Isirelibɑ bɑ Amɔrebɑ kɑmiɑ
10
1 Adoni Sedɛki, Yerusɑlɛmun sunɔ u nuɑ mɑ Yosue u Ayi kɑmiɑ u ye kpeerɑsiɑ u yen sunɔ go, nge mɛ u rɑɑ Yeriko kɑ yen sunɔ kuɑ. U mɑɑ nuɑ mɑ Gɑbɑonigibu bɑ kɑ Isirelibɑ ɑrukɑwɑni bɔkuɑ, bɑ wɑ̃ɑ ben suunu sɔɔ. 2 Yenibɑ kpuron sɔ̃ u nɑndɑ gem gem, domi Gɑbɑoni wuu bɔkɔwɑ nge sìn mi tem yɛ̃robu bɑ rɑ n wɑ̃ɑ. Gɑ mɑɑ Ayi kere. Yen biru gen tɔmbu kpuro tɑbu durɔ wɔrugɔbɑrɑ. 3 Yen sɔ̃nɑ Adoni Sedɛki, Yerusɑlɛmun sunɔ wi, u sinɑm beni gɔriɑ. Beyɑ Hohɑmu Heboronin sunɔ, kɑ Pireɑmu Yɑɑmutin sunɔ, kɑ Yɑfiɑ Lɑkisin sunɔ kɑ Debiri Egolonin sunɔ. 4 U nɛɛ, bu nɑ win mi, kpɑ bu nùn somi bu kɑ Gɑbɑoni wɔri yèn sɔ̃ yen tɔmbu bɑ kɑ Yosue kɑ Isirelibɑ ɑrukɑwɑni bɔkuɑ.
5 Nge mɛyɑ Amɔrebɑn sinɑmbu nɔɔbu be, bɑ mɛnnɑ bɑ kɑ ben tɑbu kowobu kpuro dɑ bɑ ben sɑnsɑni girɑ Gɑbɑonin bɔkuɔ. Mɑ bɑ ye wɔri. 6 Mɑ Gɑbɑonigibu bɑ Yosue sɔmɔ gɔriɑ win sɑnsɑniɔ Giligɑliɔ bɑ nɛɛ, ɑ ku wunɛn nɔmɑ wunɑ bɛsɛ wunɛn bwɑ̃ɑbun min di. A nɑ fuuku ɑ sun fɑɑbɑ ko, ɑ sun somi. Domi Amɔrebɑn sinɑmbu kpuro be bɑ wɑ̃ɑ guunun berɑ giɑ, bɑ mɛnnɑ bɑ sun wɔrimɑ.
7 Mɑ Yosue u seewɑ sɑɑ Giligɑli min di, kɑ win tɑbu kowobu kpuro bè sɔɔ tɑbu durɔ wɔrugɔbɑ bɑ wɑ̃ɑ. 8 Yinni Gusunɔ u nùn sɔ̃ɔwɑ u nɛɛ, ɑ ku bu nɑsiɑ domi nɑ nun bu nɔmu bɛriɑ. Ben goo sɑri wi u koo yɔ̃rɑ wunɛn wuswɑɑɔ.
9 Yosue kɑ win tɔmbu bɑ sɑnum so wɔ̃ku giriru. Mɑ bɑ Amɔrebɑ wɔri suɑru sɔɔ. 10 Yerɑ Yinni Gusunɔ u derɑ Amɔre be, bɑ burisinɑ Isirelibɑn wuswɑɑɔ. Mɑ Isirelibɑ bɑ bu go go gem kɑ tiɑ Gɑbɑonin bɔkuɔ. Bɑ ben gɑbu nɑɑ swĩi bɑ go Bɛti Horonin swɑɑɔ sere bɑ kɑ turɑ Asekɑɔ kɑ Mɑkedɑɔ. 11 Sɑnɑm mɛ bɑ Isirelibɑ duki suurimɔ Bɛti Horonin swɑɑɔ, ye yɑ sɑrɑmɔ guurun di, miyɑ Yinni Gusunɔ u derɑ guru kpee bɑkɑnu nu bu wɔrikimɔ wɔllun di nu goomɔ, sere bɑ kɑ turɑ Asekɑɔ. Be guru kpee ni, nu go, bɑ dɑbi bɑ kere be Isirelibɑ bɑ go.
12 Dɔmɑ te Yinni Gusunɔ u Isirelibɑ Amɔrebɑ nɔmu bɛriɑ, Yosue u nùn kɑnɑ Isirelibɑn nɔni biru u nɛɛ,
ɑ de sɔ̃ɔ u yɔ̃rɑ sɑu Gɑbɑonin deedeeru
kpɑ suru u mɑɑ yɔ̃rɑ Ayɑlonin wɔwɑn deedeeru.
13 Mɑ sɔ̃ɔ u yɔ̃rɑ sɛ̃ɛ, mɛyɑ mɑɑ suru u yɔ̃rɑ sere bɑ kɑ ben yibɛrɛ be kpuro kɑmiɑ. Gɑri yi, yi yoruɑ Yɑsɑrin tirerɔ, yi nɛɛ, sɔ̃ɔ u yɔ̃rɑ wɔllun suunu suunukɑɔ. U ǹ kɑ dubu sɛnde nge sɔ̃ɔ teerun sɑkɑ. 14 Tɔ̃ru gɑrɑ kun mɑɑ nɑɑre nge te, tè sɔɔ Yinni Gusunɔ u tɔnun gere wurɑ mɛ, dɔmɑ te u Isirelibɑ sɑnnɑ mi.
15 Yen biru Yosue u gɔsirɑ u dɑ win sɑnsɑniɔ Giligɑliɔ, wi kɑ Isirelibɑ kpuro.
Yosue u Amɔrebɑn
sinɑmbu nɔɔbu ye go
16 Sɑɑ ye sɔɔ, sinɑmbu nɔɔbu be, bɑ kpikiru suɑ bɑ dɑ bɑ kukuɑ kpee wɔruɔ Mɑkedɑɔ. 17 Yerɑ goo u nɑ u Yosue sɔ̃ɔwɑ mɑ sinɑm be, bɑ wɑ̃ɑ kpee wɔru gen mi. 18 Mɑ Yosue u nɛɛ, i ge kɛnuɔ kɑ kpee bɑkɑnu kpɑ i kɔ̃sobu yi mi. 19 Adɑmɑ i ku tɛ mi, i yibɛrɛ be bɑ tie nɑɑ swĩiyɔ kpɑ i ku de bu du ben wusɔ, domi Gusunɔ bɛsɛn Yinniwɑ u sun bu nɔmu bɛriɑ.
20 Yosue kɑ Isirelibɑ bɑ Amɔrebɑ kpuro kɑmiɑ, mɑ n kun mɔ be bɑ kpĩɑ bɑ duki suɑ bɑ kukuɑ wuu si su gbɑ̃rɑru mɔ sɔɔ. 21 Mɑ Yosuen tɔmbu bɑ wurɑmɑ kɑ bɔri yɛndu win mi Mɑkedɑɔ. Tem mɛ sɔɔ, goo kun mɑɑ kɑ̃kɑ u ben kɔ̃sɑ gere.
22 Yen biruwɑ Yosue u nɛɛ, i mɑn kpee wɔru ge wukio kpɑ i mɑn sinɑmbu nɔɔbu ye yɑrɑmɑ. 23 Bɑ bu yɑrɑmɑ bɑ kɑ dɑ Yosuen mi. Bɑ sɑ̃ɑwɑ wuu sinin sinɑmbu, Yerusɑlɛmu kɑ Heboroni kɑ Yɑɑmuti kɑ Lɑkisi kɑ Egoloni. 24 Ye bɑ kɑ sinɑm be kpuro nɑ Yosuen mi, yerɑ u Isirelibɑ kpuro sokusiɑ u nɛɛ, be bɑ sɑ̃ɑ tɑbu kowobun wirugibu bɑ kɑ tɑɑ bi kuɑ, bu nɑ bu sinɑm ben wĩinu kɑ nɑɑsu tɑɑre.
Mɑ bɑ kuɑ nge mɛ u geruɑ. 25 Yosue u mɑɑ bu sɔ̃ɔwɑ u nɛɛ, i ku bɛrum ko, i de i n wɔrugɔru mɔ kpɑ i ku mwiɑ kpɑnɑ. Nge mɛsumɑ Yinni Gusunɔ u ko n dɑ bɛsɛn yibɛrɛbɑ kpuro kue.
26 Ye u gɑri yi geruɑ u kpɑ, mɑ u sinɑm be go u ben gonu bwɛ̃ dɑ̃nu nɔɔbu sɔɔ. U nu deri mi sere n kɑ kuɑ yokɑ. 27 Yokɑ yerɑ u woodɑ wɛ̃ u nɛɛ, bu goo ni sɑrɑsio kpɑ bu nu kpɛ̃ɛ kpee wɔru ge sɔɔ. Yen biru bɑ kpee bɑkɑnu suɑ bɑ kɑ wɔru gen nɔɔ kɔruɑ. Kpee ni, nu wɑ̃ɑ mi, sere kɑ gisɔn gisɔ.
Yosue u mɑɑ Amɔrebɑn
wusu gɑsu mwɑ
28 Yen tɔ̃ɔ terɑ Yosue u wuu ge bɑ mɔ̀ Mɑkedɑ wɔri u mwɑ. U gen sunɔ go kɑ tɔn be bɑ wɑ̃ɑ mi kpuro. Bɑɑ tɔn turo u ǹ deri. U Mɑkedɑn sunɔ wi kuɑwɑ nge mɛ u Yerikogii kuɑ.
29 Yen biru sɑɑ Mɑkedɑn di, Yosue kɑ win tɔn be, bɑ dɑ bɑ Libinɑ wɔri. 30 Mɑ Yinni Gusunɔ u bu wuu ge nɔmu bɛriɑ. Bɑ gen tɔmbu go kpuro. Bɑɑ tɔn turo, bɑ ǹ deri. Mɑ bɑ gen sunɔ kuɑ nge mɛ bɑ Yerikogii kuɑ.
31 Sɑɑ Libinɑn di Yosue kɑ win tɔmbu bɑ mɑɑ dɑ bɑ Lɑkisi tɑrusi bɑ ye wɔri. 32 Mɑ Yinni Gusunɔ u bu wuu ge nɔmu bɛriɑ. Ye bɑ gu wɔri mɛ, yen sɔ̃ɔ yiruserɑ bɑ gu kɑmiɑ bɑ gen tɔmbu kpuro go. Bɑɑ tɔn turo, bɑ ǹ deri, nge mɛ bɑ kuɑ Libinɑɔ. 33 N deemɑ Horɑmu Gesɛɛn sunɔ kɑ win tɑbu kowobu bɑ wɑ̃ɑ mi, bɑ Lɑkisigibu somimɔ. Adɑmɑ Yosue u be kpuro kɑmiɑ u bu go, u ǹ ben goo deri.
34 Sɑɑ Lɑkisin min diyɑ Yosue kɑ win tɔn be, bɑ mɑɑ dɑ Egoloniɔ bɑ ye tɑrusi bɑ wɔri. 35 Yen dɔmɑ terɑ bɑ wuu ge kɑmiɑ, mɑ bɑ gen tɔmbu go nge mɛ bɑ kuɑ Lɑkisiɔ.
36 Egoloni min diyɑ bɑ mɑɑ dɑ bɑ Heboroni wɔri. 37 Mɑ bɑ wuu gen tɔmbu mwɛɛrɑ bɑ go go, kɑ gen sunɔn tii, kɑ sere mɑɑ gen bɑru kpɑɑnugibu kpuro. Bɑɑ tɔn turo, bɑ ǹ deri, bɑ bu gowɑ nge mɛ bɑ kuɑ Egoloniɔ.
38 Yen biru bɑ mɑɑ gɔsirɑ bɑ dɑ Debiriɔ. Mɑ bɑ ye wɔri 39 bɑ kɑmiɑ bɑ yen tɔmbu kɑ yen sunɔ kɑ yen bɑru kpɑɑnugibu kpuro mwɛɛrɑ bɑ go. Bɑɑ tɔn turo, bɑ ǹ deri. Yosue u derɑ bɑ tɔn be kpuro gowɑ nge mɛ u Heboronigibu kɑ Libinɑgibu kɑ ben sinɑmbu kuɑ.
40 U berɑ min tɔmbu gowɑ kɑ min sinɑmbu wuu si su wɑ̃ɑ guunun berɑ giɑ kɑ si su wɑ̃ɑ sɔ̃ɔ yɛ̃sɑn nɔm dwɑrɔ kɑ si su wɑ̃ɑ wɔwɑɔ ye yɑ wɑ̃ɑ nim wɔ̃kun berɑ giɑ, kɑ sere mɑɑ si su wɑ̃ɑ gungunɔ. Bɑɑ tɔn turo u ǹ deri. U bu gowɑ nge mɛ Gusunɔ, Isirelibɑn Yinni u nùn sɔ̃ɔwɑ u ko. 41 Mɑ Yosue u mɑɑ wusu kpuro wɔri sɑɑ Kɑdɛsi Bɑɑnɛɑ kɑ Gɑsɑn di si su wɑ̃ɑ sɔ̃ɔ yɛ̃sɑn nɔm dwɑru giɑ n kɑ girɑri Gosɛnin berɑ giɑ Yudɑn temɔ sere n kɑ dɑ Gɑbɑoniɔ sɔ̃ɔ yɛ̃sɑn nɔm geu giɑ. 42 U wuu si su wɑ̃ɑ mi kpuro mwɛɛrɑ u sin sinɑmbu kɑmiɑ. Domi Gusunɔ Isirelibɑn Yinniwɑ u bu sɑnnɑmmɛ. 43 Yenibɑ kpuron biru Yosue kɑ win tɔmbu bɑ gɔsirɑmɑ ben sɑnsɑniɔ Giligɑliɔ.