Tem mɛ bɑ Yudɑn bwese kɛrɑ
wɛ̃
15
1 Tem mɛ bɑ Yudɑn bwese kɛrɑ wɛ̃, mɛn sɔ̃ɔ yɛ̃sɑn nɔm dwɑru giɑ mu yɔ̃rɑwɑ Edɔmun tem nɔɔ burɑ yerɔ. Mi giɑ n sɑ̃ɑwɑ bɑtumɑ mi gɑ̃ɑnu ku rɑ kpi. Yerɑ bɑ sokumɔ Sini. 2 Berɑ min nɔɔ burɑ yeru tɑ toruɑwɑ sɑɑ nim wɔ̃ku bɔruguun di 3 mɑ tɑ dɑ gunguu te bɑ mɔ̀ Akɑrɑbimuɔ kɑ Siniɔ sere kɑ Kɑdɛsi Bɑɑnɛɑɔ. Sɑɑ mɑɑ min di, tɑ dɑ Hɛsironiɔ kɑ Adɑriɔ sere kɑ Kɑɑkɑɑɔ. 4 Sɑɑ min di tɑ dɑ Asimɔɔn berɑ giɑ n kɑ dɑ Egibitin dɑɑrɔ, mɑ tɑ dɑɑ te swĩi sere nim wɔ̃ku ge bɑ mɔ̀ Mɛditerɑnɛɔ. Nge mɛyɑ Yudɑbɑn tem nɔɔ burɑ yeru tɑ sɑ̃ɑ sɔ̃ɔ yɛ̃sɑn nɔm dwɑru giɑ.
5 Sɔ̃ɔ yɑri yeru giɑ nim wɔ̃ku bɔruguuwɑ gɑ sɑ̃ɑ mɛn nɔɔ burɑ yeru, n kɑ girɑri mi Yuudɛnin dɑɑrɑ rɑ nim sure.
6 Sɑɑ min di, mɛn sɔ̃ɔ yɛ̃sɑn nɔm geu giɑn nɔɔ burɑ yeru tɑ dɑwɑ Bɛti Hogulɑɔ kɑ Bɛti Arɑbɑn sɔ̃ɔ yɛ̃sɑn nɔm geuɔ n kɑ girɑri Bohɑnin kperɔ. Bohɑni wi, u sɑ̃ɑwɑ Rubɛnin bii. 7 Sɑɑ min di, tɑ mɑɑ dɑ Debiriɔ, Akɔɔn wɔwɑn bɔkuɔ. Sɑɑ min di tɑ dɑ sɔ̃ɔ yɛ̃sɑn nɔm geu giɑ sere Giligɑlin bɔkuɔ, Adumimun guurun deedeeru, yen dɑɑrun sɔ̃ɔ yɛ̃sɑn nɔm dwɑru giɑ, n kɑ dɑ Eni Semɛsin bwiin bɔkuɔ, sere kɑ Eni Rogɛliɔ. 8 Sɑɑ min di, tɑ sɑrɑ tɑ dɑ Bɛni Hinɔmun wɔwɑɔ, Yebusin sɔ̃ɔ yɛ̃sɑn nɔm dwɑru giɑ, ye bɑ mɑɑ sokumɔ Yerusɑlɛmu, kɑ sere guu ni nu wɑ̃ɑ wɔwɑ yen sɔ̃ɔ duu yeru giɑ, kɑ mi Refɑn wɔwɑ yɑ yɔ̃rɑ sɔ̃ɔ yɛ̃sɑn nɔm geu giɑ. 9 Sɑɑ mɑɑ min di tɑ dɑ tɑ Nɛfitoɑn bwii girɑri n kɑ dɑ wuu si su wɑ̃ɑ guu te bɑ mɔ̀ Eforoniɔ, n kɑ mɑɑ dɑ sere Bɑlɑɔ ye bɑ mɑɑ sokumɔ Yɑrimun wuu. 10 Sɑɑ Bɑlɑn di, tɑ mɑɑ dɑ sɔ̃ɔ duu yeru giɑ n kɑ girɑri Seirin guuru giɑ kɑ guu te bɑ mɔ̀ Yɑrimun sɔ̃ɔ yɛ̃sɑn nɔm geu giɑ Kɛsɑloniɔ, mɑ tɑ dɑ Bɛti Semɛsiɔ kɑ Tinnɑɔ, 11 kɑ Ekoronin sɔ̃ɔ yɛ̃sɑn nɔm geu giɑ, n kɑ dɑ Sikoroniɔ kɑ guu te bɑ mɔ̀ Bɑlɑ giɑ sere Yɑbunɛɛliɔ mɑ tɑ yɔ̃rɑ nim wɔ̃ku ge bɑ mɔ̀ Mɛditerɑnɛɔ.
12 Nim wɔ̃ku geyɑ, gɑ sɑ̃ɑ tem mɛn nɔɔ burɑ yeru sɔ̃ɔ duu yeru giɑ.
Nge mɛyɑ bɑ Yudɑbɑn tem mɛn nɔɔ burɑ yenu yi yi.
13 Bɑ Kɑlɛbu Yɛfunɛn bii Yudɑbɑn tem gɑm wɛ̃ nge mɛ Yinni Gusunɔ u Yosue sɔ̃ɔwɑ. Bɑ nùn Aribɑn wuu wɛ̃ ye bɑ mɑɑ mɔ̀ Heboroni. Aribɑ wi, u sɑ̃ɑwɑ Anɑkibɑn sikɑdo. 14 Kɑlɛbu wi, u Anɑkibɑn bwesenu itɑ girɑ. Berɑ Sesɑibɑ kɑ Akimɑnibɑ kɑ sere Tɑlimɑibɑ. 15 Heboronin diyɑ u seewɑ u dɑ u Debirigibu wɔri. Wuu gerɑ bɑ rɑ rɑɑ soku Sefɛɛn wuu. 16 Mɑ Kɑlɛbu u nɛɛ, wi u kpĩɑ u Sefɛɛn wuu kɑmiɑ, yɛ̃rowɑ u koo win bii wɔndiɑ Akusɑ kɛ̃ u suɑ kurɔ. 17 Yerɑ Otiniɛli, Kɑlɛbun mɔɔ Kenɑsin bii, u wuu ge kɑmiɑ. Mɑ Kɑlɛbu u nùn win bii wɔndiɑ wi wɛ̃ kurɔ. 18 Sɑnɑm mɛ kurɔ wi, u duɑ Otiniɛlin yɛnuɔ u kpɑ, yerɑ u nùn bwisi kɑ̃ u nɛɛ, ɑ doo ɑ tem bikiɑ nɛn tundon mi. Adɑmɑ kurɔ win tii u dɑ win tundo Kɑlɛbun mi. Ye u turɑ mi, u sɑrɑ sɑɑ win kɛtɛkun di. Yerɑ Kɑlɛbu u nùn bikiɑ u nɛɛ, mbɑ ɑ kĩ. 19 Mɑ u wisɑ u nɛɛ, ɑ suuru koowo ɑ mɑn bwii kɛ̃. Domi berɑ ye ɑ mɑn wɛ̃ sɔ̃ɔ yɛ̃sɑn nɔm dwɑru giɑ, nim sɑri mi.
Mɑ Kɑlɛbu u nùn bwii wɛ̃ yi yi wɑ̃ɑ guunɔ kɑ wɔwɑɔ.
20 Tem mɛ bɑ siɑ siɑ mini kpurowɑ mu kuɑ Yudɑn bwese kɛrɑn tubi.
21 Wuu si su wɑ̃ɑ Edɔmun tem nɔɔ burɑ yeru giɑ Yudɑbɑn tem sɔ̃ɔ yɛ̃sɑn nɔm dwɑru giɑ, siyɑ Kɑbisɛɛli, kɑ Edɛɛ kɑ Yɑguri, 22 kɑ Kinɑ, kɑ Dimɔnɑ, kɑ Adɑdɑ, 23 kɑ Kedɛsi, kɑ Hɑsori, kɑ Itinɑni, 24 kɑ Sifu, kɑ Telɛmu, kɑ Beɑlɔtu, 25 kɑ Hɑsori Hɑdɑtɑ, kɑ Keriɔtu Hɛsironi ye bɑ mɑɑ sokumɔ Hɑsori, 26 kɑ Amɑmu, kɑ Semɑ, kɑ Mɔlɑdɑ, 27 kɑ Hɑsori Gɑdɑ, kɑ Hɛsimɔɔ, kɑ Bɛti Pɑlɛti, 28 kɑ Hɑsɑɑ Suɑli, kɑ Beri Sebɑ, kɑ Bisotiɑ, 29 kɑ Bɑlɑ, kɑ Iyimu, kɑ Asɛmu, 30 kɑ Ɛlitolɑdi, kɑ Kesili, kɑ Hɔɔmɑ, 31 kɑ Sikilɑgi, kɑ Mɑdimɑnɑ, kɑ Sɑnsɑnɑ, 32 kɑ Lebɑɔti, kɑ Silimu, kɑ Aini, kɑ Rimɔɔ. Wuu si kpuro su kuɑwɑ tɛnɑ tiɑ sɑri, gen bɑɑgere kɑ gen bɑru kpɑɑnu.
33 Wuu si su mɑɑ wɑ̃ɑ wɔwɑ sɔɔ, siyɑ Ɛsitɑoli, kɑ Soreɑ, kɑ Asinɑ, 34 kɑ Sɑnɔɑ, kɑ Eni Gɑnimu, kɑ Tɑpuɑ, kɑ Enɑmu, 35 kɑ Yɑɑmuti, kɑ Adulɑmu, kɑ Soko, kɑ Asekɑ, 36 kɑ Sɑɑrɑimu, kɑ Aditɑimu, kɑ Gederɑ, kɑ Gederɔtɑimu. Si mɑɑ, su kuɑwɑ wɔkurɑ nnɛ, gen bɑɑgere kɑ gen bɑru kpɑɑnu. 37 Kɑ Senɑni, kɑ Hɑdɑsɑ, kɑ Migidɑli Gɑdi, 38 kɑ Dilɑni, kɑ Misipe, kɑ Yokutɛɛli, 39 kɑ Lɑkisi, kɑ Bosikɑti, kɑ Egoloni, 40 kɑ Kɑboni, kɑ Lɑsimɑsi, kɑ Kitilisi, 41 kɑ Gederɔtu, kɑ Bɛti Dɑgoni, kɑ Nɑɑmɑ, kɑ Mɑkedɑ. Si mɑɑ, su kuɑwɑ mi wɔkurɑ nɔɔbu kɑ tiɑ, gen bɑɑgere kɑ gen bɑru kpɑɑnu. 42 Kɑ mɑɑ Libinɑ, kɑ Etɛɛ, kɑ Asɑni, 43 kɑ Yifutɑ, kɑ Asinɑ, kɑ Nɛsibu, 44 kɑ Keilɑ, kɑ Akisibu, kɑ Mɑresɑ. Mɑ si kpuro su mɑɑ kuɑ nɔɔbɑ nnɛ, gen bɑɑgere kɑ gen bɑru kpɑɑnu. 45 Kɑ mɑɑ Ekoroni, ye kɑ yen wuu mɑrosu kɑ yen bɑru kpɑɑnu. 46 Kɑ sere wuu mɑrosu kɑ bɑru kpɑɑnu ni nu kɑ Asidɔdu sikerenɛ kɑ ni nu wɑ̃ɑ Ekoroni kɑ nim wɔ̃ku ge bɑ mɔ̀ Mɛditerɑnɛn bɑɑ sɔɔ, 47 kɑ Asidɔdu, kɑ Gɑsɑ, kɑ sin wuu mɑrosu kɑ bɑru kpɑɑnu, n kɑ girɑri Egibitin dɑɑrɔ sere n kɑ dɑ nim wɔ̃ku ge bɑ mɔ̀ Mɛditerɑnɛɔ.
48 Wuu si su mɑɑ wɑ̃ɑ guunɔ, siyɑ Sɑmiri kɑ Yɑtiri kɑ Soko, 49 kɑ Dɑnɑ, kɑ Sɑnɑn wuu, ge bɑ mɑɑ mɔ̀ Debiri, 50 kɑ Anɑbu, kɑ Ɛsitemɔɑ, kɑ Animu, 51 kɑ Gosɛni, kɑ Holoni, kɑ Gilo. Mɑ si, su mɑɑ kuɑ wɔkurɑ tiɑ, gen bɑɑgere kɑ gen bɑru kpɑɑnu. 52 Kɑ Arɑbu, kɑ Dumɑ, kɑ Eseɑni, 53 kɑ Yɑnumu, kɑ Bɛti Tɑpuɑ, kɑ Afɛki, 54 kɑ Humutɑ, kɑ Aribɑn wuu ge bɑ mɑɑ mɔ̀ Heboroni, kɑ Siori. Mɑ si kpuro su mɑɑ kuɑ nɔɔbɑ nnɛ, gen bɑɑgere kɑ gen bɑru kpɑɑnu. 55 Kɑ mɑɑ Mɑoni, kɑ Kɑɑmɛli, kɑ Sifu, kɑ Yutɑ, 56 kɑ Yisirɛɛli, kɑ Yokudeɑmu, kɑ Sɑnɔɑ, 57 kɑ Kɑɛni, kɑ Gibeɑ, kɑ Tinnɑ. Si kpuro su mɑɑ kuɑ wɔkuru, gen bɑɑgere kɑ gen bɑru kpɑɑnu. 58 Kɑ sere mɑɑ Hɑlulu, kɑ Bɛti Suri, kɑ Gedori, 59 kɑ Mɑrɑti, kɑ Bɛti Anɔtu, kɑ Eletekonu. Si kpuro su sɑ̃ɑwɑ nɔɔbɑ tiɑ, gen bɑɑgere kɑ gen bɑru kpɑɑnu. 60 Kɑ sere mɑɑ Bɑɑlin wuu ge bɑ mɑɑ mɔ̀ Yɑrimun wuu, kɑ Rɑbɑ. Mɑ si, su mɑɑ kuɑ yiru, gen bɑɑgere kɑ gen bɑru kpɑɑnu.
61 Wuu si su wɑ̃ɑ berɑ mi gɑ̃ɑnu ku rɑ kpi, siyɑ Bɛti Arɑbɑ, kɑ Midini, kɑ Sekɑkɑ, 62 kɑ Nibusɑni, kɑ wuu mi bɔrɑ wɑ̃ɑ, kɑ Eni Engɛdi. Si kpuro su kuɑwɑ wusu nɔɔbɑ tiɑ, gen bɑɑgere kɑ gen bɑru kpɑɑnu.
63 Adɑmɑ Yudɑn bibun bweseru, bɑ ǹ kpĩɑ bɑ Yebusibɑ gire be bɑ wɑ̃ɑ Yerusɑlɛmuɔ. Yen sɔ̃nɑ bɑ wɑ̃ɑ sere kɑ gisɔn gisɔ, kɑ Yudɑbɑ sɑnnu.