Yosue u Yɑbini kɑ win bɔrɔbɑ
kɑmiɑ
11
1 Sɑɑ ye Yɑbini, Hɑsorin sinɑ boko u nuɑ mɑ Yosue kɑ wigibu bɑ tɑbu dimɔ, yerɑ u sɔmɔbu gɔrɑ Yobɑbu, Mɑdonin sunɔn mi kɑ Simuronin sunɔn mi kɑ Akusɑfun sunɔn mi, 2 kɑ sere sinɑm be bɑ wɑ̃ɑ guunun berɑ giɑ, sɔ̃ɔ yɛ̃sɑn nɔm geu giɑ, kɑ be bɑ wɑ̃ɑ Yuudɛnin wɔwɑɔ dɑɑ bure te bɑ mɔ̀ Genɛsɑrɛtin sɔ̃ɔ yɛ̃sɑn nɔm dwɑru giɑ, kɑ be bɑ wɑ̃ɑ bɑtumɑ ye bɑ mɔ̀ Sefɑlɑɔ, kɑ mɑɑ Dorin berɑ giɑ, nim wɔ̃kun bɔkuɔ sɔ̃ɔ duu yeru giɑ. 3 Mɛyɑ u mɑɑ Kɑnɑnibɑ nɔɔsiɑ be bɑ wɑ̃ɑ Yuudɛnin sɔ̃ɔ yɑri yeru giɑ kɑ gen sɔ̃ɔ duu yeru giɑ. Beyɑ Amɔrebɑ kɑ Hɛtibɑ kɑ Feresibɑ kɑ Yebusibɑ be bɑ wɑ̃ɑ guunun berɑ giɑ, kɑ Hefibɑ be bɑ wɑ̃ɑ guu te bɑ mɔ̀ Hɛɛmɔɔn gɑ̃ɑrɔ Misipɑn temɔ. 4 Sinɑm be kpuro bɑ seewɑ kɑ ben tɑbu kowo dɑbi dɑbinu nge yɑni sɛɛri yi yi wɑ̃ɑ nim wɔ̃kun bɔkuɔ. Mɛyɑ bɑ mɑɑ tɑbu kɛkɛbɑ mɔ kɑ dumi dɑbi dɑbinu. 5 Mɑ bɑ nɔɔ tiɑ kuɑ bɑ nɑ bɑ ben sɑnsɑni girɑ Mɛromun dɑɑrɔ bu kɑ Isirelibɑ wɔri.
6 Yerɑ Yinni Gusunɔ u Yosue sɔ̃ɔwɑ u nɛɛ, ɑ ku ben bɛrum ko. Siɑ ɑmɑdɑɑre kon bɛɛ bu nɔmu sɔndiɑ, kpɑ i bu mwɛɛri i go, kpɑ i ben dumin nɑɑ sĩinu bɔɔri, yen biru i ben tɑbu kɛkɛ be dumi gɑwe dɔ̃ɔ mɛni.
7 Sɑɑ yerɑ Yosue kɑ win tɑbu kowobu bɑ dɑ bɑ tɔn be wɔri subɑru sɔɔ Mɛromun dɑɑru mi. 8 Yerɑ Yinni Gusunɔ u bu bɛri ben nɔmɑɔ bɑ bu kɑmiɑ. Be bɑ duki suɑ bɑ bu nɑɑ swĩi sere wuu bɔkɔ ge bɑ mɔ̀ Sidoniɔ sɔ̃ɔ yɛ̃sɑn nɔm geu giɑ kɑ sere Miserefɔti Mɑimuɔ kɑ Misipɑn wɔwɑɔ sɔ̃ɔ yɑri yeru giɑ. Bɑ bu gowɑ mɑm mɑm, bɑɑ tɔn turo bɑ ǹ dere u sĩɑ. 9 Yosue u kuɑwɑ nge mɛ Yinni Gusunɔ u nùn sɔ̃ɔwɑ. U tɔn ben dumin nɑɑ sĩinu bɔɔrɑ mɑ u tɑbu kɛkɛ be dumi gɑwe mi dɔ̃ɔ mɛni.
Bɑ Hɑsori mwɑ
10 Ye Yosue u gɔsirɑmɑ, yerɑ u wuu ge bɑ mɔ̀ Hɑsori wɔri u mwɑ u gen sunɔ go. N deemɑ wuu gerɑ gɑ sɑ̃ɑ berɑ min wuu mɑro gèn mi ben sinɑ boko u wɑ̃ɑ. 11 Yosue u derɑ bɑ gen tɔmbu kpeerɑsiɑ mɑm mɑm, mɑ bɑ gu dɔ̃ɔ mɛni. 12 Mɑ bɑ sinɑm ben wuu si su tie wɔri bɑ sin sinɑmbu kɑ sin tɔmbu kpuro kpeerɑsiɑ. Bɑ kuɑwɑ nge mɛ Mɔwisi, Yinni Gusunɔn sɔm kowo u Yosue sɔ̃ɔwɑ. 13 Adɑmɑ bɑ ǹ wuu si su wɑ̃ɑ gungunu wɔllɔ dɔ̃ɔ mɛni, mɑ n kun mɔ Hɑsori ye. 14 Ye bɑ tɔn be kpuro go bɑ kpɑ, yerɑ bɑ ben dukiɑ kɑ ben yɑɑ sɑbenu gurɑ bɑ tii koosi. 15 Yosue u derɑ bɑ kuɑ nge mɛ Yinni Gusunɔ u win sɔm kowo Mɔwisi sɔ̃ɔwɑ u ko. U ǹ yen gɑɑ bure.
Yosue u Kɑnɑnin tem kpuro
mwɑ
16 Nge mɛyɑ Yosue u kɑ Kɑnɑnin tem mɛ kpuro mwɑ, mɛn guunun berɑ giɑ kɑ mɛn sɔ̃ɔ yɛ̃sɑn nɔm dwɑru giɑ kɑ Gosɛnin tem kpuro, kɑ Sefɑlɑn berɑ giɑ, kɑ Yuudɛnin wɔwɑ giɑ, kɑ sere guu ni nu wɑ̃ɑ sɔ̃ɔ yɛ̃sɑn nɔm geu giɑ kɑ berɑ min bɑtumɑ. 17 Sinɑm be bɑ kɑmiɑ mi, ben wusu wɑ̃ɑwɑ sɑɑ guu tèn mi gɑ̃ɑnu ku rɑ kpin berɑ giɑn di Seirin bɔkuɔ, sɔ̃ɔ yɛ̃sɑn nɔm dwɑru giɑ n kɑ girɑri Bɑɑli Gɑdiɔ ye yɑ wɑ̃ɑ Libɑnin wɔwɑɔ guu te bɑ mɔ̀ Hɛɛmɔɔn gɑ̃ɑrɔ sɔ̃ɔ yɛ̃sɑn nɔm geu giɑ. 18 Bɑ kɑ sinɑm be tɑbu kuɑ n tɛ bɑ sere bu kɑmiɑ be kpuro. 19 Tɔn be kpuro sɔɔ, Hefi be bɑ wɑ̃ɑ Gɑbɑoniɔ tɔnɑwɑ bɑ kɑ Isirelibɑ dorɑ. Be bɑ tie Isirelibɑ bɑ bu wɔriwɑ bɑ go mɑm mɑm. 20 Domi Yinni Gusunɔ u derɑ sin tɔmbun gɔ̃rusu bɔbiɑ bɑ kɑ Isirelibɑ tɑbu kuɑ, kpɑ Isirelibɑ bu wɑ bu kɑ bu kpeerɑsiɑ mɑm mɑm bɑ kun ben wɔnwɔndu kue, nge mɛ Yinni Gusunɔ u win sɔm kowo Mɔwisi sɔ̃ɔwɑ.
21 Sɑɑ ye sɔɔ, Yosue u mɑɑ seewɑ u Anɑkibɑ wɔri be bɑ wɑ̃ɑ guunun berɑ giɑ Heboroniɔ kɑ Debiriɔ kɑ Anɑbuɔ kɑ sere be bɑ wɑ̃ɑ Yudɑ kɑ Isirelin guunun berɑ giɑ, u bu kpeerɑsiɑwɑ mɑm mɑm be kɑ ben wusu, 22 mɑ n kun mɔ be bɑ duki suɑ bɑ dɑ Gɑsɑɔ kɑ Gɑtiɔ kɑ Asidɔduɔ. 23 Nge mɛyɑ Yosue u kɑ Kɑnɑnin tem mɛ kpuro mwɛɛrɑ nge mɛ Yinni Gusunɔ u Mɔwisi sɔ̃ɔwɑ. Yen biru u mu bɔnu kuɑ. U Isirelibɑn bwese kɛrɑ bɑɑyere yegim wɛ̃. Sɑɑ ye sɔɔrɑ bɑ tɑbun bɑɑ deri bɑ wɛ̃rɑ.