebɑ. Be kpurowɑ bɑ rɑɑ Sihoni sɑ̃ɑmɔ. 22 U mɑɑ derɑ bɑ Bɑlɑmu Beorin bii go wi u sɑ̃ɑ sɔro. 23 Rubɛnin bwese kɛrɑn tem mɛn nɔɔ gɑ yɔ̃rɑwɑ sere Yuudɛniɔ sɔ̃ɔ duu yeru giɑ. Beyɑ bɑ wuu si bɑ siɑ siɑ mi kpuro mɔ.
24 Tem mɛ Mɔwisi u Gɑdin bwese kɛrɑ wɛ̃ mɛyɑ mu wɑ̃ɑ 25 sɑɑ Yɑsɛɛn di kɑ Gɑlɑdin wusu kpuro kɑ wuu si su wɑ̃ɑ Amɔnibɑn tem sukum sɔɔ n kɑ girɑri Aroɛɛɔ, Rɑbɑn sɔ̃ɔ yɑri yerun deedeeru. 26 Mɛyɑ mu mɑɑ dɑ sɑɑ Hɛsibonin di n kɑ girɑri Rɑmɑti Misipeɔ kɑ Bɛtonimuɔ, sɑɑ mɑɑ Mɑhɑnɑimun di, n kɑ girɑri Debirin tem nɔɔ burɑ yerɔ, 27 kɑ Yuudɛnin wɔwɑn wuu sini, Bɛti Hɑrɑmu kɑ Bɛti Nimurɑ kɑ Sukɔtu kɑ Sɑfoni. Wuu siyɑ su rɑɑ sɑ̃ɑ sinɑ boko Sihonin wusu, wi u rɑɑ sɔ̃ Hɛsiboniɔ. Yuudɛnin dɑɑrɑ tɑ sɑ̃ɑ tem mɛn nɔɔ burɑ yeru sere n kɑ dɑ dɑɑ bure te bɑ mɔ̀ Genɛsɑrɛti. 28 Wuu si bɑ siɑ mi, siyɑ su kuɑ Gɑdin bwese kɛrɑn tubi.
29 Tem mɛ Mɔwisi u Mɑnɑsen bwese kɛrɑn sukum wɛ̃ mu n sɑɑ ben tubi, 30 mɛyɑ mu wɑ̃ɑ Mɑhɑnɑimun sɔ̃ɔ yɛ̃sɑn nɔm geu giɑ. Tem mɛyɑ Bɑsɑnin tem kpuro mi sinɑ boko Ogu u rɑɑ bɑndu dii kɑ sere Yɑirin wusu kpuro. Sin geerɑ sɑ̃ɑwɑ wɑtɑ. 31 Tem mɛyɑ, mu mɑɑ Gɑlɑdin tem sukum mɔ kɑ Asitɑrɔtu kɑ Edɛɛ, wuu si su rɑɑ sɑ̃ɑ sinɑ boko Ogun wusu. Tem mɛ kpurowɑ bɑ Mɑkiri, Mɑnɑsen biin bwese kɛrɑn sukum wɛ̃.